ഒടിപി ഇനി പഴങ്കഥ; വാട്ട്സ്ആപ്പ്, ഫേസ്ബുക്ക് ലോഗിനുകള്‍ക്കായി സൈലന്റ് വെരിഫിക്കേഷന്‍

ഇനി മുതല്‍ വാട്ട്സ്ആപ്പ്, ഇന്‍സ്റ്റാഗ്രാം, ഫേസ്ബുക്ക് എന്നിവയില്‍ ലോഗിന്‍ ചെയ്യാന്‍ ഒടിപി യ്ക്കായി കാത്തിരിക്കേണ്ടതില്ല. മെറ്റയുമായി ചേര്‍ന്ന് വി അവതരിപ്പിച്ച പുതിയ സൈലന്റ് മൊബൈല്‍ വെരിഫിക്കേഷന്‍ സംവിധാനത്തിലൂടെ ഉപയോക്താക്കള്‍ക്ക് കൂടുതല്‍ സുരക്ഷിതവും ലളിതവുമായ ലോഗിന്‍ അനുഭവം ലഭിക്കും. ഉപയോക്താവ് സ്വന്തം വി (വിഐ) നെറ്റ്വര്‍ക്കില്‍ ആയിരിക്കുമ്പോള്‍, പശ്ചാത്തലത്തില്‍ തന്നെ ഐഡന്റിറ്റി സ്ഥിരീകരിക്കുന്ന ഈ സാങ്കേതികവിദ്യ, ആപ്പുകള്‍ക്കിടയില്‍ മാറി മാറി സഞ്ചരിക്കേണ്ട ബുദ്ധിമുട്ടും ഒടിപി കോഡുകള്‍ പകര്‍ത്തിയെഴുതേണ്ട ആവശ്യകതയും പൂര്‍ണ്ണമായും ഒഴിവാക്കുന്നു.

പൂര്‍ണ്ണമായും നെറ്റ്വര്‍ക്ക് അധിഷ്ഠിതമായി പ്രവര്‍ത്തിക്കുന്ന ഈ സംവിധാനം സുരക്ഷയുടെ കാര്യത്തില്‍ ഏറെ മുന്നിലാണ്. ലോഗിന്‍ ചെയ്യുമ്പോഴോ അക്കൗണ്ട് റിക്കവറി ചെയ്യുമ്പോഴോ ഒടിപി ലഭിക്കാത്തതിന്റെയോ അല്ലെങ്കില്‍ സോഷ്യല്‍ എഞ്ചിനീയറിംഗ് തട്ടിപ്പുകള്‍ വഴി ഒടിപി ചോര്‍ന്നുപോകുന്നതിന്റെയോ ആശങ്കകള്‍ ഇനി ഉപയോക്താക്കള്‍ക്ക് വേണ്ട. അക്കൗണ്ട് രജിസ്ട്രേഷന്‍ മുതല്‍ സുരക്ഷാ പരിശോധനകള്‍ വരെ വളരെ വേഗത്തിലും തടസ്സമില്ലാതെയും പൂര്‍ത്തിയാക്കാന്‍ ഈ പുതിയ സാങ്കേതികവിദ്യ സഹായിക്കും.

ഡിജിറ്റല്‍ ഇടപാടുകളില്‍ തട്ടിപ്പുകള്‍ വര്‍ധിച്ചുവരുന്ന കാലത്ത്, ഫിഷിംഗ് തട്ടിപ്പുകളില്‍ നിന്നും ഐഡന്റിറ്റി മോഷ്ടിക്കപ്പെടാന്‍ സാധ്യതയുള്ള സാഹചര്യങ്ങളില്‍ നിന്നും ഉപയോക്താക്കളെ സംരക്ഷിക്കാന്‍ നെറ്റ്വര്‍ക്ക് അധിഷ്ഠിത സ്ഥിരീകരണം വലിയൊരു ചുവടുവയ്പ്പാണ്. പരമ്പരാഗത എസ്എംഎസ് അധിഷ്ഠിത പ്രാമാണീകരണ രീതികളില്‍ നിന്ന് മാറി, കൂടുതല്‍ വിശ്വസനീയമായ സംവിധാനങ്ങളിലേക്ക് ടെലികോം മേഖല മാറുന്നതിന്റെ വ്യക്തമായ സൂചനയാണിത്.

ഈ സംയോജനം കേവലം തുടക്കം മാത്രമാണെന്നും, വരും കാലങ്ങളില്‍ കൂടുതല്‍ ആപ്ലിക്കേഷനുകളിലും സേവനങ്ങളിലും ഇത്തരത്തിലുള്ള നൂതനമായ സുരക്ഷാ സംവിധാനങ്ങള്‍ കൊണ്ടുവരാന്‍ തങ്ങള്‍ പദ്ധതിയിടുന്നുണ്ടെന്നും വി അറിയിച്ചു. വഞ്ചന തടയല്‍ സംവിധാനങ്ങള്‍, റിസ്‌ക് അടിസ്ഥാനമാക്കിയുള്ള സ്ഥിരീകരണം, മെച്ചപ്പെട്ട പ്രാമാണീകരണം എന്നിവ ഉള്‍പ്പെടെയുള്ള ആധുനിക സാങ്കേതികവിദ്യകളിലൂടെ ഇന്ത്യയുടെ ഡിജിറ്റല്‍ ആവാസവ്യവസ്ഥയെ കൂടുതല്‍ സുരക്ഷിതമാക്കാന്‍ ഈ നീക്കം സഹായിക്കും.