ആരോഗ്യ സംവിധാന നവീകരണം; കേരളത്തിന് ലോകബാങ്ക് വായ്പ
കേരള ഹെല്ത്ത് സിസ്റ്റം ഇംപ്രൂവ്മെന്റ് പ്രോഗ്രാമിനെ പിന്തുണയ്ക്കുന്നതിനാണ് വായ്പ
സംസ്ഥാന ആരോഗ്യ വകുപ്പിന് കീഴിലുള്ള കേരള ഹെല്ത്ത് സിസ്റ്റം ഇംപ്രൂവ്മെന്റ് പ്രോഗ്രാമിനെ പിന്തുണയ്ക്കുന്നതിനായി 400 മില്യണ് യുഎസ് ഡോളറിന്റെ (ഏകദേശം 3,400 കോടി രൂപ) വായ്പയ്ക്ക് ലോകബാങ്ക് അംഗീകാരം നല്കി. ഫണ്ടിന്റെ ഏകദേശം 70 ശതമാനം, അതായത് 280 മില്യണ് യുഎസ് ഡോളര് (2,400 കോടി രൂപ) ലോകബാങ്കില് നിന്നാണ് ലഭിക്കുക, ബാക്കി തുക സംസ്ഥാന സര്ക്കാര് നല്കും.
ലോകബാങ്ക് സാമ്പത്തിക സഹായത്തോടെയുള്ള ഈ പദ്ധതി, കേരളത്തിലെ പൊതുജനാരോഗ്യ സംവിധാനങ്ങളെ ശക്തിപ്പെടുത്തുന്നതിനും അവയുടെ കാര്യക്ഷമത മെച്ചപ്പെടുത്തുന്നതിനും ലക്ഷ്യമിടുന്നുവെന്ന് ഔദ്യോഗിക പ്രസ്താവനയില് പറയുന്നു.
ഇതില് 70 ശതമാനം (280 മില്യണ് ഡോളര് അല്ലെങ്കില് ഏകദേശം 2,400 കോടി രൂപ) ലോകബാങ്കും ബാക്കി സംസ്ഥാന സര്ക്കാരും നല്കും.
2023-ല് പ്രാഥമിക അംഗീകാരം ലഭിച്ച ശേഷം കേരളം വിശദമായ പദ്ധതി റിപ്പോര്ട്ട് തയ്യാറാക്കി കേന്ദ്രത്തിന് സമര്പ്പിച്ചു. സംസ്ഥാനവും ബാങ്കും തമ്മിലുള്ള നിരവധി ചര്ച്ചകള്ക്ക് ശേഷം ലോകബാങ്കിന്റെ ജനറല് ബോഡി അന്തിമ വായ്പക്ക് അനുമതി നല്കി.
സംസ്ഥാനത്തിന്റെ ആരോഗ്യ മേഖലയില് വലിയ വികസനങ്ങള് കൊണ്ടുവരുന്നതാണ് പദ്ധതിയെന്ന് ആരോഗ്യ മന്ത്രി വീണ ജോര്ജ് പറഞ്ഞു.
പ്രോഗ്രാം ഫോര് റിസള്ട്ട്സ് മാതൃകയില് രൂപകല്പ്പന ചെയ്ത ഈ സംരംഭം, ഉയര്ന്ന ജീവിത നിലവാരവും ദീര്ഘായുസും ഉറപ്പാക്കുകയും, തടയാവുന്ന രോഗങ്ങള്, അപകടങ്ങള്, അകാല മരണങ്ങള് എന്നിവയില് നിന്ന് മുക്തമായ ജീവിതം നയിക്കാന് ആളുകളെ സഹായിക്കുകയും ചെയ്യുക എന്നതാണ് ലക്ഷ്യമിടുന്നത്.
കാലാവസ്ഥാ വ്യതിയാനം മൂലമുണ്ടാകുന്ന വെല്ലുവിളികള് ഉള്പ്പെടെ ഉയര്ന്നുവരുന്ന വെല്ലുവിളികളോട് കൂടുതല് ഫലപ്രദമായി പ്രതികരിക്കുന്നതിന് വിവിധ വകുപ്പുകളെ ഈ പരിപാടി ഒരുമിച്ച് കൊണ്ടുവരും.
ആംബുലന്സുകളും ട്രോമ രജിസ്ട്രികളും ഉള്ള കാര്യക്ഷമമായ 24/7 ശൃംഖലയിലൂടെ, സാംക്രമികേതര രോഗങ്ങള് തടയുന്നതിനും, പുതിയ ആരോഗ്യ ഭീഷണികള്ക്കുള്ള തയ്യാറെടുപ്പ് വര്ദ്ധിപ്പിക്കുന്നതിനും, അടിയന്തര, ട്രോമ കെയര് സേവനങ്ങള് ശക്തിപ്പെടുത്തുന്നതിനുമായി ശക്തമായ ഒരു ആവാസവ്യവസ്ഥ വികസിപ്പിക്കാനും ഇത് ശ്രമിക്കുന്നു.
വിഭവ ശേഷി വികസിപ്പിക്കുക, ഡിജിറ്റല് ആരോഗ്യ ആപ്ലിക്കേഷനുകള് മെച്ചപ്പെടുത്തുക, ആരോഗ്യത്തിനായുള്ള പൊതു ചെലവ് വര്ദ്ധിപ്പിക്കുക എന്നിവയില് പദ്ധതി ശ്രദ്ധ കേന്ദ്രീകരിക്കും. തദ്ദേശ സ്വയംഭരണ സ്ഥാപനങ്ങള്ക്കും വലിയ പങ്കു വഹിക്കാന് കഴിയും, പ്രത്യേകിച്ച് വയോജന പരിചരണത്തില്.
2030-ല് ഐക്യരാഷ്ട്രസഭ നിശ്ചയിച്ചിട്ടുള്ള സുസ്ഥിര വികസന ലക്ഷ്യങ്ങളെ മറികടന്നുകൊണ്ട്, പൊതുജനാരോഗ്യത്തില്, പ്രത്യേകിച്ച് മാതൃ-ശിശു ആരോഗ്യത്തില്, കേരളം ഇതിനകം ശ്രദ്ധേയമായ പുരോഗതി കൈവരിച്ചിട്ടുണ്ട്.
എങ്കിലും, സംസ്ഥാനം പുതിയ ആരോഗ്യ വെല്ലുവിളികള്, പരിമിതമായ പൊതുജനാരോഗ്യ ധനസഹായം, സാംക്രമികേതര രോഗങ്ങള് എന്നിവ തുടര്ന്നും നേരിടുന്നുണ്ട്.