ബഹ്‌റിന്‍ ഗോള്‍ഡന്‍ വിസയ്ക്ക് അപേക്ഷിക്കണോ? നിക്ഷേപ പരിധി കുറച്ചു

ബഹ്റിന്‍ ഗോള്‍ഡന്‍ റെസിഡന്‍സി വിസയ്ക്ക് ആവശ്യമായ ഏറ്റവും കുറഞ്ഞ റിയല്‍ എസ്റ്റേറ്റ് നിക്ഷേപം 2,00,000 ബഹ്‌റിന്‍ ദിനാറില്‍ നിന്ന് 1,30,000 ബഹ്റിന്‍ ദിനാറായി കുറച്ചു. വിദേശ നിക്ഷേപകര്‍ക്ക് വിസ കൂടുതല്‍ ആക്സസ് ചെയ്യുന്നതിനാണ് പരിധി ഗണ്യമായി കുറച്ചത്. 2022 ല്‍ അവതരിപ്പിച്ച ഈ വിസ, തൊഴില്‍ അവകാശങ്ങളും കുടുംബ പുനരേകീകരണവും ഉള്ള 10 വര്‍ഷത്തെ പുതുക്കാവുന്ന താമസ സൗകര്യം വാഗ്ദാനം ചെയ്യുന്നു. ഏറ്റവും പുതിയ മാറ്റം റിയല്‍ എസ്റ്റേറ്റ് ഡിമാന്‍ഡിനെ പിന്തുണയ്ക്കുകയും ദീര്‍ഘകാല റെസിഡന്‍സി, ബിസിനസ് ഹബ് എന്ന നിലയില്‍ രാജ്യത്തിന്റെ ആകര്‍ഷണം ശക്തിപ്പെടുത്തുകയും ചെയ്യുമെന്ന് നാഷണാലിറ്റി, പാസ്പോര്‍ട്ട്‌സ് ആന്‍ഡ് റെസിഡന്‍സ് അഫയേഴ്സ് പറഞ്ഞു.

ബഹ്റിനില്‍ അഞ്ച് വര്‍ഷത്തെ സേവനമുള്ള പ്രതിമാസം കുറഞ്ഞത് 2,000 ബഹ്‌റിന്‍ ദിനാര്‍ വരുമാനം നേടുന്ന പ്രൊഫഷണലുകള്‍, 2,000 ബഹ്‌റിന്‍ ദിനാറില്‍ കൂടുതല്‍ പെന്‍ഷനുള്ള വിരമിച്ചവര്‍, 4,000 ബഹ്‌റിന്‍ ദിനാറില്‍ കൂടുതല്‍ പെന്‍ഷനുള്ള നോണ്‍-റസിഡന്റ് വിരമിച്ചവര്‍, സംരംഭകര്‍, ഉയര്‍ന്ന വൈദഗ്ധ്യമുള്ള പ്രൊഫഷണലുകള്‍, ദേശീയ സമ്പദ്വ്യവസ്ഥയ്ക്കോ സമൂഹത്തിനോ സംഭാവന നല്‍കുന്നവര്‍ എന്നിവര്‍ക്കാണ് ഗോള്‍ഡന്‍ റെസിഡന്‍സി വിസ ലഭ്യമാകുന്നത്.

ഗോള്‍ഡന്‍ വിസ ഉടമകള്‍ക്ക് ആജീവനാന്ത താമസം, ജോലി ചെയ്യാനുള്ള സൗകര്യം, പരിധിയില്ലാത്ത പ്രവേശനം, പൂര്‍ണ്ണ ബിസിനസ്സ് ഉടമസ്ഥാവകാശം, കുടുംബ സ്‌പോണ്‍സര്‍ഷിപ്പ് ആനുകൂല്യങ്ങള്‍ എന്നിവ ലഭിക്കും.

അപേക്ഷകര്‍ സാധുവായ പാസ്പോര്‍ട്ട്, ആറ് മാസത്തെ ബാങ്ക് സ്റ്റേറ്റ്മെന്റുകള്‍, ആരോഗ്യ ഇന്‍ഷുറന്‍സ്, താമസ തെളിവ് എന്നിവ എന്‍പിആര്‍എ പോര്‍ട്ടല്‍ വഴി സമര്‍പ്പിക്കണം.