വാണിജ്യ,വ്യവസായ മന്ത്രി പിയൂഷ് ഗോയല് ഇസ്രയേലിലേക്ക്
ഇന്ത്യ-ഇസ്രയേല് സ്വതന്ത്ര വ്യാപാര കരാര് ചര്ച്ചകള്ക്ക് ഗോയല് നേതൃത്വം നല്കും
ഇസ്രായേലിന്റെ സാമ്പത്തിക, വ്യവസായ മന്ത്രി നിര് ബര്ക്കത്തിന്റെ ക്ഷണപ്രകാരമാണ് പീയൂഷ് ഗോയല് ഇസ്രയേല് സന്ദര്ശിക്കുന്നത്. നവംബര് 20 മുതല് 22 വരെയാണ് ഗോയലിന്റെ ഇസ്രയേല് സന്ദര്ശനമെന്ന് വ്യവസായ വാണിജ്യ മന്ത്രാലയം അറിയിച്ചു.
സിഐഐ, എഫ്ഐസിസിഐ, അസോചം, സ്റ്റാര്ട്ട്-അപ്പ് ഇന്ത്യ എന്നിവയെ പ്രതിനിധീകരിക്കുന്ന 60 അംഗ ഉന്നതതല ബിസിനസ് പ്രതിനിധി സംഘവും ഗോയലിനെ അനുഗമിക്കും. ഇസ്രായേലുമായുള്ള വാണിജ്യ ബന്ധം ഊട്ടിഉറപ്പിക്കുകയാണ് ഇന്ത്യയുടെ ലക്ഷ്യം. ഇസ്രായേലിലെ മുതിര്ന്ന നേതാക്കളുമായി ഗോയല് ഉഭയകക്ഷി കൂടിക്കാഴ്ചകള് നടത്തും.
വ്യാപാര, നിക്ഷേപ ബന്ധങ്ങള് ശക്തിപ്പെടുത്തുന്നതും കൃഷി, ജല മാനേജ്മെന്റ്, പ്രതിരോധം, വളര്ന്നുവരുന്ന സാങ്കേതികവിദ്യകള്, ലൈഫ് സയന്സസ്, അടിസ്ഥാന സൗകര്യങ്ങള്, നൂതന ഉല്പ്പാദനം തുടങ്ങിയ മേഖലകളിലെ സഹകരണം വര്ദ്ധിപ്പിക്കുന്നതും ചര്ച്ചകളില് ഉള്പ്പെടുമെന്ന് പ്രതീക്ഷിക്കുന്നു. നിര്ദ്ദിഷ്ട ഇന്ത്യ-ഇസ്രായേല് സ്വതന്ത്ര വ്യാപാര കരാറിന്റെ (എഫ്ടിഎ) പുരോഗതി ഇരുപക്ഷവും അവലോകനം ചെയ്യാന് സാധ്യതയുണ്ട്.
സന്ദര്ശനത്തിന്റെ ഒരു പ്രധാന ആകര്ഷണം ഇന്ത്യ-ഇസ്രായേല് ബിസിനസ് ഫോറമായിരിക്കും. ഇരു രാജ്യങ്ങളിലെയും പ്രമുഖ ബിസിനസ് അസോസിയേഷനുകളെയും വ്യവസായ പ്രതിനിധികളെയും ഒരുമിച്ച് കൊണ്ടുവരും. പങ്കാളിത്തം വികസിപ്പിക്കുക, നിക്ഷേപം പ്രോത്സാഹിപ്പിക്കുക, മുന്ഗണനാ മേഖലകളിലെ സംയുക്ത സംരംഭങ്ങള്ക്കുള്ള അവസരങ്ങള് എന്നിവ ലക്ഷ്യമിട്ടുള്ള പ്ലീനറി സെഷനുകള്, മേഖലാ ചര്ച്ചകള്, ഘടനാപരമായ ബി2ബി ഇടപെടലുകള് എന്നിവ ഫോറത്തില് ഉള്പ്പെടും. ഇന്ത്യയിലെയും ഇസ്രായേലിലെയും പ്രമുഖ കോര്പ്പറേറ്റ് നേതാക്കളുടെ പങ്കാളിത്തത്തോടെ ഉന്നതതല സിഇഒ ഫോറത്തിന്റെ നാലാം പതിപ്പും ചേരും.
കൃഷി, ഉപ്പുവെള്ളം നീക്കം ചെയ്യല്, മാലിന്യ നിര്മാര്ജനം, സൈബര് സുരക്ഷ, സ്മാര്ട്ട് മൊബിലിറ്റി, അടിസ്ഥാന സൗകര്യങ്ങള് എന്നിവയില് പ്രവര്ത്തിക്കുന്ന പ്രധാന ഇസ്രായേലി കമ്പനികളിലെ ഉന്നത എക്സിക്യൂട്ടീവുകളെ ഗോയല് കാണുമെന്ന് പ്രതീക്ഷിക്കുന്നു.
ഇന്ത്യന് വംശജരായ ബിസിനസ്സ് നേതാക്കളുമായും ഇന്ത്യന് പ്രവാസികളുമായും കൂടിക്കാഴ്ചകള് ഉള്പ്പെടെയുള്ള സാംസ്കാരിക, സമൂഹ ഇടപെടലുകളും അദ്ദേഹത്തിന്റെ യാത്രാ പരിപാടിയില് ഉള്പ്പെടുന്നു.