കേരള കമ്പനികൾ ഇന്ന്: 52 ആഴ്ച്ചയിലെ ഉയർന്ന വിലയിൽ മുത്തൂറ്റ്:

നവംബർ മാസാവസാനത്തെ വ്യാപാരം അവസാനിച്ചപ്പോൾ കേരള ആസ്ഥാനമായി പ്രവർത്തിക്കുന്ന അഞ്ചു കമ്പനികളുടെ ഓഹരികൾ 52 ആഴ്ച്ചയിലെ ഉയർന്ന വില തൊട്ടു. അതിൽ കേരള ആയുർവേദയും വെസ്റ്റേൺ ഇന്ത്യ പ്ലൈവുഡ്‌സ് ഓഹരികളും എക്കാലത്തെയും ഉയർന്ന വിലയിലുമെത്തി.

വ്യാപാരമധ്യേ കേരള ആയുർവേദ ഓഹരികൾ എക്കാലത്തെയും ഉയർന്ന വിലയായ 280.55 രൂപ തൊട്ടു. ഓഹരികൾ വ്യാപാരവസാനം മുൻ ദിവസത്തെ ക്ലോസിങ് വിലയിൽ നിന്നും 4.79 ശതമാനം ഉയർന്ന് 280 രൂപയിൽ ക്ലോസ് ചെയ്തു.

മുത്തൂറ്റ് ഫൈനാൻസ് ഓഹരികൾ വ്യാപാരമധ്യേ 52 ആഴ്ച്ചയിലെ ഉയർന്ന വിലയായ 1506.5 രൂപ തൊട്ടു. ഓഹരികൾ മുൻ ദിവസത്തെ ക്ലോസിങ് വിലയിൽ നിന്നും 4.67 ശതമാനം ഉയർന്ന് 1481.9 രൂപയിൽ വ്യാപാരം അവസാനിപ്പിച്ചു. മണപ്പുറം ഫൈനാൻസ് ഓഹരികൾ ഇടവ്യപാരത്തിൽ 52 ആഴ്ച്ചയിലെ ഉയർന്ന വിലയായ 166.65 രൂപയിലെത്തി. വ്യാപാരവസാനം ഓഹരികൾ 1.51 ശതമാനം നേട്ടം നൽകി 164.5 രൂപയിൽ ക്ലോസ് ചെയ്തു. ഫിലിപ്സ് കാർബൺ ഓഹരികളും ഇന്നത്തെ വ്യപാരത്തിൽ 52 ആഴ്ച്ചയിലെ ഉയർന്ന വിലയായ 278 രൂപയിലെത്തി. ഓഹരികൾ 2.03 ശതമാനം ഉയർന്ന് 271.85 രൂപയിൽ വ്യാപാരം നിർത്തി.

ബാങ്കിങ് മേഖലയിൽ നിന്നും സിഎസ്ബി ബാങ്ക് 1.66 ശതമാനവും സൗത്ത് ഇന്ത്യൻ ബാങ്ക് 0.81 ശതമാനവും ഉയർന്നപ്പോൾ ഇസാഫ് സ്‌മോൾ ഫൈനാൻസ് ബാങ്ക്, ധനലക്ഷ്മി ബാങ്ക്, ഫെഡറൽ ബാങ്ക് എന്നിവയുടെ ഓഹരികൾ ഇടിവിൽ വ്യാപാരം അവസാനിപ്പിച്ചു.

നേട്ടം തുടർന്ന് കൊച്ചിൻ ഷിപ്യാർഡ് ഓഹരികൾ. ഇന്നലെ 2.77 ശതമാനം ഉയർന്ന ഓഹരികൾ ഇന്നും 3.48 ശതമാനം ഉയർന്നാണ് വ്യാപാരം നിർത്തിയത്. ക്ലോസിങ് വില 1204.6 രൂപ.

കരകയറാതെ ഫാക്ട് ഓഹരികൾ. കഴിഞ്ഞ അഞ്ചു ദിവസത്തിൽ ഓഹരികൾ 1.49 ശതമാനത്തിന്റെ ഇടിവാണ് രേഖപ്പെടുത്തിയത്. ഒരു മാസത്തിൽ ഓഹരികൾ ഇടിഞ്ഞത് 4.72 ശതമാനം. ഇന്നത്തെ വ്യപാരവസാനം ഓഹരികൾ 1.03 ശതമാനം താഴ്ന്ന 709.05 രൂപയിൽ ക്ലോസ് ചെയ്തു.