party Donations Plunge: കോൺഗ്രസിന് വൻ സാമ്പത്തിക തിരിച്ചടി; സംഭാവനയിൽ 75% ഇടിവ്! ഫണ്ടിങ്ങിൽ ബിജെപി ബഹുദൂരം മുന്നിൽ

കോൺഗ്രസിന് സംഭാവനയിൽ വൻ ഇടിവ്. കഴിഞ്ഞ പത്ത് വർഷത്തിനിടയിലെ ഏറ്റവും വലിയ തകർച്ചയാണ് 2025-26 സാമ്പത്തിക വർഷത്തിൽ പാർട്ടി നേരിട്ടത്. 20,000 രൂപയ്ക്ക് മുകളിലുള്ള സംഭാവനകളിൽ 75 ശതമാനത്തിന്റെ കുറവാണ് രേഖപ്പെടുത്തിയിരിക്കുന്നത്. തെരഞ്ഞെടുപ്പ് കമ്മീഷന് സമർപ്പിച്ച സംഭാവനാ റിപ്പോർട്ടിലാണ് ഇക്കാര്യം വ്യക്തമാകുന്നത്.

2025-26 സാമ്പത്തിക വർഷത്തിൽ 20,000 രൂപയ്ക്ക് മുകളിലുള്ള സംഭാവനകളിലൂടെ കോൺഗ്രസിന് സമാഹരിക്കാനായത് 130.69 കോടി രൂപ മാത്രമാണ്. എന്നാൽ, 2023-24 സാമ്പത്തിക വർഷത്തിൽ ഇത് 517.39 കോടി രൂപയായിരുന്നു. അതായത്, രണ്ട് വർഷത്തിനിടെ സംഭാവനാ വരുമാനത്തിൽ വലിയ ഇടിവാണ് ഉണ്ടായിരിക്കുന്നത്.

2024ലെ ലോക്സഭാ തെരഞ്ഞെടുപ്പ് നടന്ന സാമ്പത്തിക വർഷമായതിനാൽ 2023-24ൽ കോൺഗ്രസിന് ലഭിച്ച സംഭാവനകളിൽ വലിയ വർധനവുണ്ടായിരുന്നു. അതിന് മുൻപുള്ള 2022-23 സാമ്പത്തിക വർഷത്തിൽ 281.48 കോടി രൂപയായിരുന്നു പാർട്ടിക്ക് ലഭിച്ച സംഭാവന.

അതേസമയം, ഭരണകക്ഷിയായ ബിജെപിയുമായി താരതമ്യം ചെയ്യുമ്പോൾ കോൺഗ്രസിന്റെ സംഭാവനാ വരുമാനത്തിലെ അന്തരം വളരെ വലുതാണ്. 2024-25 സാമ്പത്തിക വർഷത്തിൽ ബിജെപിക്ക് 20,000 രൂപയ്ക്ക് മുകളിലുള്ള സംഭാവനയായി ലഭിച്ചത് 6,074.02 കോടി രൂപയാണ്. ഇതേ കാലയളവിൽ കോൺഗ്രസിന് ലഭിച്ച തുകയേക്കാൾ ഏകദേശം 12 മടങ്ങ് കൂടുതലാണിത്.

പ്രുഡന്റ് ഇലക്ടറൽ ട്രസ്റ്റിൽ നിന്നുള്ള സംഭാവന കുറഞ്ഞതാണ് കോൺഗ്രസിന്റെ വരുമാന ഇടിവിന് പ്രധാന കാരണങ്ങളിലൊന്ന്. 2024-25ൽ ഈ ട്രസ്റ്റിൽ നിന്ന് 216.34 കോടി രൂപ ലഭിച്ചിരുന്നെങ്കിൽ 2025-26ൽ അത് 25 കോടി രൂപയായി കുറഞ്ഞു. ഏകദേശം 88 ശതമാനത്തിന്റെ ഇടിവാണ് രേഖപ്പെടുത്തിയത്. സ്റ്റാർ സിമന്റ് അഞ്ച് കോടി രൂപയും സജ്ജൻ ഭജൻക നാല് കോടി രൂപയും പ്രേം കുമാർ ഭജൻക രണ്ട് കോടി രൂപയും കോൺഗ്രസിന് സംഭാവന നൽകിയിട്ടുണ്ട്.

എന്നാൽ, ഈ കണക്കുകൾ പാർട്ടിയുടെ ആകെ വരുമാനത്തെ പ്രതിനിധീകരിക്കുന്നില്ല. ചെറിയ സംഭാവനകൾ, അംഗത്വ ഫീസ്, കൂപ്പൺ പിരിവ്, നിക്ഷേപങ്ങളിൽ നിന്നുള്ള പലിശ എന്നിവയും വരുമാനത്തിന്റെ ഭാഗമാണ്.

2025-26 സാമ്പത്തിക വർഷത്തെ ബിജെപിയുടെ സംഭാവനാ റിപ്പോർട്ടും കോൺഗ്രസിന്റെ ഓഡിറ്റ് ചെയ്ത സാമ്പത്തിക കണക്കുകളും തെരഞ്ഞെടുപ്പ് കമ്മീഷൻ ഇതുവരെ പുറത്തുവിട്ടിട്ടില്ല. ഈ കണക്കുകൾ കൂടി പുറത്തുവരുന്നതോടെ രാജ്യത്തെ പ്രധാന രാഷ്ട്രീയ പാർട്ടികളുടെ സാമ്പത്തിക സ്ഥിതിയെക്കുറിച്ച് കൂടുതൽ വ്യക്തത ലഭിക്കും.