ഡൽഹി മെട്രോ സർവീസുകൾ പുനരാരംഭിച്ചു

സിജെപിയുടെ പ്രതിഷേധ പ്രകടനങ്ങളെ തുടർന്ന് ഡൽഹിയിൽ നിർത്തി വെച്ചിരുന്ന മെട്രോ സർവീസുകൾ പുനരാരംഭിച്ചു. ഡൽഹി മെട്രോ പൂർണമായും തുറന്നു. ധർമ്മേന്ദ്ര പ്രധാന്റെ രാജി ഉൾപ്പെടെയുള്ള കോക്രോച്ച് ജനതാ പാർട്ടിയുടെ പ്രധാന ആവശ്യങ്ങൾ കേന്ദ്രം അംഗീകരിച്ചതോടെ സമരക്കാർ പിൻമാറിയതിനാൽ ഇൻ്റർനെറ്റ് സംവിധാനങ്ങളും പുനസ്ഥാപിച്ചു. യുവാക്കളുടെ നേതൃത്വത്തിലുള്ള പ്രതിഷേധങ്ങൾക്കിടയിൽ നിരവധി ദിവസങ്ങളായി ഡൽഹിയിൽ ഇന്റർനെറ്റ് നിയന്ത്രണങ്ങൾ നിലവിലുണ്ടായിരുന്നു.

പരീക്ഷാ പേപ്പർ ചോർച്ചയെച്ചൊല്ലി ആഴ്ചകളായി നടന്ന പ്രതിഷേധങ്ങൾക്ക് ശേഷമാണ് കോക്രോച്ച് ജനതാ പാർട്ടിയുടെ പ്രധാന ആവശ്യങ്ങൾ കേന്ദ്രം അംഗീകരിച്ചത്. സിജെപി പ്രതിനിധികളും കേന്ദ്രമന്ത്രിമാരായ ജെപി നദ്ദയും ജിതേന്ദ്ര സിങ്ങും തമ്മിലുള്ള മൂന്നാം റൗണ്ട് ചർച്ചകൾക്ക് ശേഷമാണ് കേന്ദ്ര സർക്കാർ അയഞ്ഞത്. പ്രതിഷേധം കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാന്റെ രാജിയിലേക്ക് നയിച്ചു. പ്രതിഷേധക്കാർക്കെതിരായ പോലീസ് കേസുകൾ പിൻവലിക്കൽ, ആത്മഹത്യ ചെയ്ത വിദ്യാർത്ഥികളുടെ കുടുംബങ്ങൾക്ക് നഷ്ടപരിഹാരം എന്നീ നിബന്ധനകളും സർക്കാർ അംഗീകരിച്ചു.

ധർമ്മേന്ദ്ര പ്രധാന്റെ രാജിക്ക് സമാജ്‌വാദി പാർട്ടി മേധാവി അഖിലേഷ് യാദവ്, എംപി ഡിംപിൾ യാദവ്, കോൺഗ്രസ് നേതാവ് രാഹുൽ ഗാന്ധി, ആക്ടിവിസ്റ്റ് സോനം വാങ്ചുക്ക് എന്നിവർക്ക് നന്ദി പറയുന്ന സിജെപിയുടെ പോസ്റ്ററുകൾ ഞായറാഴ്ച സമാജ്‌വാദി പാർട്ടിയുടെയും കോൺഗ്രസ് ഓഫീസുകളുടെയും പുറത്ത് സ്ഥാപിച്ചിരുന്നു.