Login 
പഠിക്കാം & സമ്പാദിക്കാം 
Home
5 Nov 2026 1:14 PM IST
Summary
ഇന്ത്യയില്‍ 'എനര്‍ജി ഡ്രിങ്ക്' എന്ന വിഭാഗത്തിന് ഔദ്യോഗിക മാനദണ്ഡങ്ങള്‍ ഇതുവരെ നിശ്ചയിച്ചിട്ടില്ലെന്നും, അതിനാല്‍ ഈ പേര് തെറ്റിദ്ധരിപ്പിക്കുന്ന ബ്രാന്‍ഡിംഗിന് വഴിവെക്കുമെന്നും എഫ്എസ്എസ്എഐ
ഉയര്‍ന്ന കഫീന്‍ അടങ്ങിയ പാനീയങ്ങളെ 'എനര്‍ജി ഡ്രിങ്ക്' എന്ന് വിളിച്ച് വില്‍ക്കുന്നത് ഉപഭോക്താക്കളെ തെറ്റിദ്ധരിപ്പിക്കുമെന്ന് ഭക്ഷ്യ സുരക്ഷാ റെഗുലേറ്റര്‍ എഫ്എസ്എസ്എഐ. സ്റ്റിംഗ് എനര്‍ജി, അഡ്രിനാലിന്‍ റഷ് തുടങ്ങിയ ഉല്‍പ്പന്നങ്ങള്‍ മനഃപൂര്‍വ്വം എനര്‍ജി ഡ്രിങ്കുകളായി വിപണനം ചെയ്യുകയാണെന്ന് പെപ്‌സികോയ്‌ക്കെതിരെ അതോറിറ്റി ആരോപിച്ചു. ഇന്ത്യയില്‍ 'എനര്‍ജി ഡ്രിങ്ക്' എന്ന വിഭാഗത്തിന് ഔദ്യോഗിക മാനദണ്ഡങ്ങള്‍ ഇതുവരെ നിശ്ചയിച്ചിട്ടില്ലെന്നും, അതിനാല്‍ ഈ പേര് തെറ്റിദ്ധരിപ്പിക്കുന്ന ബ്രാന്‍ഡിംഗിന് വഴിവെക്കുമെന്നും റെഗുലേറ്റര്‍ ഡല്‍ഹി ഹൈക്കോടതിയില്‍ വാദിച്ചു.
ജൂണ്‍ 30-ന് പെപ്‌സികോയ്ക്ക് നല്‍കിയ നിര്‍ദ്ദേശത്തില്‍, ഏതെങ്കിലും ഭക്ഷ്യ ഉല്‍പ്പന്നത്തിന്റെ പേരിലോ വിവരണത്തിലോ എനര്‍ജി ഡ്രിങ്ക് എന്ന പദം ഉപയോഗിക്കരുതെന്ന് എഫ്എസ്എസ്എഐ ആവശ്യപ്പെട്ടിരുന്നു. 'ശരീരത്തിനും മനസ്സിനും ഉന്മേഷം നല്‍കുന്നു', 'പൊതുവായ ബലഹീനതയെ സഹായിക്കുന്നു' തുടങ്ങിയ പരസ്യ അവകാശവാദങ്ങളും തെറ്റിദ്ധരിപ്പിക്കുന്നതാണെന്ന് റെഗുലേറ്റര്‍ ചൂണ്ടിക്കാട്ടി. എനര്‍ജി എന്ന പദം ഉള്‍പ്പെടുത്തിയ ലേബലുകളും പരസ്യങ്ങളും 90 ദിവസത്തിനുള്ളില്‍ പിന്‍വലിക്കണമെന്നും നിര്‍ദ്ദേശത്തില്‍ പറഞ്ഞിരുന്നു.
എന്നാല്‍ നിയന്ത്രണം ഏര്‍പ്പെടുത്തും മുമ്പ് കമ്പനികള്‍ക്ക് മുന്‍കൂര്‍ അറിയിപ്പോ അഭിപ്രായം പറയാനുള്ള അവസരമോ നല്‍കിയില്ലെന്ന് ചൂണ്ടിക്കാട്ടി പെപ്‌സികോയും മോണ്‍സ്റ്റര്‍ ബിവറേജും കോടതിയെ സമീപിച്ചു. റെഡ് ബുള്‍, ഹെല്‍ എനര്‍ജി, റിലയന്‍സ് കണ്‍സ്യൂമര്‍ എന്നിവരും ഈ നിയമപോരാട്ടത്തില്‍ പങ്കാളികളാണ്. കോടതി എഫ്എസ്എസ്എഐ ഉത്തരവ് താല്‍ക്കാലികമായി സ്റ്റേ ചെയ്‌തെങ്കിലും, പുതിയ ബാച്ചുകളില്‍ എനര്‍ജി ഡ്രിങ്ക് ലേബല്‍ ഉപയോഗിക്കുന്നത് തടഞ്ഞു. നിലവിലുള്ള സ്റ്റോക്ക് വില്‍ക്കാന്‍ അനുമതി നല്‍കി.
കഫീന്‍, പഞ്ചസാര, ടോറിന്‍ എന്നിവയുടെ അമിത ഉപഭോഗം പ്രത്യേകിച്ച് കുട്ടികള്‍ക്ക് ആരോഗ്യപരമായ അപകടം സൃഷ്ടിക്കുമെന്നതാണ് എഫ്എസ്എസ്എഐയുടെ പ്രധാന ആശങ്ക. പാക്കേജിംഗ് നഷ്ടവും വാണിജ്യ ബുദ്ധിമുട്ടുകളും പരിഗണിക്കാന്‍ പെപ്‌സികോ ആവശ്യപ്പെട്ടപ്പോള്‍, പൊതുജനാരോഗ്യത്തിനാണ് മുന്‍ഗണന നല്‍കേണ്ടതെന്ന് റെഗുലേറ്റര്‍ വ്യക്തമാക്കി. 2028-ആകുമ്പോഴേക്കും ഇന്ത്യയിലെ എനര്‍ജി ഡ്രിങ്ക് വിപണി 1.6 ബില്യണ്‍ ഡോളറിലെത്തുമെന്ന കണക്കും ഈ തീരുമാനത്തിന്റെ വ്യാപാര-ആരോഗ്യ പ്രാധാന്യം വര്‍ദ്ധിപ്പിക്കുന്നു.