Login 
പഠിക്കാം & സമ്പാദിക്കാം 
Home
27 Oct 2026 2:52 PM IST
Summary
ഈ കണക്കുകള്‍ മാത്രം അടിസ്ഥാനമാക്കി ദീര്‍ഘകാല നിക്ഷേപ പ്രവണതയെക്കുറിച്ച് നിഗമനത്തിലെത്തരുതെന്ന് സാമ്പത്തിക വിദഗ്ധര്‍
കേരളത്തിന്റെ നിക്ഷേപ മേഖലയ്ക്ക് പ്രതീക്ഷ പകര്‍ന്ന് വിദേശ നിക്ഷേപത്തില്‍ വന്‍ വര്‍ധന. ഡിപ്പാര്‍ട്ട്മെന്റ് ഫോര്‍ പ്രൊമോഷന്‍ ഓഫ് ഇന്‍ഡസ്ട്രി ആന്‍ഡ് ഇന്റേണല്‍ ട്രേഡ് (DPIIT) പുറത്തുവിട്ട കണക്കുകള്‍ പ്രകാരം 2026 ഏപ്രില്‍ മുതല്‍ ജൂണ്‍ വരെയുള്ള മൂന്ന് മാസത്തിനിടെ സംസ്ഥാനത്ത് 4,646 കോടി രൂപയുടെ വിദേശ ഓഹരി നിക്ഷേപമാണ് എത്തിയത്. കഴിഞ്ഞ വര്‍ഷം ഇതേ കാലയളവില്‍ ലഭിച്ച 1,624 കോടി രൂപയുമായി താരതമ്യം ചെയ്യുമ്പോള്‍ ഏകദേശം മൂന്നിരട്ടിയാണ് ഇത്തവണത്തെ വര്‍ധന.
സംസ്ഥാനത്തിന്റെ വ്യവസായ-നിക്ഷേപ മേഖലയ്ക്ക് നിര്‍ണായകമായ മുന്നേറ്റമായാണ് ഈ കണക്കുകള്‍ വിലയിരുത്തപ്പെടുന്നത്. 2026-27 സാമ്പത്തിക വര്‍ഷത്തിന്റെ ആദ്യ പാദത്തിലെ വിദേശ ഓഹരി നിക്ഷേപം കഴിഞ്ഞ രണ്ട് സാമ്പത്തിക വര്‍ഷങ്ങളിലെയും വാര്‍ഷിക നിക്ഷേപത്തേക്കാള്‍ കൂടുതലാണ്.
2025-26 സാമ്പത്തിക വര്‍ഷത്തില്‍ കേരളത്തിന് ലഭിച്ച വിദേശ ഓഹരി നിക്ഷേപം 3,281 കോടി രൂപയായിരുന്നു. 2024-25 സാമ്പത്തിക വര്‍ഷത്തില്‍ ഇത് 3,330 കോടി രൂപയും. ഈ സാഹചര്യത്തില്‍ വെറും മൂന്ന് മാസംകൊണ്ട് 4,646 കോടി രൂപയുടെ നിക്ഷേപം ലഭിച്ചത് ശ്രദ്ധേയമാണ്.
രാജ്യത്തെ മൊത്തം വിദേശ ഓഹരി നിക്ഷേപത്തില്‍ കേരളത്തിന്റെ വിഹിതവും ഉയര്‍ന്നിട്ടുണ്ട്. കഴിഞ്ഞ വര്‍ഷം ഇതേ പാദത്തില്‍ 1.02 ശതമാനമായിരുന്ന വിഹിതം ഇത്തവണ 2.49 ശതമാനമായി വര്‍ധിച്ചു. സംസ്ഥാനങ്ങളുടെ പട്ടികയില്‍ കേരളം എട്ടാം സ്ഥാനത്തുമെത്തി.
തുറമുഖങ്ങള്‍, വ്യോമയാനം, ടൂറിസം, സാംസ്‌കാരിക മേഖല, ആരോഗ്യരംഗം തുടങ്ങിയ മുന്‍ഗണനാ മേഖലകളില്‍ നിക്ഷേപകരുടെ താല്‍പര്യം വര്‍ധിക്കുന്നുണ്ടെന്ന് മുഖ്യമന്ത്രിയുടെ സെക്രട്ടറി രത്തന്‍ കേല്‍ക്കര്‍ വ്യക്തമാക്കി. എന്നാല്‍ ഏപ്രില്‍-ജൂണ്‍ കാലയളവിലെ നിക്ഷേപങ്ങള്‍ ഏതൊക്കെയാണെന്ന് അദ്ദേഹം വ്യക്തമാക്കിയില്ല.
നിക്ഷേപവുമായി ബന്ധപ്പെട്ട നടപടിക്രമങ്ങള്‍ ലളിതമാക്കുന്നതിനും ദീര്‍ഘകാലമായി നിലനില്‍ക്കുന്ന തടസ്സങ്ങള്‍ പരിഹരിക്കുന്നതിനും നിര്‍ദേശിക്കപ്പെട്ടിട്ടുള്ള സരള്‍ നിയമനിര്‍മാണവും ഭൂമിയുമായി ബന്ധപ്പെട്ട നിയമപരിഷ്‌കാരങ്ങളും സഹായിക്കുമെന്നാണ് പ്രതീക്ഷ.
അതേസമയം, ഒരു പാദത്തിലെ കണക്കുകള്‍ മാത്രം അടിസ്ഥാനമാക്കി ദീര്‍ഘകാല നിക്ഷേപ പ്രവണതയെക്കുറിച്ച് നിഗമനത്തിലെത്തരുതെന്ന മുന്നറിയിപ്പും സാമ്പത്തിക വിദഗ്ധര്‍ മുന്നോട്ടുവെക്കുന്നു. സെന്റര്‍ ഫോര്‍ ഡെവലപ്‌മെന്റ് സ്റ്റഡീസിന്റെ ഡയറക്ടര്‍ സി. വീരമണി, നിക്ഷേപ വര്‍ധനയെ സ്വാഗതം ചെയ്യുമ്പോഴും ഈ പ്രവണത തുടര്‍ച്ചയായി നിലനില്‍ക്കേണ്ടതിന്റെ പ്രാധാന്യം ചൂണ്ടിക്കാട്ടി.
വിദേശ നിക്ഷേപത്തിലെ ഈ മുന്നേറ്റം കേരളത്തിന്റെ വ്യവസായ വളര്‍ച്ചയ്ക്കും തൊഴിലവസരങ്ങള്‍ സൃഷ്ടിക്കുന്നതിനും എത്രത്തോളം സഹായകമാകുമെന്നതാണ് ഇനി ഉറ്റുനോക്കുന്നത്. വരും പാദങ്ങളിലും നിക്ഷേപ ഒഴുക്ക് തുടരുമോ എന്നതാകും സംസ്ഥാനത്തിന്റെ നിക്ഷേപ അന്തരീക്ഷത്തിന്റെ യഥാര്‍ഥ കരുത്ത് വ്യക്തമാക്കുക.