Kochi Metro Last Time :കൊച്ചി മെട്രോയുടെ സമയക്രമത്തിൽ മാറ്റം

ശിവരാത്രിയോട് അനുബന്ധിച്ച് കൊച്ചി മെട്രോയുടെ സമയക്രമത്തിൽ മാറ്റം. ഞായറാഴ്ച രാത്രി 11 .30 വരെ മെട്രോ സർവീസ് നടത്തും. രാത്രി സർവീസിന് പുറമെ പ്രത്യേക പ്രഭാത സർവീസും ഉണ്ടായിരിക്കും. ആലുവ ശിവ ക്ഷേത്രത്തിൽ നടക്കുന്ന ശിവരാത്രി ആഘോഷങ്ങളുടെ ഭാഗമായാണ് സർവീസ് നീട്ടിയത്. നിലവിൽ 10 .30 ആണ് അവസാന ട്രെയിനിൻ്റെ സമയം.

ഭക്തരുടെ സൗകര്യാർത്ഥം ശിവരാത്രി ഉത്സവത്തോടനുബന്ധിച്ച് കെഎംആർഎൽ പ്രത്യേക സർവീസുകളും പ്രഖ്യാപിച്ചിട്ടുണ്ട്. 2026 ഫെബ്രുവരി 15 ഞായറാഴ്ച തൃപ്പൂണിത്തുറ ടെർമിനലിൽ നിന്നുള്ള അവസാന സർവീസ് രാത്രി 11.30 ന് ആയിരിക്കും.

പ്രഭാത സർവീസുകളിൽ മാറ്റം

ഫെബ്രുവരി 16 മുതൽ ആലുവ മെട്രോ സ്റ്റേഷനിൽ നിന്ന് പുലർച്ചെ 4 മണിക്ക് സർവീസുകൾ ആരംഭിച്ച് രാവിലെ 6 മണി വരെ 30 മിനിറ്റ് ഇടവേളകളിൽ സർവീസ് നടത്തും. അതിനുശേഷം, പതിവ് ഷെഡ്യൂൾ അനുസരിച്ചായിരിക്കും ട്രെയിനുകളുടെ പ്രവർത്തന സമയം.

നഗരത്തിലെ ഗതാഗത സംവിധാനങ്ങൾ കാര്യക്ഷമമാക്കുന്നതിനായി കെഎംആർഎൽ ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസുമായി (ഐഐഎസ്‌സി) ഒരു ധാരണാപത്രത്തിൽ ഒപ്പുവെച്ചിട്ടുണ്ട്. മൊബിലിറ്റി പ്ലാനിംഗ്, ഗതാഗത പ്രവർത്തനങ്ങൾ, ആർട്ടിഫിഷ്യൽ ഇന്റലിജൻസ് (എഐ), ഇന്റർനെറ്റ് ഓഫ് തിംഗ്‌സ് (ഐഒടി), ബ്ലോക്ക്‌ചെയിൻ, സിമുലേഷൻ മോഡലിംഗ്, ഇന്റലിജന്റ് ഡിസിഷൻ-സപ്പോർട്ട് സിസ്റ്റങ്ങൾ തുടങ്ങിയ സാങ്കേതികവിദ്യകളിൽ ശ്രദ്ധ കേന്ദ്രീകരിക്കാൻ ഒരുങ്ങുകയാണ് മെട്രോ.