Login 
പഠിക്കാം & സമ്പാദിക്കാം 
Home
9 Nov 2026 4:47 PM IST
kseb news
Summary
സംസ്ഥാനം കടുത്ത വൈദ്യുതി പ്രതിസന്ധിയിലേക്ക് നീങ്ങുകയാണെന്നും അടിയന്തരമായി ഹ്രസ്വകാല വൈദ്യുതി കരാറില്‍ ഏര്‍പ്പെടണമെന്നുമായിരുന്നു മുന്‍ കെഎസ്ഇബി ചെയര്‍മാന്റെ കുറിപ്പ്.
സംസ്ഥാനത്ത് അടുത്ത രണ്ട് മാസത്തേക്ക് വൈദ്യുതി ക്ഷാമമുണ്ടാകില്ലെന്ന് കെഎസ്ഇബി. നിലവിലെ സാഹചര്യത്തില്‍ പുറത്തുനിന്ന് വൈദ്യുതി വാങ്ങേണ്ട ആവശ്യമില്ലെന്നും പുതിയ ഹ്രസ്വകാല കരാറിലേക്ക് തല്‍ക്കാലം കടക്കേണ്ടതില്ലെന്നും കെഎസ്ഇബി മുഖ്യമന്ത്രിയെ അറിയിച്ചതായാണ് റിപ്പോര്‍ട്ട്. ഇതോടെ വിവാദമായ 500 മെഗാവാട്ട് വൈദ്യുതി വാങ്ങാനുള്ള ജിഎന്‍എ കരാര്‍ നീക്കം തല്‍ക്കാലം മരവിച്ചേക്കും.
കെഎസ്ഇബി ചെയര്‍മാന്‍ എന്‍. പ്രശാന്തും ഊര്‍ജ സെക്രട്ടറിയും മുഖ്യമന്ത്രിയെ നേരില്‍ കണ്ടാണ് സംസ്ഥാനത്തെ നിലവിലെ വൈദ്യുതി ലഭ്യതയും ആവശ്യകതയും സംബന്ധിച്ച വിവരങ്ങള്‍ അറിയിച്ചത്. അടുത്ത രണ്ട് മാസത്തേക്ക് വൈദ്യുതി പ്രതിസന്ധിയുണ്ടാകില്ലെന്നാണ് ഇവര്‍ അറിയിച്ചതെന്നാണ് സൂചന. അതിനാല്‍ ജിഎന്‍എ പ്ലാറ്റ്ഫോം വഴി വൈദ്യുതി വാങ്ങാനുള്ള നീക്കം ഇപ്പോള്‍ ആവശ്യമില്ലെന്നാണ് ബോര്‍ഡിന്റെ നിലപാട്.
സംസ്ഥാനം കടുത്ത വൈദ്യുതി പ്രതിസന്ധിയിലേക്ക് നീങ്ങുകയാണെന്നും അടിയന്തരമായി ഹ്രസ്വകാല വൈദ്യുതി കരാറില്‍ ഏര്‍പ്പെടണമെന്നുമായിരുന്നു മുന്‍ കെഎസ്ഇബി ചെയര്‍മാന്‍ എം.ജി. രാജമാണിക്യത്തിന്റെ കുറിപ്പ്. കരാറില്‍ ഉടന്‍ തീരുമാനമെടുത്തില്ലെങ്കില്‍ നവംബര്‍ മുതല്‍ പവര്‍കട്ട് ഏര്‍പ്പെടുത്തേണ്ടിവരുമെന്നും അദ്ദേഹം മുന്നറിയിപ്പ് നല്‍കിയിരുന്നു. ഹിമാചല്‍ പ്രദേശില്‍ നിന്ന് വൈദ്യുതി വാങ്ങാനുള്ള നിര്‍ദേശവും കുറിപ്പിലുണ്ടായിരുന്നു.
ഇതിന് പിന്നാലെയാണ് ജിഎന്‍എ എനര്‍ജി വഴി 500 മെഗാവാട്ട് വൈദ്യുതി വാങ്ങാനുള്ള സര്‍ക്കാര്‍ നീക്കം ചര്‍ച്ചയായത്. സുതാര്യമായ ടെന്‍ഡര്‍ നടപടികളോ സംസ്ഥാന വൈദ്യുതി റെഗുലേറ്ററി കമ്മീഷന്റെ മുന്‍കൂര്‍ അനുമതിയോ ഇല്ലാതെ കരാറുമായി മുന്നോട്ടുപോകുന്നതിനെതിരെ വിമര്‍ശനങ്ങളും ഉയര്‍ന്നിരുന്നു.
പുതിയ കെഎസ്ഇബി ചെയര്‍മാന്റെ വിലയിരുത്തല്‍ മുന്‍ ചെയര്‍മാന്റെ മുന്നറിയിപ്പില്‍ നിന്ന് വ്യത്യസ്തമായതോടെ വൈദ്യുതി ക്ഷാമവുമായി ബന്ധപ്പെട്ട പഴയ കത്തിന്റെ സാഹചര്യം പരിശോധിക്കാന്‍ മുഖ്യമന്ത്രി നിര്‍ദേശിച്ചതായാണ് റിപ്പോര്‍ട്ട്. സംസ്ഥാനത്ത് യഥാര്‍ഥത്തില്‍ വൈദ്യുതി പ്രതിസന്ധിയുണ്ടായിരുന്നോ, അടിയന്തരമായി കരാറില്‍ ഏര്‍പ്പെടണമെന്ന് ആവശ്യപ്പെട്ടതിന്റെ സാഹചര്യം എന്തായിരുന്നു തുടങ്ങിയ കാര്യങ്ങളാണ് പരിശോധിക്കുക.
വൈദ്യുതി ക്ഷാമമില്ലെങ്കില്‍ ഹിമാചല്‍ പ്രദേശില്‍നിന്ന് വൈദ്യുതി വാങ്ങാന്‍ നേരത്തെ സമ്മര്‍ദം ചെലുത്തിയത് എന്തിനാണെന്നും മുഖ്യമന്ത്രി ചോദിച്ചതായാണ് വിവരം. അതേസമയം, നിലവിലെ വിലയിരുത്തല്‍ അടുത്ത രണ്ട് മാസത്തെ വൈദ്യുതി ലഭ്യതയെക്കുറിച്ചുള്ളതാണ്. അതിനുശേഷമുള്ള ആവശ്യകതയും ലഭ്യതയും അനുസരിച്ചായിരിക്കും തുടര്‍നടപടികള്‍.
ജിഎന്‍എ വഴി 500 മെഗാവാട്ട് വൈദ്യുതി വാങ്ങാനുള്ള നിര്‍ദേശം നേരത്തെ രാഷ്ട്രീയ-സാങ്കേതിക ചര്‍ച്ചകള്‍ക്ക് വഴിവെച്ചിരുന്നു. വൈദ്യുതിയുടെ വില, ലഭ്യത, വൈകുന്നേരങ്ങളിലെ ഉയര്‍ന്ന ആവശ്യകത നിറവേറ്റാനുള്ള ശേഷി, കരാറിന് ആവശ്യമായ അനുമതികള്‍ തുടങ്ങിയ വിഷയങ്ങളിലാണ് പ്രധാനമായും തര്‍ക്കം ഉയര്‍ന്നത്.
നിലവില്‍ രണ്ട് മാസത്തേക്ക് വൈദ്യുതി ക്ഷാമമുണ്ടാകില്ലെന്ന കെഎസ്ഇബിയുടെ നിലപാടോടെ അടിയന്തരമായി പുതിയ കരാറില്‍ ഏര്‍പ്പെടേണ്ട സാഹചര്യമില്ലെന്നാണ് വ്യക്തമാകുന്നത്. എന്നാല്‍ ദീര്‍ഘകാല വൈദ്യുതി ആവശ്യകതയും വേനല്‍ക്കാലത്തെ ഉപഭോഗവും കണക്കിലെടുത്ത് ഭാവിയില്‍ വൈദ്യുതി വാങ്ങല്‍ സംബന്ധിച്ച പുതിയ തീരുമാനങ്ങള്‍ വേണ്ടിവന്നേക്കാം.