image

17 Nov 2026 6:12 PM IST

Kerala

ശബരിമലയുടെ മുഖച്ഛായ മാറും; തിരുപ്പതി മോഡലില്‍ വന്‍ വികസനപദ്ധതി

MyFin Desk

ശബരിമലയുടെ മുഖച്ഛായ മാറും; തിരുപ്പതി മോഡലില്‍ വന്‍ വികസനപദ്ധതി
X

Summary

പദ്ധതി നടപ്പിലാകുന്നതോടെ ശബരിമലയിലെത്തുന്ന തീര്‍ഥാടകരുടെ എണ്ണത്തില്‍ 50 ശതമാനം വരെ വര്‍ധനയുണ്ടാകുമെന്നാണ് സര്‍ക്കാരിന്റെ പ്രതീക്ഷ.


ശബരിമലയെ രാജ്യത്തെ മികച്ച തീര്‍ഥാടന കേന്ദ്രമാക്കി മാറ്റാന്‍ വന്‍ വികസനപദ്ധതിയുമായി സംസ്ഥാന സര്‍ക്കാര്‍. തിരുപ്പതി ക്ഷേത്രത്തിന്റെ മാതൃകയില്‍ ശബരിമലയിലും ആധുനിക സൗകര്യങ്ങള്‍ ഒരുക്കുമെന്ന് മുഖ്യമന്ത്രി വി.ഡി. സതീശന്‍ പ്രഖ്യാപിച്ചു. നിലവിലെ തീര്‍ഥാടന സീസണ്‍ അവസാനിച്ചാലുടന്‍ പദ്ധതിയുടെ നടപടികള്‍ ആരംഭിക്കുമെന്നും അടുത്ത തീര്‍ഥാടന സീസണിന് മുമ്പ് വികസന പ്രവര്‍ത്തനങ്ങളുടെ വലിയൊരു ഭാഗം പൂര്‍ത്തിയാക്കാനാണ് ലക്ഷ്യമെന്നും മുഖ്യമന്ത്രി വ്യക്തമാക്കി.

കൊച്ചി രാജ്യാന്തര വിമാനത്താവളത്തില്‍ ശബരിമല തീര്‍ഥാടകര്‍ക്കായി ഒരുക്കിയ പ്രത്യേക ഇടത്താവളം ഉദ്ഘാടനം ചെയ്യുകയായിരുന്നു അദ്ദേഹം. ശബരിമലയിലെത്തുന്ന ലക്ഷക്കണക്കിന് തീര്‍ഥാടകര്‍ക്ക് സുഗമമായ ദര്‍ശനവും മികച്ച യാത്രാസൗകര്യങ്ങളും ഉറപ്പാക്കുകയാണ് സര്‍ക്കാരിന്റെ ലക്ഷ്യം. ദീര്‍ഘകാല അടിസ്ഥാനത്തിലുള്ള അടിസ്ഥാന സൗകര്യ വികസനത്തിനായിരിക്കും പദ്ധതിയില്‍ മുന്‍ഗണന നല്‍കുക. പമ്പയിലും സന്നിധാനത്തും മാത്രമല്ല, തീര്‍ഥാടന പാതകളിലും ഇടത്താവളങ്ങളിലും സൗകര്യങ്ങള്‍ മെച്ചപ്പെടുത്തും.

പദ്ധതി നടപ്പിലാകുന്നതോടെ ശബരിമലയിലെത്തുന്ന തീര്‍ഥാടകരുടെ എണ്ണത്തില്‍ 50 ശതമാനം വരെ വര്‍ധനയുണ്ടാകുമെന്നാണ് സര്‍ക്കാരിന്റെ പ്രതീക്ഷ. ശബരിമല ദര്‍ശനത്തിന് ശേഷം ഭക്തര്‍ ഉടന്‍ മടങ്ങുന്നതിന് പകരം കേരളത്തിലെ മറ്റ് പ്രധാന ക്ഷേത്രങ്ങള്‍ കൂടി സന്ദര്‍ശിക്കുന്ന രീതിയിലുള്ള തീര്‍ഥാടന ടൂറിസം ശൃംഖലയും പരിഗണനയിലുണ്ട്. ഇതിലൂടെ സംസ്ഥാനത്തെ ക്ഷേത്ര ടൂറിസത്തിനും പ്രാദേശിക സമ്പദ്വ്യവസ്ഥയ്ക്കും കൂടുതല്‍ നേട്ടമുണ്ടാക്കാനാകുമെന്നാണ് വിലയിരുത്തല്‍.

അതേസമയം, കൊച്ചി വിമാനത്താവളത്തില്‍ ഒരുക്കിയ തീര്‍ഥാടകര്‍ക്കുള്ള ഇടത്താവളം 5,000 ചതുരശ്ര അടി വിസ്തീര്‍ണമുള്ളതാണ്. 24 മണിക്കൂറും പ്രവര്‍ത്തിക്കുന്ന കേന്ദ്രത്തില്‍ വിശ്രമസൗകര്യം, ദേവസ്വം ഹെല്‍പ്പ് ഡെസ്‌ക്, പ്രസാദം കൂപ്പണ്‍ കൗണ്ടര്‍, പ്രീപെയ്ഡ് ടാക്‌സി ബുക്കിങ്, ഭക്ഷണശാല തുടങ്ങിയ സംവിധാനങ്ങളുണ്ട്. കൊച്ചി വിമാനത്താവളത്തില്‍ നിന്ന് ശബരിമലയിലേക്ക് കെഎസ്ആര്‍ടിസി ബസ് സര്‍വീസും ആരംഭിച്ചിട്ടുണ്ട്. ഹെലികോപ്റ്റര്‍ യാത്രയ്ക്കുള്ള ബുക്കിങ് സൗകര്യവും ഒരുക്കിയിട്ടുണ്ട്.