വാഷിംഗ്ടൺ ഡിസി മേയർ പോരാട്ടത്തിൽ ചരിത്രമെഴുതി തമിഴ്നാട് സ്വദേശിനി റിനി സമ്പത്ത്!

അമേരിക്കൻ രാഷ്ട്രീയത്തിന്റെ ഹൃദയഭൂമിയിൽ ചരിത്രം കുറിച്ച് ഒരു തമിഴ്നാട് സ്വദേശിനി. വാഷിംഗ്ടൺ ഡിസിയുടെ മേയർ സ്ഥാനത്തേക്ക് മത്സരിക്കാൻ യോഗ്യത നേടുന്ന ആദ്യ ദക്ഷിണേഷ്യൻ വനിതയായി റിനി സമ്പത്ത് മാറിയിരിക്കുന്നു.ഏഴാം വയസ്സിൽ 'അമേരിക്കൻ സ്വപ്നം' തേടി ഇന്ത്യയിൽ നിന്നും കുടിയേറിയ റിനി, ഇന്ന് ലോകത്തിലെ ഏറ്റവും ശക്തമായ നഗരങ്ങളിലൊന്നിന്റെ അമരത്തെത്താനുള്ള പോരാട്ടത്തിലാണ്. 4,500-ലധികം പൗരന്മാരുടെ പിന്തുണയോടെയാണ് റിനി തന്റെ സ്ഥാനാർത്ഥിത്വം ഉറപ്പിച്ചത്. സാധാരണക്കാരായ ഡിസി നിവാസികൾക്ക് അമേരിക്കൻ സ്വപ്നം അപ്രാപ്യമാകാതിരിക്കാനാണ് തന്റെ പോരാട്ടമെന്ന് അവർ വ്യക്തമാക്കുന്നു.വാഷിംഗ്ടൺ ഡിസിയിലെ സാമ്പത്തിക അസമത്വങ്ങൾ പരിഹരിക്കുക, സുരക്ഷ ഉറപ്പാക്കുക, എല്ലാവർക്കും തുല്യ അവസരങ്ങൾ ലഭ്യമാക്കുക എന്നിവയാണ് റിനിയുടെ പ്രധാന വാഗ്ദാനങ്ങൾ. മുൻപ് യൂണിവേഴ്സിറ്റി ഓഫ് സതേൺ കാലിഫോർണിയയിലെ സ്റ്റുഡന്റ് ഗവൺമെന്റ് പ്രസിഡന്റായും റിനി തിളങ്ങിയിട്ടുണ്ട്. ഒരു കുടിയേറ്റക്കാരിൽ നിന്നും നഗരത്തിന്റെ നായികയിലേക്കുള്ള റിനിയുടെ ഈ യാത്ര, ആഗോളതലത്തിൽ തന്നെ ഇന്ത്യൻ വംശജരുടെ രാഷ്ട്രീയ സ്വാധീനം വർദ്ധിക്കുന്നതിന്റെ മറ്റൊരു തെളിവാണ്.വാഷിംഗ്ടണിന്റെ വികസന നയങ്ങളിൽ നിർണ്ണായക മാറ്റങ്ങൾ ലക്ഷ്യമിടുന്ന റിനി സമ്പത്തിന്റെ സ്ഥാനാർത്ഥിത്വം അന്താരാഷ്ട്ര രാഷ്ട്രീയ നിരീക്ഷകർ ഏറെ പ്രാധാന്യത്തോടെയാണ് നോക്കിക്കാണുന്നത്. ഇന്ത്യയുടെ പെൺകരുത്ത് അമേരിക്കൻ തിരഞ്ഞെടുപ്പ് ഗോദയിൽ പുതിയ ചരിത്രമെഴുതുമോ എന്ന് വരും ദിവസങ്ങളിൽ അറിയാം.