Login 
പഠിക്കാം & സമ്പാദിക്കാം 
Home
24 March 2026 7:36 PM IST
Summary
2018-ല് 3 ബില്യണ് ഡോളറിന്റെ വിദേശ വൈന് ഇറക്കുമതി ചെയ്തിരുന്ന സ്ഥാനത്ത് ഇന്ന് അതിന്റെ പകുതി പോലും എത്തുന്നില്ല. സാമ്പത്തിക മാന്ദ്യവും പ്രോപ്പര്ട്ടി വിപണിയിലെ തകര്ച്ചയും ഉപഭോക്താക്കളുടെ ചെലവഴിക്കല് ശേഷി കുറച്ചതാണ് ഇതിനു കാരണം
ലോകത്തെ ഏറ്റവും വലിയ വൈന് ഉപഭോക്താക്കളിലൊന്നായ ചൈന വിപണിയില് നിന്ന് പിന്നോട്ട് പോകുന്നത് ആഗോള മദ്യവ്യവസായത്തിന് വന് തിരിച്ചടിയായി. ഒരു കാലത്ത് ആഗോള വൈന് ഇറക്കുമതിയുടെ 8 ശതമാനവും കൈക്കലാക്കിയിരുന്ന ചൈനയില് ഇപ്പോള് ഡിമാന്ഡ് കുത്തനെ ഇടിഞ്ഞിരിക്കുകയാണ്. 2018-ല് 3 ബില്യണ് ഡോളറിന്റെ വിദേശ വൈന് ഇറക്കുമതി ചെയ്തിരുന്ന സ്ഥാനത്ത് ഇന്ന് അതിന്റെ പകുതി പോലും എത്തുന്നില്ല. സാമ്പത്തിക മാന്ദ്യവും പ്രോപ്പര്ട്ടി വിപണിയിലെ തകര്ച്ചയും ഉപഭോക്താക്കളുടെ ചെലവഴിക്കല് ശേഷി കുറച്ചതാണ് ഈ മാറ്റത്തിന് പ്രധാന കാരണം.
പാര്ട്ടികളില് മദ്യനിരോധനം; കുപ്പി തുറക്കാതെ ഉദ്യോഗസ്ഥര്
2025 മെയ് മാസത്തില് സര്ക്കാര്-കമ്മ്യൂണിസ്റ്റ് പാര്ട്ടി പരിപാടികളില് മദ്യം നിരോധിക്കാനുള്ള നീക്കം വിപണിക്ക് കനത്ത ആഘാതമേല്പ്പിച്ചു. ചൈനയിലെ വൈന് ഉപഭോഗത്തിന്റെ വലിയൊരു ഭാഗവും ഔദ്യോഗിക വിരുന്നുകളെയും ബിസിനസ് മീറ്റിംഗുകളെയും ആശ്രയിച്ചായിരുന്നു. എന്നാല് പുതിയ കര്ശന നിയന്ത്രണങ്ങള് വന്നതോടെ സര്ക്കാര് ഉദ്യോഗസ്ഥരും കമ്പനികളും വൈന് വിളമ്പാന് ഭയപ്പെടുകയാണ്. ബിസിനസ് സംസ്കാരത്തിന്റെ ഭാഗമായിരുന്ന റെഡ് വൈന് ഇന്ന് ചൈനയില് പദവിയുടെ അടയാളമല്ലാതായി മാറിക്കഴിഞ്ഞു.
കെട്ടിക്കിടക്കുന്നത് കോടികളുടെ സ്റ്റോക്ക്
ഡിമാന്ഡ് കുറഞ്ഞതോടെ ലോകപ്രശസ്ത വൈന് കമ്പനികളെല്ലാം പ്രതിസന്ധിയിലാണ്. ട്രഷറി വൈന് എസ്റ്റേറ്റ്സ് പോലുള്ള കമ്പനികളുടെ 150 മില്യണ് ഡോളറിന്റെ ഉല്പ്പന്നങ്ങളാണ് ചൈനീസ് വെയര്ഹൗസുകളില് വിറ്റുപോകാതെ കെട്ടിക്കിടക്കുന്നത്. ഓസ്ട്രേലിയയിലെ പല കയറ്റുമതിക്കാര്ക്കും കഴിഞ്ഞ വര്ഷം ഒരു വില്പ്പന പോലും നടത്താനായില്ല. ഫ്രാന്സിലെ ബോര്ഡോയില് അധികമായി വരുന്ന വൈന് ഉല്പ്പാദനം നിയന്ത്രിക്കാനായി 20 ശതമാനത്തോളം മുന്തിരിത്തോട്ടങ്ങള് വെട്ടിമാറ്റേണ്ടി വന്നു എന്നത് പ്രതിസന്ധിയുടെ ആഴം വ്യക്തമാക്കുന്നു.
പുതുതലമുറയ്ക്ക് താല്പ്പര്യമില്ല; വിപണി മാറ്റിപ്പിടിച്ച് ഉല്പ്പാദകര്
സാമ്പത്തിക കാരണങ്ങള്ക്കപ്പുറം ചൈനയിലെ യുവതലമുറയുടെ മാറുന്ന താല്പ്പര്യങ്ങളും ഈ ഇടിവിന് കാരണമാണ്. വൈനിനെ ഒരു നിത്യജീവിത ശൈലിയുടെ ഭാഗമായി കാണാന് യുവാക്കള് തയ്യാറാകുന്നില്ല. ചൈനയെ വിശ്വസനീയമായ ഒരു വിപണിയായി ഇനി കാണാന് കഴിയില്ലെന്ന് മനസ്സിലാക്കിയ ആഗോള ഉല്പ്പാദകര് ഇപ്പോള് മറ്റു രാജ്യങ്ങളിലേക്ക് ശ്രദ്ധ തിരിക്കുകയാണ്. വരും വര്ഷങ്ങളില് വൈന് വ്യാപാരത്തിന്റെ കേന്ദ്രബിന്ദു ചൈനയില് നിന്നും മാറ്റപ്പെടുമെന്നാണ് സാമ്പത്തിക വിദഗ്ധര് വിലയിരുത്തുന്നത്.