തൊഴിലില്ലായ്മ നിരക്ക് കുത്തനെ കുറഞ്ഞു

രാജ്യത്ത് തൊഴിലില്ലായ്മ നിരക്കില്‍ ഇടിവ്. ഒക്ടോബറിലെ 5.2 ശതമാനത്തില്‍ നിന്ന് നവംബറില്‍ 4.7 ശതമാനമായാണ് നിരക്ക് കുറഞ്ഞത്. ഈ വര്‍ഷം ഏപ്രിലിനുശേഷം രേഖപ്പെടുത്തിയ ഏറ്റവും താഴ്ന്ന നിലയാണിതെന്ന് സ്റ്റാറ്റിസ്റ്റിക്‌സ് ആന്‍ഡ് പ്രോഗ്രാം ഇംപ്ലിമെന്റേഷന്‍ മന്ത്രാലയം ഒരു പത്രക്കുറിപ്പില്‍ പറഞ്ഞു.

ഗ്രാമീണ തൊഴിലവസരങ്ങള്‍ ശക്തമാകുന്നതും സ്ത്രീ പങ്കാളിത്തം വര്‍ദ്ധിച്ചതും തൊഴില്‍ വിപണി സാഹചര്യങ്ങള്‍ മെച്ചപ്പെടുത്തിയതുമാണ് ഈ ഇടിവിന് കാരണം. ഗ്രാമീണ തൊഴിലില്ലായ്മ നിരക്ക് റെക്കോര്‍ഡ് താഴ്ന്ന നിലയായ 3.9% ആയി കുറഞ്ഞപ്പോള്‍ നഗര തൊഴിലില്ലായ്മ 6.5% ആയി കുറഞ്ഞു.

പുരുഷ, വനിതാ തൊഴിലില്ലായ്മ നിരക്കിലും ഈ മാസം കുറവ് രേഖപ്പെടുത്തി. സ്ത്രീകള്‍ക്കിടയിലെ തൊഴിലില്ലായ്മ നിരക്ക് ഒക്ടോബറിലെ 5.4 ശതമാനത്തില്‍ നിന്ന് നവംബറില്‍ 4.8 ശതമാനമായി കുറഞ്ഞു.

'ഗ്രാമീണ, നഗര സ്ത്രീ തൊഴിലില്ലായ്മ നിരക്കുകളിലെ കുറവ് ഈ ഇടിവിന് കാരണമായി, ഇത് യഥാക്രമം 4 ശതമാനത്തില്‍ നിന്ന് 3.4 ശതമാനമായും 9.7 ശതമാനത്തില്‍ നിന്ന് 9.3 ശതമാനമായും കുറഞ്ഞു,' പ്രസ്താവനയില്‍ പറയുന്നു.

നവംബറില്‍ പുരുഷ തൊഴിലില്ലായ്മ നിരക്ക് മുന്‍ മാസത്തെ 5.1 ശതമാനത്തില്‍ നിന്ന് 4.6 ശതമാനമായി കുറഞ്ഞു. ഗ്രാമപ്രദേശങ്ങളില്‍ പുരുഷ തൊഴിലില്ലായ്മ 4.1 ശതമാനമായിരുന്നു. നഗരപ്രദേശങ്ങളില്‍ ഇത് 5.6 ശതമാനമായി കുറഞ്ഞു. ഒക്ടോബറില്‍ ഇത് യഥാക്രമം 4.6 ശതമാനവും 6.1 ശതമാനവുമായിരുന്നു.

തൊഴിലാളി ജനസംഖ്യാ അനുപാതത്തില്‍ (ഡബ്‌ളിയുപിആര്‍) പുരോഗതി ഉണ്ടായതായും സര്‍വേ ചൂണ്ടിക്കാട്ടി. ഗ്രാമപ്രദേശങ്ങളില്‍, ഏപ്രിലില്‍ 55.4 ശതമാനമായിരുന്ന ഡബ്‌ളിയുപിആര്‍ നവംബറില്‍ 56.3 ശതമാനമായി വര്‍ദ്ധിച്ചു. മൊത്തത്തിലുള്ള ഡബ്‌ളിയുപിആര്‍ ഒക്ടോബറിലെ 52.8 ശതമാനത്തില്‍ നിന്ന് നവംബറില്‍ 53.2 ശതമാനമായി ഉയര്‍ന്നു.

തൊഴില്‍ സേനയിലെ സ്ത്രീ പങ്കാളിത്തം മെച്ചപ്പെട്ടു. സര്‍വേ പ്രകാരം, മൊത്തത്തിലുള്ള സ്ത്രീ തൊഴില്‍ സേന പങ്കാളിത്ത നിരക്ക് ജൂണ്‍ മുതല്‍ നവംബര്‍ വരെ ക്രമാനുഗതമായി വര്‍ദ്ധിച്ചു.

വിവിധ മേഖലകളില്‍ തൊഴിലവസര സാധ്യതകളില്‍ പുരോഗതി കാണപ്പെടുന്നു. തൊഴിലില്ലായ്മ കുറയുന്നതിന് ഗ്രാമപ്രദേശങ്ങള്‍ ഗണ്യമായി സംഭാവന നല്‍കുന്നുണ്ട്. ഗ്രാമീണ തൊഴിലവസരങ്ങളിലെ നേട്ടങ്ങള്‍, വര്‍ദ്ധിച്ചുവരുന്ന സ്ത്രീ പങ്കാളിത്തം, നഗരങ്ങളിലെ തൊഴില്‍ ആവശ്യകതയിലെ ക്രമാനുഗതമായ വീണ്ടെടുക്കല്‍ എന്നിവയാല്‍ തൊഴില്‍ വിപണി ശക്തിപ്പെടുന്നതായി സര്‍ക്കാര്‍ഡാറ്റയും സൂചിപ്പിക്കുന്നു.