പശ്ചിമേഷ്യ:ബസ്മതി കയറ്റുമതി അനിശ്ചിതത്വത്തില്‍; തേയിലക്കും തിരിച്ചടി

പശ്ചിമേഷ്യയിലെ സംഘര്‍ഷം ഇന്ത്യയുടെ കാര്‍ഷിക കയറ്റുമതി മേഖലയ്ക്ക് വന്‍ പ്രഹരമേല്‍പ്പിക്കുന്നു. രാജ്യത്തെ പ്രീമിയം ഉല്‍പ്പന്നങ്ങളായ ബസുമതി അരിയുടെയും തേയിലയുടെയും കയറ്റുമതി നിലച്ച മട്ടിലാണ്. ഇന്ത്യയുടെ ബസുമതി അരിയുടെ കയറ്റുമതിയുടെ പകുതിയോളം സൗദി അറേബ്യ, ഇറാന്‍, ഇറാഖ്, യുഎഇ, യെമന്‍ എന്നീ അഞ്ച് രാജ്യങ്ങളിലേക്കാണ് പോകുന്നത്. സംഘര്‍ഷം കടുത്തതോടെ ഈ വിപണികളിലേക്കുള്ള ചരക്കുനീക്കം തടസ്സപ്പെട്ടു.

ബസുമതി വിപണിയില്‍ കരിനിഴല്‍; വിലയില്‍ വര്‍ദ്ധനവ്

കഴിഞ്ഞ ഒരു മാസത്തിനിടെ ബസുമതി അരിയുടെ മൊത്തവിലയില്‍ 10-15% വരെ വര്‍ദ്ധനവ് രേഖപ്പെടുത്തി. ഇറാന്‍ ഒരു പ്രധാന വിപണിയായതിനാല്‍ അവിടുത്തെ അനിശ്ചിതത്വം വരും ദിവസങ്ങളില്‍ വിലയില്‍ വലിയ ചാഞ്ചാട്ടമുണ്ടാക്കും. നിലവില്‍ ഏകദേശം 4,00,000 മെട്രിക് ടണ്‍ ബസുമതി അരിയാണ് തുറമുഖങ്ങളിലും വിവിധയിടങ്ങളിലായി ഗതാഗതത്തിലുമുള്ളത്. വര്‍ദ്ധിച്ചുവരുന്ന കണ്ടെയ്നര്‍ ചരക്ക് ചെലവ് കാരണം ഇവ പശ്ചിമേഷ്യയിലേക്ക് അയക്കാന്‍ കഴിയാത്ത സ്ഥിതിയാണ്. ഇത്രയും വലിയ അളവ് അരി പെട്ടെന്ന് ആഗിരണം ചെയ്യാന്‍ മറ്റ് വിപണികള്‍ക്കില്ലാത്തത് കയറ്റുമതിക്കാരെ കടുത്ത ആശങ്കയിലാക്കുന്നു.

പഞ്ചാബിനും ഹരിയാനയ്ക്കും കനത്ത തിരിച്ചടി

ഇന്ത്യയില്‍ നിന്നുള്ള ആകെ ബസുമതി കയറ്റുമതിയുടെ 75 ശതമാനവും വരുന്നത് പഞ്ചാബ്, ഹരിയാന സംസ്ഥാനങ്ങളില്‍ നിന്നാണ്. ഹരിയാന 35 ശതമാനവും പഞ്ചാബ് 40 ശതമാനവും വിഹിതം കൈകാര്യം ചെയ്യുന്നു. ഇറാനിലേക്കോ അല്ലെങ്കില്‍ ഇറാന്റെ ഏറ്റവും വലിയ തുറമുഖമായ ബന്ദര്‍ അബ്ബാസ് വഴി അഫ്ഗാനിസ്ഥാനിലേക്കോ പോകേണ്ടിയിരുന്ന ഷിപ്പ്‌മെന്റുകള്‍ ഇപ്പോള്‍ പൂര്‍ണ്ണമായും തടഞ്ഞുവെച്ചിരിക്കുകയാണ്. സ്ഥിതി മെച്ചപ്പെടുന്നതുവരെ ഈ ചരക്കുകള്‍ തുറമുഖങ്ങളില്‍ തന്നെ കെട്ടിക്കിടക്കുന്നത് കോടിക്കണക്കിന് രൂപയുടെ നഷ്ടമുണ്ടാക്കും.

തേയില വിപണിയെ വിഴുങ്ങി ഹോര്‍മുസ് കടലിടുക്ക് പ്രതിസന്ധി

പശ്ചിമേഷ്യന്‍ സംഘര്‍ഷം ഇന്ത്യയുടെ തേയില കയറ്റുമതിയെയും സാരമായി ബാധിച്ചു. ലോകത്തിലെ തന്നെ പ്രധാന കടല്‍പ്പാതയായ ഹോര്‍മുസ് കടലിടുക്ക് അടച്ചതും കപ്പല്‍ ഗതാഗതം തടസ്സപ്പെട്ടതുമാണ് തിരിച്ചടിയായത്. ഇതോടെ ഇറാന്‍ ഉള്‍പ്പെടെയുള്ള ഗള്‍ഫ് രാജ്യങ്ങളിലേക്ക് പോകേണ്ടിയിരുന്ന പ്രീമിയം 'ഓര്‍ത്തഡോക്സ്' തേയിലയുടെ കയറ്റുമതി ഏകദേശം നിലച്ചു. കഴിഞ്ഞ വര്‍ഷം മാത്രം 51 ദശലക്ഷം ഡോളറിന്റെ തേയിലയാണ് ഇറാനിലേക്ക് കയറ്റി അയച്ചിരുന്നത്. ഈ വരുമാനത്തില്‍ വലിയ ഇടിവുണ്ടാകുമെന്ന് കയറ്റുമതിക്കാര്‍ ഭയപ്പെടുന്നു.

ചെലവ് വര്‍ദ്ധനയും യാത്രാ തടസ്സവും

സംഘര്‍ഷം കാരണം കപ്പലുകള്‍ ദീര്‍ഘദൂര പാതയായ കേപ് ഓഫ് ഗുഡ് ഹോപ്പ് വഴി തിരിച്ചുവിടുകയാണ്. ഇത് യാത്രാ സമയം 15 മുതല്‍ 20 ദിവസം വരെ വര്‍ദ്ധിപ്പിക്കുന്നു. ഇതിനുപുറമെ ഷിപ്പിംഗ് ഇന്‍ഷുറന്‍സ് പ്രീമിയങ്ങള്‍ 50% വരെ ഉയരുകയും ഇന്ധനവില വര്‍ദ്ധനവ് കാരണം ഫ്രൈറ്റ് ചാര്‍ജുകള്‍ കുത്തനെ കൂടുകയും ചെയ്തു. ഈ അമിതഭാരം കയറ്റുമതിക്കാരെ പ്രതിസന്ധിയിലാക്കുന്നു. പേയ്മെന്റുകള്‍ മുടങ്ങുന്നതും കണ്ടെയ്നറുകളുടെ ലഭ്യതക്കുറവും വരും മാസങ്ങളില്‍ പ്രതിസന്ധി കൂടുതല്‍ രൂക്ഷമാക്കിയേക്കാം.

സര്‍ക്കാര്‍ ഇടപെടല്‍; ചര്‍ച്ചകള്‍ സജീവം

പ്രതിസന്ധി പരിഹരിക്കാന്‍ കേന്ദ്ര വാണിജ്യ മന്ത്രാലയം കയറ്റുമതിക്കാരുടെ അടിയന്തര യോഗം വിളിച്ചിട്ടുണ്ട്. തേയിലയും അരിയും പെട്ടെന്ന് കേടാകാത്ത ഉല്‍പ്പന്നങ്ങളായതിനാല്‍ ഹ്രസ്വകാലത്തേക്ക് മറ്റ് ആഘാതങ്ങള്‍ ഉണ്ടാവില്ലെങ്കിലും, ദീര്‍ഘകാലാടിസ്ഥാനത്തില്‍ ഇത് ഇന്ത്യന്‍ ബ്രാന്‍ഡുകളുടെ വിപണി സ്വാധീനം കുറയ്ക്കുമോ എന്ന ഭയമുണ്ട്.