ബസ്മതി അരി വില ഉയര്‍ന്നത് ഡിമാന്‍ഡ് വര്‍ധിച്ചതിനാല്‍

ബസ്മതി അരി വില ഉയര്‍ന്നത് ഇന്ത്യ-പാക് സംഘര്‍ഷം മൂലമല്ല മറിച്ച് ഡിമാന്‍ഡ് വര്‍ധിച്ചതിനാലാണെന്ന് എഐആര്‍ഇഎ.

1509, 1718 എന്നീ ബസുമതി അരി ഇനങ്ങളുടെ കയറ്റുമതി വില മാര്‍ച്ച് മുതല്‍ നേരിയ തോതില്‍ ഉയര്‍ന്നിട്ടുണ്ട്. ഇതിനു കാരണം ഡിമാന്‍ഡ് വര്‍ധിച്ചതാണ്, ഇരു രാജ്യങ്ങളും തമ്മിലുള്ള സൈനിക സംഘര്‍ഷങ്ങള്‍ മൂലമുണ്ടായ വിതരണ തടസ്സങ്ങള്‍ മൂലമല്ലെന്നും ഓള്‍ ഇന്ത്യ റൈസ് എക്‌സ്‌പോര്‍ട്ടേഴ്‌സ് അസോസിയേഷന്‍ പ്രസിഡന്റ് സതീഷ് ഗോയല്‍ പറഞ്ഞു.

സൗദി അറേബ്യ, ഇറാന്‍, ഇറാഖ് എന്നിവിടങ്ങളില്‍ നിന്നുള്ള ആവശ്യം ഈ കാലയളവില്‍ ഏറെ വര്‍ധിച്ചിരുന്നു. ഇത് വിലവര്‍ധനവിന് കാരണമായി. എന്നാല്‍ വില വര്‍ധന വ്യാപാരത്തെ ഇതുവരെ ബാധിച്ചിട്ടില്ലെന്നും ഓര്‍ഡറുകള്‍ സുഗമമായി നിറവേറ്റുന്നുണ്ടെന്നും അദ്ദേഹം കൂട്ടിച്ചേര്‍ത്തു.

2024 സെപ്റ്റംബറില്‍ ബസ്മതി അരി, പ്രത്യേകിച്ച് 1509 ഇനം അരി, കിലോയ്ക്ക് 62 രൂപ എന്ന നിലയില്‍ ഉയര്‍ന്ന നിലയിലായിരുന്നുവെന്ന് എഐആര്‍ഇഎ മുന്‍ പ്രസിഡന്റ് വിജയ് സേതിയ പറഞ്ഞു.അതിനുശേഷം, വിളവ് വര്‍ധിച്ചതിനാല്‍ പ്രധാനമായും വില കുറഞ്ഞു. പ്രധാന ഉല്‍പ്പാദന മേഖലകളില്‍ 1509 നെല്ലും മറ്റ് ബസുമതി ഇനങ്ങളും വലിയ തോതില്‍ എത്തിയത് വിലയില്‍ ഇടിവുണ്ടാക്കി. ഫെബ്രുവരി വരെ 1509 നെല്ലിനത്തിന്റെ വില കിലോയ്ക്ക് 52 രൂപയായി കുറഞ്ഞിരുന്നു.

എന്നാല്‍ മാര്‍ച്ചിലെ ആവശ്യകതയിലുണ്ടായ വര്‍ധനവ് വില കിലോയ്ക്ക് 58 രൂപയായി ഉയര്‍ത്തി, പക്ഷേ വില ഇപ്പോഴും 2024 സെപ്റ്റംബറിലെ നിലവാരത്തിന് താഴെയാണെന്ന് അവര്‍ ചൂണ്ടിക്കാട്ടി.

2024-25 ല്‍ ഇന്ത്യ ഏകദേശം 6 ദശലക്ഷം ടണ്‍ ബസ്മതി അരി കയറ്റുമതി ചെയ്തു. അതേസമയം പാക്കിസ്ഥാന്‍ ഏകദേശം 1 ദശലക്ഷം ടണ്‍ ആണ് കയറ്റുമതി ചെയ്തത്.