Login 
പഠിക്കാം & സമ്പാദിക്കാം 
Home
18 Jan 2026 10:12 AM IST
Wheat Product Export : ഗോതമ്പുല്പ്പന്നങ്ങള് വലിയ തോതിൽ കടൽ കടക്കും
MyFin Desk
Summary
ഈ സീസണില് ഗോതമ്പ് ഉത്പാദനം പുതിയ റെക്കോര്ഡിലെത്തുമെന്ന വിലയിരുത്തലിനെത്തുടര്ന്നാണ് കയറ്റുമതിക്കുള്ള അനുമതി. അടുത്ത വിളവെടുപ്പ് സീസണിന് ഇനി ഏതാനും ആഴ്ചകള് മാത്രമാണ് ബാക്കി
കര്ശനമായ വ്യവസ്ഥകള്ക്ക് വിധേയമായി, 500,000 ടണ് ഗോതമ്പ് ഉല്പന്നങ്ങള് കയറ്റുമതി ചെയ്യാന് കേന്ദ്രം അനുമതി നല്കി. ഇതുപ്രകാരം ഗോതമ്പ് മാവ് (ആട്ട), മൈദ, റവ തുടങ്ങിയ ഉല്പ്പന്നങ്ങള് വ്യവസായികള്ക്ക് കയറ്റുമതി ചെയ്യാം.
2026 ലെ വിളവെടുപ്പ് സീസണിന് ഏതാനും ആഴ്ചകള് മുമ്പാണ് ഗോതമ്പ് ഉല്പ്പന്നങ്ങള് കയറ്റുമതി ചെയ്യുന്നതിനുള്ള ഈ അനുമതി ലഭിക്കുന്നത്. ഈ സീസണില് ഗോതമ്പ് ഉത്പാദനം പുതിയ റെക്കോര്ഡിലെത്തുമെന്ന വിലയിരുത്തലിനെത്തുടര്ന്നാണ് കയറ്റുമതിക്കുള്ള അനുമതി.
ആഭ്യന്തര വില നിയന്ത്രിക്കുന്നതിനായി ഇന്ത്യ ഏതാനും വര്ഷങ്ങള്ക്ക് മുമ്പ് ഗോതമ്പിന്റെയും ഗോതമ്പ് ഉല്പ്പന്നങ്ങളുടെയും കയറ്റുമതി നിരോധിച്ചിരുന്നു.എങ്കിലും, കുറച്ച് മാസങ്ങള്ക്ക് മുമ്പ്, ഗോതമ്പ് തവിട് കയറ്റുമതി ചെയ്യാന് സര്ക്കാര് അനുവദിച്ചിരുന്നു. എന്നാല് ഗോതമ്പ് തവിടിന് ആവശ്യക്കാരില്ലായിരുന്നു. അതിനാല് വില കുറഞ്ഞു. ഈസാഹചര്യത്തിലാണ് കയറ്റുമതി അനുവദിച്ചത്.
ആദ്യഘട്ട അപേക്ഷകൾ ജനുവരി 31 വരെ
ഗോതമ്പ് ഉല്പ്പന്നങ്ങള് കയറ്റുമതി ചെയ്യാന് ആഗ്രഹിക്കുന്ന എല്ലാ അപേക്ഷകരും ഡിജിഎഫ്ടി വെബ്സൈറ്റ് വഴി അപേക്ഷിക്കണമെന്ന് സര്ക്കാര് അറിയിച്ചു. ആദ്യ ഘട്ട അപേക്ഷകള് 2026 ജനുവരി 21 മുതല് 2026 ജനുവരി 31 വരെ ക്ഷണിക്കും.
മേല്പ്പറഞ്ഞ വിജ്ഞാപനപ്രകാരം അനുവദനീയമായ കയറ്റുമതിയുടെ അളവ്, കാലാകാലങ്ങളില് ഭേദഗതി വരുത്തി, തീരുന്നതുവരെ ഓരോ മാസത്തിന്റെയും അവസാന പത്ത് ദിവസങ്ങളില് അപേക്ഷകള് ക്ഷണിക്കുമെന്ന് ഔദ്യോഗിക ഉത്തരവില് പറയുന്നു.കയറ്റുമതി അംഗീകാരത്തിന്റെ സാധുത ഉത്തരവ് ഇഷ്യൂ ചെയ്ത തീയതി മുതല് ആറ് മാസത്തേക്ക് ആയിരിക്കും.
2025 ല് ഇന്ത്യ റെക്കോര്ഡ് 117.5 ദശലക്ഷം ടണ് ഗോതമ്പ് ഉല്പ്പാദിപ്പിച്ചു, ഇത് കഴിഞ്ഞ വര്ഷം ഇതേ കാലയളവിനേക്കാള് 3.8 ശതമാനം കൂടുതലാണ്. ഡിസംബര് 16 ലെ കണക്കനുസരിച്ച്, ഇന്ത്യയുടെ സ്റ്റോക്കുകളില് ഏകദേശം 60 ദശലക്ഷം ടണ് ഗോതമ്പും അരിയും ഉണ്ട്.