ധാന്‍-ധാന്യ കൃഷി യോജന ഫലം കാണുന്നു, കാര്‍ഷിക പിന്നാക്ക ജില്ലകളില്‍ മുന്നേറ്റം

പദ്ധതി ഏകോപനം ഫലം കണ്ടു. കാര്‍ഷിക രംഗത്ത് പിന്നാക്കം നില്‍ക്കുന്ന ജില്ലകളില്‍ പുരോഗതി കൈവരിക്കുന്നതായി കേന്ദ്ര റിപ്പോര്‍ട്ട്. ജലസേചന സൗകര്യങ്ങളുടെ വിപുലീകരണം, വിള വൈവിധ്യവല്‍ക്കരണം, പ്രകൃതിദത്ത കൃഷിരീതികളുടെ പ്രോത്സാഹനം എന്നിവയിലൂടെ കാര്‍ഷിക മേഖലയില്‍ മാറ്റം സൃഷ്ടിക്കാനാണ് പ്രധാനമന്ത്രി ധാന്‍-ധാന്യ കൃഷി യോജന ലക്ഷ്യമിടുന്നത്.

നേട്ടം ഈ സംസ്ഥാനങ്ങളില്‍

മഹാരാഷ്ട്ര, ഛത്തീസ്ഗഡ്, ആന്ധ്രാപ്രദേശ്, ബിഹാര്‍ തുടങ്ങിയ സംസ്ഥാനങ്ങളിലെ കാര്‍ഷികമായി പിന്നാക്കം നില്‍ക്കുന്ന ജില്ലകളിലാണ് പദ്ധതിയുടെ ഭാഗമായി ശ്രദ്ധേയമായ ഇടപെടലുകള്‍ നടക്കുന്നത്. വിവിധ കേന്ദ്ര-സംസ്ഥാന പദ്ധതികളെ ഏകോപിപ്പിച്ച് പ്രാദേശിക കാര്‍ഷിക പ്രശ്‌നങ്ങള്‍ക്ക് പരിഹാരം കണ്ടെത്തുന്ന രീതിയാണ് നിലവില്‍ കാര്‍ഷിക മന്ത്രാലയം സ്വീകരിച്ചിരിക്കുന്നത്.

മഹാരാഷ്ട്രയിലെ ഗഡ്ചിരോളി ജില്ലയില്‍ ജലസംരക്ഷണ പ്രവര്‍ത്തനങ്ങള്‍ക്കാണ് പ്രത്യേക ഊന്നല്‍ നല്‍കുന്നത്. കൃഷിയിടങ്ങളില്‍ വെള്ളം സംഭരിക്കാനും ഭൂഗര്‍ഭജല ലഭ്യത മെച്ചപ്പെടുത്താനും ലക്ഷ്യമിട്ട് 3,100-ലധികം കാര്‍ഷിക കുളങ്ങള്‍, റീചാര്‍ജ് ഷാഫ്റ്റുകള്‍, മുള ഉപയോഗിച്ചുള്ള മണ്ണ്-ജലസംരക്ഷണ സംവിധാനങ്ങള്‍ എന്നിവ ഒരുക്കിയതായി റിപ്പോര്‍ട്ടുകള്‍ വ്യക്തമാക്കുന്നു. ഇതിലൂടെ നെല്ല്, ചെറുധാന്യങ്ങള്‍ തുടങ്ങിയ പരമ്പരാഗത വിളകള്‍ക്കൊപ്പം ചോളം, റാഗി, പച്ചക്കറികള്‍, മഞ്ഞള്‍ തുടങ്ങിയ വിളകളിലേക്കും കര്‍ഷകര്‍ക്ക് മാറാനുള്ള സാഹചര്യം മെച്ചപ്പെടുന്നു.

ആന്ധ്രാപ്രദേശിലെ അല്ലൂരി സീതാരാമ രാജു ജില്ലയില്‍ ഉയര്‍ന്ന മൂല്യമുള്ള ഉദ്യാനവിളകളുടെ കൃഷിക്ക് പ്രോത്സാഹനം നല്‍കുന്നു. അവക്കാഡോ, ഡ്രാഗണ്‍ ഫ്രൂട്ട്, സ്‌ട്രോബെറി തുടങ്ങിയ വിളകള്‍ 372 ഹെക്ടറിലായി കൃഷി ചെയ്യുന്നതിനുള്ള നടപടികള്‍ പുരോഗമിക്കുന്നു. വരുമാനസാധ്യത കൂടുതലുള്ള വിളകളിലേക്ക് കൃഷി വ്യാപിപ്പിക്കുന്നതിലൂടെ കര്‍ഷകരുടെ സാമ്പത്തിക സ്ഥിതി മെച്ചപ്പെടുത്തുകയാണ് ലക്ഷ്യം.

ഛത്തീസ്ഗഡിലെ ദന്തേവാഡ ജില്ലയില്‍ പയര്‍വര്‍ഗങ്ങളുടെ കൃഷി പ്രോത്സാഹിപ്പിക്കുന്നതിലൂടെ മണ്ണിന്റെ ഫലഭൂയിഷ്ഠത വര്‍ധിപ്പിക്കാനും വിള വൈവിധ്യവല്‍ക്കരണം നടപ്പാക്കാനുമാണ് ശ്രമം. ബിഹാറിലെ ബങ്ക ജില്ലയില്‍ മണ്ണ് പരിശോധനയ്ക്കും പ്രകൃതിദത്ത കൃഷിരീതികള്‍ക്കും പ്രാധാന്യം നല്‍കുന്നു. രാസവളങ്ങളുടെ ഉപയോഗം കുറയ്ക്കുന്നതിനൊപ്പം മണ്ണിന്റെ ആരോഗ്യം മെച്ചപ്പെടുത്താനും സുസ്ഥിര കൃഷി പ്രോത്സാഹിപ്പിക്കാനും ഇത്തരം ഇടപെടലുകള്‍ സഹായിക്കും.

കാര്‍ഷിക ഉല്‍പ്പാദനം വര്‍ധിപ്പിക്കുക, ജലസേചന സൗകര്യങ്ങള്‍ മെച്ചപ്പെടുത്തുക, വിളവെടുപ്പിന് ശേഷമുള്ള സംഭരണ സംവിധാനങ്ങള്‍ ശക്തിപ്പെടുത്തുക, കര്‍ഷകര്‍ക്ക് ഹ്രസ്വകാല-ദീര്‍ഘകാല വായ്പകള്‍ ലഭ്യമാക്കുക എന്നിവയും പദ്ധതിയുടെ പ്രധാന ലക്ഷ്യങ്ങളാണ്.

സര്‍ക്കാര്‍ സഹായം

2025 ജൂലൈയില്‍ കേന്ദ്ര മന്ത്രിസഭ അംഗീകരിച്ച പ്രധാനമന്ത്രി ധാന്‍-ധാന്യ കൃഷി യോജനയ്ക്ക് 24,000 കോടി രൂപയുടെ ബജറ്റ് വിഹിതമാണുള്ളത്. 2025 ഒക്ടോബര്‍ 11-നാണ് പദ്ധതി ഔദ്യോഗികമായി ആരംഭിച്ചത്. രാജ്യത്തെ കാര്‍ഷിക ഉല്‍പ്പാദനക്ഷമത കുറഞ്ഞതും കൃഷിയുടെ തീവ്രതയും കാര്‍ഷിക വായ്പാ ലഭ്യതയും കുറവുള്ളതുമായ 100 ജില്ലകളെയാണ് പദ്ധതി ലക്ഷ്യമിടുന്നത്.

11 മന്ത്രാലയങ്ങളുടെയും വകുപ്പുകളുടെയും കീഴിലുള്ള 36 നിലവിലുള്ള കേന്ദ്ര പദ്ധതികളും സംസ്ഥാന സര്‍ക്കാരുകളുടെ വിവിധ പദ്ധതികളും സംയോജിപ്പിച്ചാണ് പ്രവര്‍ത്തനങ്ങള്‍ നടപ്പാക്കുന്നത്. ജില്ലാതല പ്രവര്‍ത്തന പദ്ധതികള്‍ തയ്യാറാക്കി അവയുടെ പുരോഗതി വിലയിരുത്തുന്നതിനും കൃത്യമായ നിരീക്ഷണ സംവിധാനങ്ങള്‍ ഒരുക്കുന്നതിനും പ്രത്യേക സംവിധാനവുമുണ്ട്.

കാര്‍ഷിക മേഖലയില്‍ പിന്നാക്കം നില്‍ക്കുന്ന ജില്ലകളുടെ ആവശ്യങ്ങള്‍ തിരിച്ചറിഞ്ഞ് പദ്ധതികള്‍ ഏകോപിപ്പിക്കുന്ന ഈ രീതി, കൃഷിയുടെ ഉല്‍പ്പാദനക്ഷമത വര്‍ധിപ്പിക്കുന്നതിനൊപ്പം ജലസംരക്ഷണം, സുസ്ഥിര കൃഷി, കര്‍ഷക വരുമാന വര്‍ധന എന്നിവയ്ക്കും സഹായകരമാകുമെന്നാണ് വിലയിരുത്തല്‍.

രാജ്യവ്യാപക ലക്ഷ്യം

100 കാര്‍ഷിക മുന്‍ഗണനാ ജില്ലകളിലായി ഏകദേശം 1.7 കോടി കര്‍ഷകര്‍ക്ക് പ്രയോജനം ലഭിക്കുമെന്നാണ് കേന്ദ്ര സര്‍ക്കാരിന്റെ കണക്കുകൂട്ടല്‍. പുരോഗതി വിലയിരുത്തല്‍: പദ്ധതിയുടെ പുരോഗതി 121 സൂചകങ്ങള്‍ ഉപയോഗിച്ച് നിരീക്ഷിക്കുന്നു. ഇതില്‍ 74 എണ്ണം പ്രവര്‍ത്തനങ്ങളുടെ നേട്ടങ്ങളും 47 എണ്ണം അന്തിമ ഫലങ്ങളുമാണ് വിലയിരുത്തുന്നത്. 2025-26 സാമ്പത്തിക വര്‍ഷം മുതല്‍ ആറു വര്‍ഷത്തേക്കാണ് പദ്ധതി വിഭാവനം ചെയ്തിരിക്കുന്നത്. 2026 സെപ്റ്റംബറിലെ കേന്ദ്ര അവലോകനത്തില്‍, 100 ജില്ലകളുടെ ശരാശരി പ്രകടന സ്‌കോര്‍ ഏപ്രിലിലെ 22.54-ല്‍ നിന്ന് ജൂലൈയില്‍ 38.85 ആയി ഉയര്‍ന്നതായി റിപ്പോര്‍ട്ട് ചെയ്തു.