നട്‌സ്-ഡ്രൈ ഫ്രൂട്ട്‌സ് വില പൊള്ളിക്കും; പിസ്താ വില ഇരട്ടിയില്‍

ദീപാവലി ആഘോഷങ്ങള്‍ക്ക് മുന്നോടിയായി ഡ്രൈ ഫ്രൂട്സ് വിപണിയില്‍ വന്‍ വിലക്കയറ്റം. പശ്ചിമേഷ്യയിലെ യുദ്ധസാഹചര്യവും അമേരിക്കയിലെ പിസ്ത ഉല്‍പ്പാദനത്തിലുണ്ടായ ഇടിവുമാണ് ചില്ലറ വില്‍പ്പന വില ഇരട്ടിയാക്കിയത്. ബദാമിന്റെ വിലയിലും 20 ശതമാനത്തോളം വര്‍ധനവുണ്ടായി. വിലക്കയറ്റവും വിതരണത്തിലെ കുറവും കാരണം ദീപാവലി സമ്മാനപ്പൊതികളില്‍ പിസ്തയുടെയും ബദാമിന്റെയും അളവ് കുറയ്ക്കാനും പകരം മറ്റ് സീഡുകളും ബെറികളും ഉള്‍പ്പെടുത്താനും കമ്പനികളും വ്യാപാരികളും നിര്‍ബന്ധിതരായിരിക്കുകയാണ്. എന്നിരുന്നാലും, ഡ്രൈ ഫ്രൂട്സ്, നട്സ് എന്നിവയുടെ സമ്മാനവില്‍പ്പനയില്‍ കഴിഞ്ഞ വര്‍ഷത്തെ അപേക്ഷിച്ച് 5 മുതല്‍ 7 ശതമാനം വര്‍ധനവുണ്ടായതായി വ്യവസായ മേഖലയിലുള്ളവര്‍ അറിയിച്ചു.

ഉയര്‍ന്ന മൂല്യമുള്ള പെക്കാന്‍, മക്കാഡാമിയ, ഹേസല്‍നട്ട് തുടങ്ങിയ നട്സുകള്‍ക്കും വിവിധ ഫ്‌ളേവറുകളിലുള്ള കശുവണ്ടിക്കും പ്രത്യേക സമ്മാനവിപണിയില്‍ ആവശ്യക്കാര്‍ വര്‍ധിച്ചുവരികയാണ്. വ്യവസായ മേഖലയിലെ കണക്കുകള്‍ പ്രകാരം, രാജ്യത്തെ നട്സ്, ഡ്രൈ ഫ്രൂട്സ് എന്നിവയുടെ പ്രതിവര്‍ഷം ഏകദേശം 75,000 കോടി രൂപയുടെ വില്‍പ്പനയില്‍ 30 മുതല്‍ 35 ശതമാനവും നടക്കുന്നത് ദീപാവലി കാലയളവിലാണ്.

താരമായി പിസ്ത

ഈ വര്‍ഷം വിപണിയുടെ താളം തെറ്റിച്ചത് പിസ്തയാണ്. ഇറാന്‍, അഫ്ഗാനിസ്ഥാന്‍, കാലിഫോര്‍ണിയ എന്നിവിടങ്ങളില്‍ നിന്നുള്ള പിസ്തയുടെ വിലയില്‍ വര്‍ധനവുണ്ടായിട്ടുണ്ട്,' നട്ട്സ് ആന്‍ഡ് ഡ്രൈ ഫ്രൂട്സ് കൗണ്‍സില്‍ ഓഫ് ഇന്ത്യയുടെ (NDFC-I) സെന്‍ട്രല്‍ ഗവേണിങ് കൗണ്‍സില്‍ അംഗമായ രവീന്ദ്ര മേത്ത പറഞ്ഞു.

കാലിഫോര്‍ണിയയില്‍ ഈ വര്‍ഷത്തെ പിസ്ത ഉല്‍പ്പാദനം കഴിഞ്ഞ വര്‍ഷത്തെ ഉല്‍പ്പാദനത്തിന്റെ ഏകദേശം 40 ശതമാനം മാത്രമായിരിക്കുമെന്നാണ് പ്രതീക്ഷിക്കുന്നത്. ഇതുമൂലം മൊത്തവിപണിയില്‍ പിസ്തയുടെ വിലയില്‍ 50 ശതമാനം വര്‍ധനവുണ്ടായി. ചില്ലറ വിപണിയില്‍ വര്‍ധനവ് ഇതിലും കൂടുതലാണെന്നും അദ്ദേഹം കൂട്ടിച്ചേര്‍ത്തു.

കാലാവസ്ഥാ വ്യതിയാനങ്ങളെത്തുടര്‍ന്നുള്ള ആഗോള ഉല്‍പ്പാദനക്കുറവ്, ചരക്കുനീക്ക ചെലവിലെ വര്‍ധനവ്, ഇറാനില്‍ നിന്നും അഫ്ഗാനിസ്ഥാനില്‍ നിന്നുമുള്ള വിതരണത്തിലെ കുറവ്, രൂപയുടെ മൂല്യത്തകര്‍ച്ച തുടങ്ങിയ വിവിധ കാരണങ്ങളാല്‍ നട്സ്, ഡ്രൈ ഫ്രൂട്സ് എന്നിവയുടെ മൊത്തത്തിലുള്ള വിലയില്‍ കഴിഞ്ഞ വര്‍ഷത്തെ അപേക്ഷിച്ച് 25-40 ശതമാനം വര്‍ധനവുണ്ടായതായും ഇറക്കുമതിക്കാരും മൊത്തവ്യാപാരികളും ചില്ലറ വ്യാപാരികളും അറിയിച്ചു.

പിസ്തയ്ക്ക് പകരം വില കുറഞ്ഞ ഉല്‍പ്പന്നങ്ങള്‍ ഉള്‍പ്പെടുത്തുന്നുണ്ടെങ്കിലും ബദാം, കശുവണ്ടി, ഉണക്കമുന്തിരി എന്നിവ ഡ്രൈ ഫ്രൂട്സ് സമ്മാനപ്പൊതികളിലെ ഒഴിവാക്കാനാകാത്ത ഘടകങ്ങളാണ്. കോര്‍പ്പറേറ്റ് സ്ഥാപനങ്ങളുടെ സമ്മാനങ്ങള്‍ക്കുള്ള ബജറ്റ് നിശ്ചിതമായതിനാല്‍, ഉല്‍പ്പന്നങ്ങളുടെ അളവ് കുറച്ചാണ് ബജറ്റിനുള്ളില്‍ ചെലവ് നിയന്ത്രിക്കുന്നത്. അതേസമയം, വില്‍പ്പനയില്‍ ഇപ്പോഴും മികച്ച മുന്നേറ്റം തുടരുകയാണ്.

കഴിഞ്ഞ വര്‍ഷത്തെ ദീപാവലി വില്‍പ്പനയുമായി താരതമ്യം ചെയ്യുമ്പോള്‍, ഈ വര്‍ഷം നട്സ്, ഡ്രൈ ഫ്രൂട്സ് എന്നിവയുടെ വില്‍പ്പനയില്‍ ഏകദേശം 5 മുതല്‍ 7 ശതമാനം വര്‍ധനവുണ്ടായിട്ടുണ്ട്. മൊത്തത്തിലുള്ള വില്‍പ്പനയിലും ഒരേ സ്റ്റോറുകളിലെ വില്‍പ്പനയിലും ഈ വളര്‍ച്ച പ്രകടമാണ്.

സമ്മാനപ്പൊതികളില്‍ നിന്ന് പിസ്ത ഏതാണ്ട് പൂര്‍ണമായും അപ്രത്യക്ഷമായിരിക്കുകയാണ്.