മുന്തിരിവണ്ടികള്‍ക്കും വഴിമുട്ടി; ഗള്‍ഫിലേക്കുള്ള കയറ്റുമതി നിലച്ചു, ടണ്‍ കണക്കിന് ചരക്ക് തുറമുഖങ്ങളില്‍ കുടുങ്ങി

അമേരിക്കയും ഇസ്രയേലും ഇറാനും തമ്മിലുള്ള സംഘര്‍ഷം രൂക്ഷമായതോടെമഹാരാഷ്ട്രയിലെ മുന്തിരി കര്‍ഷകരും വെട്ടിലായി. ഗള്‍ഫ് രാജ്യങ്ങളിലേക്കുള്ള മുന്തിരി കയറ്റുമതി പാതിവഴിയില്‍ നിലച്ചു. നവി മുംബൈയിലെ ജവഹര്‍ലാല്‍ നെഹ്‌റു പോര്‍ട്ട് അതോറിറ്റിയില്‍ ആയിരക്കണക്കിന് ടണ്‍ മുന്തിരിയാണ് ഇപ്പോള്‍ വിദേശത്തേക്ക് പോകാനാകാതെ കെട്ടിക്കിടക്കുന്നത്. കടല്‍-വ്യോമ പാതകളിലെ അനിശ്ചിതത്വം കയറ്റുമതി സ്തംഭിപ്പിച്ചു.

കടല്‍ കടക്കാതെ 4000 ടണ്‍ മുന്തിരി

ദുബായ് വഴി ഗള്‍ഫ് വിപണികളിലേക്ക് കയറ്റുമതിക്ക് ഒരുക്കിയ 300 കണ്ടെയ്നറുകളിലായി ഏകദേശം 3,900 ടണ്‍ മുന്തിരി ഇതിനകം കപ്പലുകളില്‍ ലോഡ് ചെയ്തുകഴിഞ്ഞു. ഇതിനുപുറമെ, 700-ഓളം കണ്ടെയ്നറുകള്‍ തുറമുഖത്തും സമീപത്തെ കോള്‍ഡ് സ്റ്റോറേജ് സൗകര്യങ്ങളിലുമായി ഷിപ്പിംഗ് ഷെഡ്യൂളുകള്‍ക്കായി കാത്തിരിക്കുകയാണ്. ലക്ഷ്യസ്ഥാനത്ത് എത്താനാകാതെ ചരക്ക് നീക്കം വൈകുന്നത് വ്യാപാരികളെയും കയറ്റുമതിക്കാരെയും ഒരുപോലെ ആശങ്കയിലാക്കുന്നു.

വിലയിടിയുമോ? ആഭ്യന്തര വിപണിയില്‍ ആശങ്ക

കയറ്റുമതിക്കായി കിലോയ്ക്ക് 120 മുതല്‍ 170 രൂപ വരെ നല്‍കിയാണ് വ്യാപാരികള്‍ കര്‍ഷകരില്‍ നിന്ന് മുന്തിരി സംഭരിച്ചത്. എന്നാല്‍ അന്താരാഷ്ട്ര വിപണി അടഞ്ഞതോടെ, ഈ ഉന്നതനിലവാരമുള്ള മുന്തിരി കുറഞ്ഞ വിലയ്ക്ക് ആഭ്യന്തര വിപണിയില്‍ വില്‍ക്കേണ്ടി വരുമോ എന്ന ഭീതിയിലാണ് ഇവര്‍. കയറ്റുമതി നിലച്ചാല്‍ പ്രാദേശിക വിപണികളില്‍ മുന്തിരിയുടെ വരവ് കുതിച്ചുയരുകയും ഇത് വില കുത്തനെ ഇടിയാന്‍ കാരണമാവുകയും ചെയ്യും.

തോട്ടങ്ങളില്‍ മുരടിക്കുന്നത് 16,000 ടണ്‍ ഉല്‍പ്പന്നം

മഹാരാഷ്ട്ര മുന്തിരി ഉല്‍പ്പാദക അസോസിയേഷന്റെ കണക്കുകള്‍ പ്രകാരം സ്ഥിതി അതീവ ഗുരുതരമാണ്. തുറമുഖങ്ങളിലുള്ള 6,000 ടണ്ണിന് പുറമെ, ഏകദേശം 10,000 ടണ്‍ കയറ്റുമതി നിലവാരമുള്ള മുന്തിരി ഇപ്പോഴും തോട്ടങ്ങളില്‍ വിളവെടുപ്പിന് തയാറായി നില്‍ക്കുന്നു. ഗള്‍ഫ് മേഖലയിലേക്കുള്ള കയറ്റുമതി പുനരാരംഭിച്ചില്ലെങ്കില്‍ ആകെ 16,000 ടണ്‍ മുന്തിരിയുടെ വിപണനത്തെ ഇത് നേരിട്ട് ബാധിക്കും.

റമദാന്‍ വിപണിക്ക് കടുത്ത തിരിച്ചടി

ഗള്‍ഫ് രാജ്യങ്ങളിലെ റമദാന്‍ സീസണ്‍ ലക്ഷ്യമിട്ടാണ് മഹാരാഷ്ട്രയില്‍ നിന്ന് വന്‍തോതില്‍ മുന്തിരി കയറ്റി അയക്കാറുള്ളത്. നോമ്പുകാലത്ത് ദുബായ് ഉള്‍പ്പെടെയുള്ള നഗരങ്ങളില്‍ ഇന്ത്യന്‍ മുന്തിരിക്ക് വന്‍ ഡിമാന്‍ഡാണ് ലഭിക്കാറുള്ളത്. എന്നാല്‍ സീസണ്‍ പാരമ്യത്തില്‍ നില്‍ക്കെ ഉണ്ടായ ഈ തടസ്സം കര്‍ഷകരുടെ പ്രതീക്ഷകള്‍ക്ക് കരിനിഴല്‍ വീഴ്ത്തിയിരിക്കുകയാണ്. വിതരണ ശൃംഖല പുനഃസ്ഥാപിച്ചില്ലെങ്കില്‍ കോടിക്കണക്കിന് രൂപയുടെ നഷ്ടമാണ് മേഖലയെ കാത്തിരിക്കുന്നത്.