Login 
പഠിക്കാം & സമ്പാദിക്കാം 
Home
13 March 2026 3:06 PM IST
വളമില്ല; പ്രതിസന്ധി മറികടക്കാന് ചൈനയില് നിന്ന് യൂറിയ എത്തുമോ?
MyFin Desk
Summary
ലോകത്തിലെ ഏറ്റവും വലിയ യൂറിയ ഉല്പ്പാദകരായ ചൈന, സ്വന്തം രാജ്യത്തെ ആവശ്യങ്ങള്ക്കായി നിലവില് കയറ്റുമതിക്ക് കര്ശന നിയന്ത്രണങ്ങള് ഏര്പ്പെടുത്തിയിട്ടുണ്ട്
പശ്ചിമേഷ്യന് സംഘര്ഷത്തെത്തുടര്ന്ന് ആഗോളതലത്തില് പ്രകൃതിവാതക വിതരണം താറുമാറായതോടെ, രാജ്യം നേരിടുന്ന കടുത്ത വളംക്ഷാമം പരിഹരിക്കാന് കേന്ദ്ര സര്ക്കാര് ചൈനയുടെ സഹായം തേടുന്നു. യുദ്ധസാഹചര്യങ്ങള് കാരണം എല്പിജി ഇറക്കുമതി സ്തംഭിച്ചതും വാതകവില കുതിച്ചുയര്ന്നതും ഇന്ത്യയിലെ വളം ഫാക്ടറികളുടെ പ്രവര്ത്തനത്തെ സാരമായി ബാധിച്ചിരിക്കുകയാണ്. മിക്കഫാക്ടറികളും അടച്ചിട്ടു. വരാനിരിക്കുന്ന കൃഷി സീസണില് കര്ഷകര് പ്രതിസന്ധിയിലാകാതിരിക്കാന് ചൈനയില് നിന്ന് വന്തോതില് യൂറിയ ഇറക്കുമതി ചെയ്യാനാണ് നയതന്ത്രതലത്തില് ഇപ്പോള് നീക്കം നടക്കുന്നത്.
ലോകത്തിലെ ഏറ്റവും വലിയ യൂറിയ ഉല്പ്പാദകരായ ചൈന, സ്വന്തം രാജ്യത്തെ ആവശ്യങ്ങള്ക്കായി നിലവില് കയറ്റുമതിക്ക് കര്ശന നിയന്ത്രണങ്ങള് ഏര്പ്പെടുത്തിയിട്ടുണ്ട്. എന്നാല് ഇന്ത്യയുമായുള്ള പ്രത്യേക ചര്ച്ചകളിലൂടെ ഈ നിയന്ത്രണങ്ങളില് ഇളവ് വരുത്തി നിശ്ചിത അളവ് യൂറിയ ലഭ്യമാക്കാനാണ് കേന്ദ്രം ശ്രമിക്കുന്നത്. കാര്ഷിക മേഖലയുടെ നിലനില്പ്പിന് യൂറിയ അത്യാവശ്യമായതിനാല്, ചൈനയുമായുള്ള ഈ ഇടപാട് ഇന്ത്യന് കര്ഷകര്ക്ക് വലിയ ആശ്വാസമാകും.
വാതകക്ഷാമം കാരണം ആഭ്യന്തരമായി യൂറിയ ഉല്പ്പാദിപ്പിക്കുന്നത് നിലവില് വന് സാമ്പത്തിക ബാധ്യതയാണ് കമ്പനികള്ക്ക് വരുത്തിവെക്കുന്നത്. ഒരു ടണ് യൂറിയ നിര്മ്മിക്കാനുള്ള ചെലവ് അന്താരാഷ്ട്ര വിപണിയിലെ വിലയേക്കാള് ഉയര്ന്ന നിലയിലായതോടെ ഇറക്കുമതി മാത്രമാണ് ഏക പോംവഴിയെന്ന് ഉദ്യോഗസ്ഥര് വിലയിരുത്തുന്നു. ഇന്ധന വിതരണത്തിലെ തടസ്സങ്ങള് പരിഹരിക്കപ്പെടുന്നത് വരെ വിപണിയില് വളം ലഭ്യത ഉറപ്പാക്കാന് ഈ നീക്കം അത്യന്താപേക്ഷിതമാണ്.
അതിര്ത്തി തര്ക്കങ്ങള് നിലനില്ക്കുന്നുണ്ടെങ്കിലും, കര്ഷകരുടെ താല്പര്യവും രാജ്യത്തിന്റെ ഭക്ഷ്യസുരക്ഷയും മുന്നിര്ത്തി ഇരുരാജ്യങ്ങളും സാമ്പത്തിക സഹകരണത്തിന് തയ്യാറായേക്കും. വരും മാസങ്ങളില് കൂടുതല് യൂറിയ കപ്പല് മാര്ഗ്ഗം ഇന്ത്യന് തുറമുഖങ്ങളില് എത്തിക്കാനാണ് ലക്ഷ്യമിടുന്നത്. ഇത് നടപ്പിലാകുന്നതോടെ വളംക്ഷാമം കൂടാതെ കൃഷിയിറക്കാന് കര്ഷകര്ക്ക് സാധിക്കും.