വിത്ത് മുതല്‍ കോടികള്‍ വരെ; പയര്‍വര്‍ഗ സ്വയംപര്യാപ്തതക്ക് ഇന്ത്യയുടെ മാസ്റ്റര്‍പ്ലാന്‍

പയര്‍വര്‍ഗ ഉല്‍പ്പാദനത്തില്‍ സ്വയംപര്യാപ്തത കൈവരിക്കാനും ഇറക്കുമതിയെ ആശ്രയിക്കുന്നത് കുറയ്ക്കാനും ലക്ഷ്യമിട്ട് കേന്ദ്രസര്‍ക്കാരിന്റെ പദ്ധതിപുരോഗമിക്കുന്നു. 2025-26 മുതല്‍ 2030-31 വരെയുള്ള ആറുവര്‍ഷത്തേക്ക് 11,440 കോടി രൂപ ചെലവഴിക്കുന്ന പദ്ധതിയിലൂടെ വാര്‍ഷിക ഉല്‍പ്പാദനം 350 ലക്ഷം ടണ്ണായി ഉയര്‍ത്തുകയാണ് ലക്ഷ്യം. മികച്ച വിത്തുകള്‍, കര്‍ഷകര്‍ക്ക് ന്യായമായ വില, ഉറപ്പായ സംഭരണം, സംസ്‌കരണ സൗകര്യങ്ങള്‍ എന്നിവ ഉറപ്പാക്കിയാണ് പദ്ധതി നടപ്പാക്കുന്നത്.

രാജ്യത്തെ പയര്‍വര്‍ഗ ഉല്‍പ്പാദനം ഇതിനകം വര്‍ധിച്ചിട്ടുണ്ട്. 2025-26ല്‍ 274.09 ലക്ഷം ടണ്‍ പയര്‍വര്‍ഗങ്ങള്‍ ഉല്‍പ്പാദിപ്പിച്ചതായാണ് കണക്ക്. മുന്‍വര്‍ഷം ഇത് 256.83 ലക്ഷം ടണ്ണായിരുന്നു. കൃഷി ചെയ്ത വിസ്തൃതി 277.20 ലക്ഷം ഹെക്ടറില്‍നിന്ന് 286.46 ലക്ഷം ഹെക്ടറായി ഉയര്‍ന്നപ്പോള്‍ ഹെക്ടറിലെ ശരാശരി ഉല്‍പ്പാദനവും 926 കിലോഗ്രാമില്‍നിന്ന് 957 കിലോഗ്രാമായി വര്‍ധിച്ചു. ഇതോടൊപ്പം പയര്‍വര്‍ഗ ഇറക്കുമതിയുടെ മൂല്യം 31.52 ശതമാനം കുറഞ്ഞ് 31,793.59 കോടിയായി. കയറ്റുമതി മൂല്യമാകട്ടെ 13.40 ശതമാനം വര്‍ധിച്ച് 969.53 ദശലക്ഷം ഡോളറിലെത്തി.

തുവര, ഉഴുന്ന്, മസൂര്‍( ചുവന്ന പരിപ്പ്) തുടങ്ങിയ പയര്‍വര്‍ഗങ്ങളുടെ ഉല്‍പ്പാദനത്തിനാണ് ദൗത്യത്തില്‍ പ്രത്യേക ശ്രദ്ധ. കാലാവസ്ഥയെ പ്രതിരോധിക്കുന്ന വിത്തിനങ്ങള്‍ പ്രോത്സാഹിപ്പിക്കുന്നതിനൊപ്പം ആറുവര്‍ഷത്തിനുള്ളില്‍ 87.5 ലക്ഷം സൗജന്യ വിത്ത് കിറ്റുകളും 126 ലക്ഷം ക്വിന്റല്‍ സര്‍ട്ടിഫൈഡ് വിത്തുകളും വിതരണം ചെയ്യാനും ലക്ഷ്യമിടുന്നു. കര്‍ഷകര്‍ക്ക് മെച്ചപ്പെട്ട വില ഉറപ്പാക്കുന്നതിന്റെ ഭാഗമായി ഉഴുന്നിന്റെ താങ്ങുവില ക്വിന്റലിന് 8,200 രൂപയായും തുവരയുടേത് 8,450 രൂപയായും ഉയര്‍ത്തിയിട്ടുണ്ട്. രജിസ്റ്റര്‍ ചെയ്ത കര്‍ഷകര്‍ വില്‍ക്കാന്‍ തയ്യാറാകുന്ന തുവര, മസൂര്‍, ഉഴുന്ന് എന്നിവയുടെ 100 ശതമാനം വരെ സംഭരിക്കാനും കേന്ദ്ര ഏജന്‍സികള്‍ക്ക് അനുമതിയുണ്ട്.

കൃഷി വിപുലീകരിക്കുന്നതിനൊപ്പം രാജ്യത്ത് 1,000 പയര്‍ സംസ്‌കരണ യൂണിറ്റുകള്‍ സ്ഥാപിക്കാനും സര്‍ക്കാര്‍ ലക്ഷ്യമിടുന്നു. ആദ്യഘട്ടത്തില്‍ 528 യൂണിറ്റുകള്‍ക്ക് അനുമതി നല്‍കിയിട്ടുണ്ട്. നെല്‍കൃഷി തരിശുഭൂമികളില്‍ പയര്‍കൃഷി വ്യാപിപ്പിക്കല്‍, ഡിജിറ്റല്‍ സംവിധാനങ്ങളിലൂടെ വിത്തുകളുടെ വിതരണം നിരീക്ഷിക്കല്‍, കര്‍ഷകര്‍ക്ക് നേരിട്ടുള്ള പണമിടപാടുകള്‍ ഉറപ്പാക്കല്‍ എന്നിവയും പദ്ധതിയുടെ ഭാഗമാണ്. ഉല്‍പ്പാദനം വര്‍ധിപ്പിക്കുന്നതിലൂടെ രാജ്യത്തിന്റെ പോഷകസുരക്ഷ ശക്തിപ്പെടുത്താനും കര്‍ഷകരുടെ വരുമാനം മെച്ചപ്പെടുത്താനും പയര്‍വര്‍ഗ ഇറക്കുമതിയെ ആശ്രയിക്കുന്നത് കുറയ്ക്കാനുമാണ് കേന്ദ്രം ലക്ഷ്യമിടുന്നത്.