Login 
പഠിക്കാം & സമ്പാദിക്കാം 
Home
15 May 2026 3:18 PM IST
കാത്തിരിപ്പിന് വിരാമം; കാലവര്ഷം മെയ് 26-ന് കേരളത്തിലെത്തും, പ്രവചനവുമായി ഐഎംഡി
MyFin Desk
Summary
കേരളം മഴയ്ക്കായി കാത്തിരിക്കുമ്പോള്, വടക്കന്-മധ്യ ഇന്ത്യ കടുത്ത ഉഷ്ണതരംഗത്തിന്റെ പിടിയിലാണ്. ഡല്ഹിയില് വ്യാഴാഴ്ച രേഖപ്പെടുത്തിയ 40.6 ഡിഗ്രി സെല്ഷ്യസ് മെയ് മാസത്തിലെ ഏറ്റവും ഉയര്ന്ന താപനിലയാണ്
കേരളത്തിന് ആശ്വാസമേകി തെക്കുപടിഞ്ഞാറന് മണ്സൂണ് ഈ മാസം 26-ന് എത്താന് സാധ്യതയുണ്ടെന്ന് ഇന്ത്യന് കാലാവസ്ഥാ വകുപ്പ് അറിയിച്ചു. നിശ്ചിത തീയതിയില് നിന്ന് നാല് ദിവസത്തെ മാറ്റം പ്രവചനത്തില് വരാമെങ്കിലും, വരും മണിക്കൂറുകളില് ആന്ഡമാന് കടലിലും തെക്കന് ബംഗാള് ഉള്ക്കടലിലും മണ്സൂണ് സജീവമാകാന് സാഹചര്യങ്ങള് അനുകൂലമാണ്. കേരളത്തിന് പുറമെ തമിഴ്നാട്, കര്ണാടക എന്നിവിടങ്ങളിലും അടുത്ത ഏതാനും ദിവസങ്ങളില് ശക്തമായ മഴ ലഭിക്കുമെന്നാണ് പ്രവചനം.
കേരളം മഴയ്ക്കായി കാത്തിരിക്കുമ്പോള്, വടക്കന്-മധ്യ ഇന്ത്യ കടുത്ത ഉഷ്ണതരംഗത്തിന്റെ പിടിയിലാണ്. ഡല്ഹിയില് വ്യാഴാഴ്ച രേഖപ്പെടുത്തിയ 40.6 ഡിഗ്രി സെല്ഷ്യസ് മെയ് മാസത്തിലെ ഏറ്റവും ഉയര്ന്ന താപനിലയാണ്. വരും ദിവസങ്ങളില് രാജസ്ഥാന്, ഉത്തര്പ്രദേശ്, പഞ്ചാബ്, ഹരിയാന തുടങ്ങിയ സംസ്ഥാനങ്ങളില് ചൂട് ഇനിയും വര്ധിക്കുമെന്നും ചിലയിടങ്ങളില് ഇത് അതിതീവ്ര ഉഷ്ണതരംഗമായി മാറാന് സാധ്യതയുണ്ടെന്നും കാലാവസ്ഥാ കേന്ദ്രം മുന്നറിയിപ്പ് നല്കുന്നു.
രാജസ്ഥാനിലെ പടിഞ്ഞാറന് മേഖലകളില് മെയ് 18 മുതല് 21 വരെ കടുത്ത ഉഷ്ണതരംഗം അനുഭവപ്പെടും. ഇതിനുപുറമെ ഉത്തര്പ്രദേശിലും ഹരിയാനയിലും ഡല്ഹിയിലും വരുന്ന ആഴ്ച മുഴുവന് ഉയര്ന്ന താപനില തുടരും. മധ്യപ്രദേശ്, മഹാരാഷ്ട്രയിലെ വിദര്ഭ, മറാത്ത്വാഡ മേഖലകള് എന്നിവിടങ്ങളിലും ജനങ്ങള് ജാഗ്രത പാലിക്കണമെന്ന് നിര്ദ്ദേശമുണ്ട്. ഉത്തരേന്ത്യ ചുട്ടുപൊള്ളുമ്പോള് വടക്കുകിഴക്കന് ഇന്ത്യയിലും ദക്ഷിണേന്ത്യയിലെ ചില ഭാഗങ്ങളിലും ഒറ്റപ്പെട്ട കനത്ത മഴ ലഭിക്കും.
അടുത്ത മൂന്ന് മുതല് നാല് ദിവസം വരെ കേരളം, മാഹി, ലക്ഷദ്വീപ്, തെക്കന് കര്ണാടക എന്നിവിടങ്ങളില് ഇടിമിന്നലോടു കൂടിയ മഴയുണ്ടാകും. ആന്ഡമാന് നിക്കോബാര് ദ്വീപുകളില് മണ്സൂണ് എത്തുന്നതോടെ മഴയുടെ വ്യാപനം വര്ധിക്കും. ഉഷ്ണതരംഗ ഭീഷണിയുള്ള പ്രദേശങ്ങളില് പകല്സമയത്ത് പുറത്തിറങ്ങുന്നവര് ജാഗ്രത പാലിക്കണമെന്നും നിര്ദ്ദേശമുണ്ട്. മഴയുടെ വരവോടെ ദക്ഷിണേന്ത്യയിലെ താപനിലയില് കുറവുണ്ടാകുമെന്നാണ് പ്രതീക്ഷിക്കുന്നത്.