ഇലക്ട്രിക് വിപ്ലവവുമായി ടിവിഎസ്; വില കേട്ടാല്‍ ഞെട്ടും

ഇലക്ട്രിക് വാഹന വിപണിയില്‍ വമ്പന്‍ പ്രഖ്യാപനവുമായി ടിവിഎസ് മോട്ടോര്‍ കമ്പനി. കുറഞ്ഞ ചെലവില്‍ കൂടുതല്‍ മൈലേജ് വാഗ്ദാനം ചെയ്യുന്ന പുത്തന്‍ ഇലക്ട്രിക് സ്‌കൂട്ടര്‍ 'ടിവിഎസ് ഓര്‍ബിറ്റര്‍ വി1' വിപണിയിലിറക്കി. അത്യാധുനിക ഫീച്ചറുകളുമായി എത്തുന്ന ഈ സ്‌കൂട്ടര്‍, സാധാരണക്കാര്‍ക്കും ഇവി സ്വപ്നം യാഥാര്‍ത്ഥ്യമാക്കാന്‍ സഹായിക്കുന്ന വിപ്ലവകരമായ 'ബാറ്ററി-ആസ്-എ-സര്‍വീസ്' പദ്ധതിയിലൂടെയാണ് അവതരിപ്പിച്ചിരിക്കുന്നത്. ഇതോടെ 49,999 രൂപ പ്രാരംഭ വിലയില്‍ (ഡല്‍ഹി എക്‌സ്‌ഷോറൂം) ഉപഭോക്താക്കള്‍ക്ക് ഈ വാഹനം സ്വന്തമാക്കാം.

നഗരയാത്രകള്‍ സുഗമമാക്കാന്‍ രൂപകല്‍പ്പന ചെയ്ത ഓര്‍ബിറ്ററിന് ഒറ്റ ചാര്‍ജിംഗില്‍ 86 കിലോമീറ്റര്‍ റേഞ്ച് ലഭിക്കും. വെറും 2 മണിക്കൂര്‍ 20 മിനിറ്റ് കൊണ്ട് ബാറ്ററി 80 ശതമാനം വരെ ചാര്‍ജ് ചെയ്യാം എന്നതും ഇതിന്റെ പ്രത്യേകതയാണ്. 1.8 KWh ബാറ്ററി ശേഷിയുള്ള വി1 മോഡലിന് പുറമെ, കൂടുതല്‍ കരുത്തുള്ള വി2 മോഡലും ടിവിഎസ് നിരയിലുണ്ട്. കണക്റ്റഡ് മൊബൈല്‍ ആപ്പ്, എല്‍ഇഡി ഹെഡ്ലാമ്പ്, ഇന്‍കമിങ് കോള്‍ ഡിസ്പ്ലേയോടു കൂടിയ എല്‍സിഡി ക്ലസ്റ്റര്‍ തുടങ്ങി പ്രീമിയം ഫീച്ചറുകളെല്ലാം ഇതില്‍ ഉള്‍പ്പെടുത്തിയിട്ടുണ്ട്.

ബാറ്ററിക്ക് വലിയ തുക മുന്‍കൂട്ടി നല്‍കുന്നതിന് പകരം, ഉപയോഗത്തിനനുസരിച്ച് മാസത്തവണകളായി തുക അടയ്ക്കുന്ന രീതിയാണ് BaaS. പ്രതിമാസം 862 രൂപ മുതല്‍ ആരംഭിക്കുന്ന പ്ലാനുകള്‍ ലഭ്യമാണ്. ഈ പദ്ധതി പ്രകാരം ബാറ്ററിക്ക് 5 വര്‍ഷം അല്ലെങ്കില്‍ 70,000 കിലോമീറ്റര്‍ വരെ വാറന്റിയും ലഭിക്കും. ബാറ്ററിയുടെ ഉത്തരവാദിത്തം കമ്പനി ഏറ്റെടുക്കുന്നതോടെ ഉപഭോക്താക്കള്‍ക്ക് മെയിന്റനന്‍സ് കാര്യത്തില്‍ പൂര്‍ണ്ണ സമാധാനം ഉറപ്പാക്കാം എന്നതാണ് ഇതിന്റെ ഏറ്റവും വലിയ ആകര്‍ഷണം.

മികച്ച ഡിസൈനും സുരക്ഷാ ഫീച്ചറുകളും ഓര്‍ബിറ്ററിനെ വേറിട്ടു നിര്‍ത്തുന്നു. ആന്റി-തെഫ്റ്റ് അലേര്‍ട്ട്, ജിയോ-ഫെന്‍സിങ്, ഹില്‍ ഹോള്‍ഡ് അസിസ്റ്റ്, ക്രൂയിസ് കണ്‍ട്രോള്‍ എന്നിവ ഡ്രൈവിംഗ് കൂടുതല്‍ എളുപ്പമാക്കും. രണ്ട് ഹെല്‍മെറ്റുകള്‍ വരെ വെക്കാന്‍ സാധിക്കുന്ന 34 ലിറ്റര്‍ സ്റ്റോറേജ് സൗകര്യവും ഇതിലുണ്ട്. സാധാരണ പെട്രോള്‍ സ്‌കൂട്ടറുകളേക്കാള്‍ കുറഞ്ഞ ചെലവില്‍ പ്രീമിയം ഇലക്ട്രിക് അനുഭവം നല്‍കുന്നതിലൂടെ ഇന്ത്യയിലെ ഇവി വിപണിയില്‍ വന്‍ കുതിച്ചുചാട്ടമാണ് ടിവിഎസ് ലക്ഷ്യമിടുന്നത്.