Aprilia Launches New- അപ്രീലിയ എസ്എക്‌സ്ആര്‍ ജിടി ശ്രേണി അവതരിപ്പിച്ചു; ജിടി 125, ജിടി 175 മോഡലുകള്‍ വിപണിയില്‍

പ്രമുഖ സ്‌കൂട്ടര്‍ നിര്‍മാതാക്കളായ അപ്രീലിയ പുതിയ എസ്എക്‌സ്ആര്‍ ജിടി ശ്രേണി വിപണിയില്‍ അവതരിപ്പിച്ചു. എസ്എക്‌സ്ആര്‍ ജിടി 125, എസ്എക്‌സ്ആര്‍ ജിടി 175 എന്നീ രണ്ട് മോഡലുകളാണ് ശ്രേണിയിലുള്ളത്. കമ്പനിയുടെ നിലവിലെ എസ്ആര്‍ ശ്രേണിയില്‍ ഉപയോഗിക്കുന്ന പ്ലാറ്റ്‌ഫോമിനെ അടിസ്ഥാനമാക്കിയാണ് പുതിയ സ്‌കൂട്ടറുകള്‍ ഒരുക്കിയിരിക്കുന്നത്. മോഡലുകളുടെ ബുക്കിങ് ഇതിനകം ആരംഭിച്ചിട്ടുണ്ട്.

ശ്രേണിയിലെ ഉയര്‍ന്ന മോഡലായ എസ്എക്‌സ്ആര്‍ ജിടി 175ന് 174.7 സിസി എച്ച്പി-ഇ സിംഗിള്‍ സിലിണ്ടര്‍, എയര്‍ കൂള്‍ഡ് എന്‍ജിനാണ് കരുത്തേകുന്നത്. 7200 ആര്‍പിഎമ്മില്‍ 13 ബിഎച്ച്പി പരമാവധി കരുത്തും 6000 ആര്‍പിഎമ്മില്‍ 14.14 എന്‍എം ടോര്‍ക്കും എന്‍ജിന്‍ ഉല്‍പ്പാദിപ്പിക്കും. അതേസമയം, എസ്എക്‌സ്ആര്‍ ജിടി 125ല്‍ 124.5 സിസി എച്ച്പി-ഇ സിംഗിള്‍ സിലിണ്ടര്‍, എയര്‍ കൂള്‍ഡ് എന്‍ജിനാണ് ഉപയോഗിച്ചിരിക്കുന്നത്. 7400 ആര്‍പിഎമ്മില്‍ 10.5 ബിഎച്ച്പി കരുത്തും 6200 ആര്‍പിഎമ്മില്‍ 10.4 എന്‍എം ടോര്‍ക്കും ഈ എന്‍ജിന്‍ നല്‍കും.

ബ്രേക്കിങ് സംവിധാനത്തിലും ഇരു മോഡലുകളിലും വ്യത്യാസങ്ങളുണ്ട്. മുന്നില്‍ 220 എംഎം ഡിസ്‌ക് ബ്രേക്കും പിന്നില്‍ 140 എംഎം ഡ്രം ബ്രേക്കുമാണ് നല്‍കിയിരിക്കുന്നത്. എസ്എക്‌സ്ആര്‍ ജിടി 175ല്‍ സിംഗിള്‍ ചാനല്‍ എബിഎസ് ലഭിക്കും. എന്നാല്‍ ജിടി 125ല്‍ കോംബി ബ്രേക്കിങ് സിസ്റ്റമാണ് ഉപയോഗിച്ചിരിക്കുന്നത്. രണ്ട് മോഡലുകളിലും 14 ഇഞ്ച് വീലുകളും ട്രൈപോഡ് എല്‍ഇഡി ഹെഡ്‌ലാമ്പും ലഭിക്കും.

ഫീച്ചറുകളുടെ കാര്യത്തിലും ജിടി 175 കൂടുതല്‍ മുന്നിലാണ്. ബ്ലൂടൂത്ത് സ്മാര്‍ട്ട്‌ഫോണ്‍ കണക്റ്റിവിറ്റി, ടേണ്‍-ബൈ-ടേണ്‍ നാവിഗേഷന്‍, ഹാന്‍ഡില്‍ബാറിലെ അധിക കണ്‍ട്രോളുകള്‍ എന്നിവ ഉള്‍പ്പെടുന്ന അഞ്ച് ഇഞ്ച് ടിഎഫ്ടി ഡിസ്‌പ്ലേയാണ് മോഡലില്‍ നല്‍കിയിരിക്കുന്നത്. ചൂടില്‍ നിന്ന് കൂടുതല്‍ സംരക്ഷണം നല്‍കുന്ന പുതിയ മഫ്‌ളറും ലഭിക്കും. ജിടി 125ല്‍ അഞ്ച് ഇഞ്ച് മോണോക്രോം എല്‍സിഡി ഇന്‍സ്ട്രുമെന്റ് ക്ലസ്റ്ററാണ് നല്‍കിയിരിക്കുന്നത്.

നിറങ്ങളിലും ഗ്രാഫിക്‌സിലും പുതിയ മാറ്റങ്ങളോടെയാണ് രണ്ട് മോഡലുകളും എത്തുന്നത്. ഫുട്‌ബോര്‍ഡ് ഗ്രാഫിക്‌സിനൊപ്പം മെറ്റാലിക് ബ്ലൂ, മാറ്റ് ബ്ലാക്ക്, മാറ്റ് ഗ്രീന്‍ നിറങ്ങളിലാണ് എസ്എക്‌സ്ആര്‍ ജിടി 175 ലഭിക്കുക. ജിടി 125 മാറ്റ് ബ്ലാക്ക്, ഗ്ലോസി അസൂറോ, ഗ്ലോസി വൈറ്റ് എന്നീ നിറങ്ങളിലും വിപണിയിലെത്തും.