ഇക്കോയുടെ ലുക്ക് മാറ്റിമറിക്കാന്‍ സ്റ്റാര്‍ എഡിഷന്‍; സ്‌പെഷ്യല്‍ പാക്കേജുമായി മാരുതി സുസുക്കി

ഇന്ത്യന്‍ നിരത്തുകളിലെ ജനപ്രിയ വാനായ ഇക്കോയ്ക്ക് പുത്തന്‍ മുഖച്ഛായ നല്‍കിക്കൊണ്ട് മാരുതി സുസുക്കി പുതിയ സ്റ്റാര്‍ എഡിഷന്‍ ആക്‌സസറി പാക്കേജ് അവതരിപ്പിച്ചു. വാഹനത്തിന്റെ ലുക്ക് വര്‍ധിപ്പിക്കുന്നതിനായി എക്സ്റ്റീരിയറിലും ഇന്റീരിയറിലും 18 പുതുമകളുമായാണ് ഈ പ്രത്യേക എഡിഷന്‍ എത്തുന്നത്. എഞ്ചിന്‍ കരുത്തിലോ മറ്റ് സാങ്കേതിക ഫീച്ചറുകളിലോ മാറ്റമില്ലാതെ, വാഹനത്തിന് കൂടുതല്‍ പ്രീമിയം ലുക്ക് നല്‍കുകയാണ് ഈ പാക്കേജിലൂടെ മാരുതി ലക്ഷ്യമിടുന്നത്.

ആകര്‍ഷകമായ ഓഫറാണ് ഈ പാക്കേജിന്റെ ഏറ്റവും വലിയ സവിശേഷത. നേരത്തെ 37,000 രൂപ വിലയുണ്ടായിരുന്ന ഈ ആക്‌സസറി കിറ്റ് ഇപ്പോള്‍ വെറും 19,999 രൂപയ്ക്ക് ഉപഭോക്താക്കള്‍ക്ക് സ്വന്തമാക്കാം. ഡീലര്‍ തലത്തില്‍ ഘടിപ്പിക്കാവുന്ന ഈ ഓപ്ഷണല്‍ പാക്കേജ് അഞ്ച് സീറ്റര്‍ എസി, അഞ്ച് സീറ്റര്‍ എസി സിഎന്‍ജി എന്നീ വേരിയന്റുകളില്‍ ലഭ്യമാണ്. എക്‌സ്-ഷോറൂം വിലയ്ക്ക് പുറമെയാണിത് ഈടാക്കുക.

സ്റ്റാര്‍ എഡിഷന്‍ പാക്കേജില്‍ ഉള്‍പ്പെടുത്തിയിരിക്കുന്ന 18 ആക്‌സസറികള്‍ വാഹനത്തിന്റെ ഭംഗി ഇരട്ടിയാക്കുന്നു. പുറംഭാഗത്ത് റിയര്‍ സ്‌പോയിലര്‍, ക്രോം ഗാര്‍ണിഷോട് കൂടിയ ഫോഗ് ലാമ്പുകള്‍, ആകര്‍ഷകമായ വീല്‍ കവറുകള്‍, ഡോര്‍ വൈസറുകള്‍, മഡ് ഫ്‌ലാപ്പുകള്‍, പ്രത്യേക ക്രോം ബാഡ്ജിംഗ് എന്നിവ പ്രധാന ആകര്‍ഷണങ്ങളാണ്. ഇന്റീരിയറിലും മാരുതി ചെറിയ മാറ്റങ്ങള്‍ വരുത്തിയിട്ടുണ്ട്. സുരക്ഷയ്ക്കായി ആറ് എയര്‍ബാഗുകള്‍, എബിഎസ് , ഇഎസ്പി , റിവേഴ്സ് പാര്‍ക്കിംഗ് സെന്‍സറുകള്‍ എന്നിവയും ഈക്കോയുടെ സവിശേഷതയാണ്.

വിലയുടെ കാര്യത്തിലും സാധാരണക്കാര്‍ക്ക് ഇക്കോ പ്രിയങ്കരമായി തുടരുന്നു. വാഹനത്തിന്റെ അടിസ്ഥാന വില 5.18 ലക്ഷം രൂപ മുതല്‍ 6.36 ലക്ഷം രൂപ വരെയാണ് (എക്‌സ്-ഷോറൂം). പുതിയ സ്റ്റാര്‍ എഡിഷന്‍ പാക്കേജ് കൂടി ഉള്‍പ്പെടുത്തുമ്പോള്‍ എന്‍ട്രി വേരിയന്റിന്റെ വില ഏകദേശം 5.21 ലക്ഷം രൂപയില്‍ ആരംഭിക്കും. റീക്ലൈനിംഗ് ഫ്രണ്ട് സീറ്റുകളും എയര്‍ ഫില്‍ട്ടറുമുള്ള ഇക്കോയുടെ ഈ പരിഷ്‌കരിച്ച രൂപം കുടുംബങ്ങള്‍ക്കും ചെറുകിട വ്യാപാരികള്‍ക്കും ഒരുപോലെ പ്രിയപ്പെട്ടതാകുമെന്നാണ് കമ്പനിയുടെ പ്രതീക്ഷ.