ഹ്യുണ്ടായ് കാര്‍ വാങ്ങാന്‍ പദ്ധതിയുണ്ടോ? പഴയ വിലയില്‍ വാങ്ങാന്‍ അവസാന അവസരം

നിങ്ങള്‍ ഒരു ഹ്യുണ്ടായ് കാര്‍ സ്വന്തമാക്കാന്‍ ആഗ്രഹിക്കുന്നുണ്ടെങ്കില്‍ ഒട്ടും വൈകരുത്. പ്രമുഖ വാഹന നിര്‍മ്മാതാക്കളായ ഹ്യുണ്ടായ് മോട്ടോര്‍ ഇന്ത്യ തങ്ങളുടെ കാറുകളുടെ വില വര്‍ധിപ്പിക്കാന്‍ ഒരുങ്ങുകയാണ്. ഉല്‍പ്പാദന ചെലവ് വര്‍ധിച്ച സാഹചര്യത്തില്‍ മെയ് മുതല്‍ വാഹന വിലയില്‍ 1 ശതമാനം വരെ വര്‍ധനവ് ഉണ്ടാകുമെന്ന് കമ്പനി ഔദ്യോഗികമായി അറിയിച്ചു. നിലവിലെ

എക്‌സ്-ഷോറൂം വിലയില്‍ കാര്‍ സ്വന്തമാക്കാന്‍ ആഗ്രഹിക്കുന്നവര്‍ക്ക് ഈ മാസം കൂടി മാത്രമേ അവസരമുള്ളൂ.

ഈ വര്‍ഷം ഇത് രണ്ടാം തവണയാണ് ഹ്യുണ്ടായ് വില വര്‍ധിപ്പിക്കുന്നത്. നേരത്തെ ജനുവരിയില്‍ ശരാശരി 0.6 ശതമാനം വര്‍ധനവ് വരുത്തിയിരുന്നു. നിലവില്‍ ഇന്ത്യന്‍ വിപണിയില്‍ 5.55 ലക്ഷം രൂപ മുതല്‍ 46.30 ലക്ഷം രൂപ വരെയുള്ള വിപുലമായ മോഡലുകള്‍ ഹ്യുണ്ടായ്ക്കുണ്ട്. എന്‍ട്രി ലെവല്‍ മോഡലായ ഗ്രാന്‍ഡ് i10 നിയോസ് മുതല്‍ പ്രീമിയം ഇലക്ട്രിക് വാഹനമായ അയോണിക് 5 വരെ ഈ വില വര്‍ധനവിന്റെ പരിധിയില്‍ വരും. മോഡലുകള്‍ക്കും വേരിയന്റുകള്‍ക്കും അനുസരിച്ചായിരിക്കും വിലയിലെ മാറ്റം.

ക്രെറ്റ, വെന്യു, എക്സ്റ്റര്‍, അല്‍കാസര്‍ തുടങ്ങിയ ജനപ്രിയ എസ്യുവികള്‍ക്കും , വെര്‍ണ, ഓറ തുടങ്ങിയ സെഡാനുകള്‍ക്കും പുതിയ നിരക്കുകള്‍ ബാധകമാകും. വര്‍ധിച്ചുവരുന്ന ചെലവുകള്‍ കമ്പനി തന്നെ വഹിക്കാന്‍ പരമാവധി ശ്രമിച്ചുവെന്നും, എന്നാല്‍ അനിവാര്യമായ സാഹചര്യത്തിലാണ് ഈ ചെറിയ വര്‍ധനവ് ഉപഭോക്താക്കളിലേക്ക് കൈമാറുന്നതെന്നും ഹ്യുണ്ടായ് റെഗുലേറ്ററി ഫയലിംഗില്‍ വ്യക്തമാക്കി. മെയ് മാസത്തിന് മുന്‍പ് ബുക്ക് ചെയ്യുന്നവര്‍ക്ക് പഴയ നിരക്കില്‍ വാഹനം ലഭിക്കാനുള്ള സാധ്യതയുള്ളതിനാല്‍ ഇപ്പോള്‍ തന്നെ ഷോറൂമുകളില്‍ തിരക്ക് വര്‍ധിക്കാനാണ് സാധ്യത.

കഴിഞ്ഞ സാമ്പത്തിക വര്‍ഷത്തെ കണക്കുകള്‍ പ്രകാരം ഹ്യുണ്ടായിയുടെ ആഭ്യന്തര വില്‍പ്പനയില്‍ 2.3 ശതമാനത്തിന്റെ ഇടിവ് രേഖപ്പെടുത്തിയിട്ടുണ്ട്. മാരുതി സുസുക്കി, മഹീന്ദ്ര, ടാറ്റ മോട്ടോഴ്‌സ് എന്നിവയ്ക്ക് പിന്നിലായി നാലാം സ്ഥാനത്താണ് നിലവില്‍ ഹ്യുണ്ടായ്. വിപണിയിലെ മത്സരം കടുക്കുന്ന സാഹചര്യത്തിലും, ക്രെറ്റ ഇലക്ട്രിക് പോലുള്ള പുത്തന്‍ മോഡലുകളിലൂടെ വിപണി തിരിച്ചുപിടിക്കാനുള്ള ശ്രമത്തിലാണ് കമ്പനി.