Sudarshan Chakra: 'സുദർശൻ ചക്ര' നടപ്പിലാക്കാനൊരുങ്ങി കേന്ദ്ര സർക്കാർ: ഇന്ത്യയുടെ പുതിയ വ്യോമപ്രതിരോധ കവചം

ആഗോളതലത്തിൽ വ്യോമാക്രമണ ഭീഷണികൾ ഉയരുന്ന സാഹചര്യത്തിൽ, രാജ്യത്തിന്റെ സുരക്ഷ ശക്തിപ്പെടുത്താൻ കേന്ദ്ര സർക്കാർ ‘സുദർശൻ ചക്ര’ എന്ന സമഗ്ര വ്യോമപ്രതിരോധ സംവിധാനത്തിന് തുടക്കമിടാൻ ഒരുങ്ങുന്നു. പ്രതിരോധ മന്ത്രാലയം ഇതിനായുള്ള സാധ്യതാപഠനങ്ങൾ ആരംഭിച്ചതായി റിപ്പോർട്ടുകൾ വ്യക്തമാക്കുന്നു.

മിസൈലുകൾ, ഡ്രോണുകൾ, ഷെല്ലുകൾ, ആയുധങ്ങളുമായി വരുന്ന ആളില്ലാ വിമാനങ്ങൾ എന്നിവയെ കണ്ടെത്തുകയും നിഷ്ക്രിയമാക്കുകയും ചെയ്യുന്നതിന് രാജ്യവ്യാപകമായി റഡാറുകൾ, കമാൻഡ് & കൺട്രോൾ സെന്ററുകൾ, ഇന്റർസെപ്റ്റർ മിസൈലുകൾ എന്നിവയുടെ ഏകോപിത ശൃംഖല സൃഷ്ടിക്കുകയാണ് പദ്ധതിയുടെ പ്രധാന ലക്ഷ്യം.

ആദ്യഘട്ടത്തിൽ ഡൽഹി, മുംബൈ, ചെന്നൈ, കൊൽക്കത്ത, ബാംഗ്ലൂർ പോലുള്ള പ്രധാന മെട്രോ നഗരങ്ങൾക്കും, ഐ.എസ്.ആർ.ഒ, ആറ്റോമിക് എനർജി വകുപ്പുൾപ്പെടെയുള്ള തന്ത്രപ്രധാന സ്ഥാപനങ്ങൾക്കും സംരക്ഷണം നൽകും. 2035ഓടെ രാജ്യത്തെ മുഴുവൻ ഈ സുരക്ഷാ കവചത്തിനുള്ളിൽ ഉൾപ്പെടുത്താനാണ് ലക്ഷ്യമിടുന്നത്.

തദ്ദേശീയ സാങ്കേതികവിദ്യകൾ അടിസ്ഥാനമാക്കി വികസിപ്പിക്കുന്ന സുദർശൻ ചക്രയിൽ നിലവിലുള്ള വ്യോമപ്രതിരോധ സംവിധാനങ്ങളും സംയോജിപ്പിക്കും. പ്രത്യേകിച്ച് ‘ആകാശതീർ’ പോലുള്ള കൺട്രോൾ ആൻഡ് റിപ്പോർട്ടിംഗ് സംവിധാനങ്ങൾ ഉൾപ്പെടുത്തി, ശത്രു ആക്രമണങ്ങളെ തത്സമയം തിരിച്ചറിഞ്ഞ് ഉപരിതല-വ്യോമ മിസൈലുകൾ വഴി പ്രതിരോധം ഉറപ്പാക്കും.

പ്രതിരോധ മന്ത്രാലയം, സായുധ സേനകൾ, ഡി.ആർ.ഡി.ഒ ശാസ്ത്രജ്ഞർ എന്നിവരുടെ മേൽനോട്ടത്തിൽ വികസിപ്പിക്കുന്ന ഈ പദ്ധതി, ഇന്ത്യയുടെ സുരക്ഷാ സംവിധാനത്തിൽ വലിയ മുന്നേറ്റമായി മാറും.