ടാറ്റാ മോട്ടാഴ്‌സ് തമിഴ്‌നാട്ടിലെ പുതിയ പ്ലാന്റില്‍ നിര്‍മ്മാണം ആരംഭിച്ചു

ടാറ്റ മോട്ടോഴ്സ് പാസഞ്ചര്‍ വെഹിക്കിള്‍സ് ലിമിറ്റഡ് തമിഴ്നാട്ടിലെ റാണിപേട്ട് ജില്ലയിലെ പനപ്പാക്കത്തുള്ള പുതിയ പ്ലാന്റില്‍ നിര്‍മ്മാണം ആരംഭിച്ചു. ഏകദേശം 9,000 കോടി രൂപ മുതല്‍മുടക്കില്‍ നിര്‍മ്മിച്ച യൂണിറ്റ് മുഖ്യമന്ത്രി എം.കെ. സ്റ്റാലിനും ടാറ്റ സണ്‍സ് ചെയര്‍മാന്‍ എന്‍. ചന്ദ്രശേഖരനും ചേര്‍ന്ന് ഉദ്ഘാടനം ചെയ്തു. പ്ലാന്റില്‍ നിന്ന് പുറത്തിറങ്ങുന്ന ആദ്യ മോഡല്‍ റേഞ്ച് റോവര്‍ ഇവോക്കാണ്. ഇത് ജാഗ്വാര്‍ ലാന്‍ഡ് റോവറിന്റെ ഇന്ത്യയിലെ പ്രാദേശിക ഉല്‍പ്പാദനത്തിന് ഒരു നാഴികക്കല്ലായി മാറും.

പുതിയ പ്ലാന്റിന് പ്രതിവര്‍ഷം 3 ലക്ഷം വാഹനങ്ങള്‍ നിര്‍മ്മിക്കാനുള്ള ശേഷിയുണ്ട്. കൂടാതെ ടാറ്റ മോട്ടോഴ്സിന്റെ പാസഞ്ചര്‍ വാഹനങ്ങള്‍ക്കും ജാഗ്വാര്‍ ലാന്‍ഡ് റോവര്‍ മോഡലുകള്‍ക്കും ഇത് നിര്‍മ്മാണ സൗകര്യമൊരുക്കും. ഭാവിയില്‍ ഇലക്ട്രിക്, അടുത്ത തലമുറ കാറുകളുടെ ഉല്‍പ്പാദനത്തെ പിന്തുണയ്ക്കുന്നതിനായും ആഭ്യന്തര, കയറ്റുമതി വിപണികളില്‍ കമ്പനിയുടെ സാന്നിധ്യം ശക്തിപ്പെടുത്തുന്നതിനായും ഇത് രൂപകല്‍പ്പന ചെയ്തിരിക്കുന്നു. ഉദ്ഘാടനത്തില്‍ മുതിര്‍ന്ന സര്‍ക്കാര്‍ ഉദ്യോഗസ്ഥരും ടാറ്റ ഗ്രൂപ്പ് എക്സിക്യൂട്ടീവുകളും പങ്കെടുത്തു.

ഇന്ത്യയില്‍ നിന്ന് ലോകോത്തര വാഹനങ്ങള്‍ മറ്റുരാജ്യങ്ങളിലേക്ക് കയറ്റുമതി ചെയ്യാനും ഈ പ്ലാന്റ് വഴിയൊരുക്കുമെന്ന് ചന്ദ്രശേഖരന്‍ അഭിപ്രായപ്പെട്ടു. ഇന്ത്യയില്‍ നിന്ന് ലോകോത്തര വാഹനങ്ങള്‍ മറ്റുരാജ്യങ്ങളിലേക്ക് കയറ്റുമതി ചെയ്യാനും ഈ പ്ലാന്റ് വഴിയൊരുക്കുമെന്ന് ടാറ്റ സണ്‍സ് ചെയര്‍മാന്‍ എന്‍. ചന്ദ്രശേഖരന്‍ അഭിപ്രായപ്പെട്ടു. ഈ പ്ലാന്റ് ഓട്ടോമൊബൈല്‍ നിര്‍മ്മാണത്തിനുള്ള ആഗോള കേന്ദ്രമെന്ന നിലയില്‍ ഇന്ത്യയുടെ സ്ഥാനം ശക്തിപ്പെടുത്തുമെന്നാണ് കരുതുന്നത്.