വാഹന വില്‍പ്പന റെക്കോര്‍ഡ് ഉയരത്തില്‍; ഉത്സവകാലവും ജിഎസ്ടി പരിഷ്‌കാരവും തുണയായി

ഉത്സവകാല ആഘോഷങ്ങളും ജിഎസ്ടി പരിഷ്‌കാരങ്ങളും ചേര്‍ന്ന് ഒക്ടോബറില്‍ ഇന്ത്യയിലെ വാഹന വില്‍പ്പന റെക്കോര്‍ഡ് ഉയരത്തിലെത്തി. ഫെഡറേഷന്‍ ഓഫ് ഓട്ടോമൊബൈല്‍ ഡീലേഴ്സ് അസോസിയേഷന്‍സിന്റെ (എഫ്എഡിഎ) കണക്കുകള്‍ പ്രകാരം, മൊത്തം വാഹന രജിസ്‌ട്രേഷന്‍ വാര്‍ഷികാടിസ്ഥാനത്തില്‍ 40.5% ഉയര്‍ന്ന് 4.02 ദശലക്ഷം യൂണിറ്റിലെത്തി. ഇത് വിവിധ വിഭാഗങ്ങളിലെ എക്കാലത്തെയും ഉയര്‍ന്ന പ്രതിമാസ വില്‍പ്പനയാണ്.

ദസറയും ദീപാവലിയും ഉള്‍പ്പെട്ട ഉത്സവ സീസണ്‍ വില്‍പ്പന വര്‍ദ്ധിപ്പിക്കുന്നതില്‍ നിര്‍ണായക പങ്ക് വഹിച്ചു. ഇരുചക്ര വാഹനങ്ങളും യാത്രാ വാഹനങ്ങളും ആജീവനാന്ത ഉയരത്തിലെത്തി. ചെറിയ കാറുകളുടെയും എന്‍ട്രി ലെവല്‍ ഇരുചക്ര വാഹനങ്ങളുടെയും നികുതി നിരക്കുകള്‍ കുറച്ച ജിഎസ്ടി 2.0 പരിഷ്‌കാരങ്ങള്‍, മധ്യവര്‍ഗ കുടുംബങ്ങള്‍ക്കും ആദ്യമായി വാങ്ങുന്നവര്‍ക്കും വാഹന ഉടമസ്ഥാവകാശം കൂടുതല്‍ സാധ്യമാക്കി. തല്‍ഫലമായി, പാസഞ്ചര്‍ വാഹന വില്‍പ്പന അഞ്ച് ലക്ഷം കടന്ന് 5.57 ലക്ഷം യൂണിറ്റിലെത്തി, കഴിഞ്ഞ വര്‍ഷത്തേക്കാള്‍ 11% വര്‍ധനയാണിത്.

മാരുതി സുസുക്കി, ടാറ്റ മോട്ടോഴ്സ്, മഹീന്ദ്ര & മഹീന്ദ്ര തുടങ്ങിയ പ്രമുഖ വാഹന നിര്‍മ്മാതാക്കള്‍ അവരുടെ എക്കാലത്തെയും മികച്ച പ്രതിമാസ വില്‍പ്പന റിപ്പോര്‍ട്ട് ചെയ്തു.

18 ശതമാനം വില്‍പ്പന വളര്‍ച്ചയോടെ മാരുതി സുസുക്കി ഇന്ത്യ 2.39 ലക്ഷം യൂണിറ്റുകളുമായി വിപണിയിലെ മുന്‍നിരയില്‍ തുടര്‍ന്നു.

ടാറ്റ മോട്ടോഴ്സ് 13 ശതമാനം വളര്‍ച്ചയോടെ 75,352 യൂണിറ്റുകളും മഹീന്ദ്ര ആന്‍ഡ് മഹീന്ദ്ര 9 ശതമാനം വളര്‍ച്ചയോടെ 67,918 യൂണിറ്റുകളിലുമെത്തി.

എന്നാല്‍ ഹ്യുണ്ടായ് മോട്ടോര്‍ ഇന്ത്യ 7 ശതമാനം ഇടിവാണ് രേഖപ്പെടുത്തിയത്. കമ്പനിയുടെ വില്‍പ്പന 65,442 യൂണിറ്റുകളായിരുന്നു.വിവാഹ സീസണ്‍, വിളവെടുപ്പ് വരവ്, പുതിയ മോഡല്‍ ലോഞ്ചുകള്‍ എന്നിവയാല്‍ നവംബറിലും ഈ ആക്കം തുടരുമെന്ന് പ്രതീക്ഷിക്കുന്നു.