നെക്‌സോണിനും വെന്യുവിനും വെല്ലുവിളി; ഫോക്സ്വാഗന്റെ പുതിയ എസ് യു വി വരുന്നു

ഇന്ത്യന്‍ വിപണിയില്‍ പുതിയ സബ്-4 മീറ്റര്‍ എസ്യുവി പുറത്തിറക്കുമെന്ന് ഫോക്സ്വാഗണ്‍ ഔദ്യോഗികമായി സ്ഥിരീകരിച്ചു. പ്രാദേശികമായി നിര്‍മ്മിക്കുന്ന ഈ വാഹനം, ഇന്ത്യയിലെ ഫോക്സ്വാഗന്റെ ഏറ്റവും വിലക്കുറവുള്ളതും എളുപ്പത്തില്‍ സ്വന്തമാക്കാന്‍ കഴിയുന്നതുമായ എസ്യുവിയായി മാറും. മുന്‍കാലങ്ങളിലെ ചെറിയ കാര്‍ ഫോര്‍മുലയിലേക്ക് മടങ്ങുന്നതിന് പകരം, ഇന്ത്യന്‍ ഉപഭോക്താക്കള്‍ക്കായി കമ്പനി ഇത്തവണ ഒരു കോംപാക്റ്റ് എസ്യുവിയാണ് അവതരിപ്പിക്കുന്നത്. അടുത്ത വര്‍ഷം നടക്കുന്ന ഓട്ടോ എക്‌സ്‌പോയില്‍ ഈ പുതിയ മോഡല്‍ പുറത്തിറക്കുമെന്നാണ് പ്രതീക്ഷിക്കുന്നത്.

ഫോക്‌സ്വാഗന്റെ ഇന്ത്യന്‍ ലൈനപ്പില്‍ ടൈഗണിന് താഴെയായിരിക്കും ഈ പുതിയ മോഡല്‍ ഇടംപിടിക്കുന്നത്. രാജ്യത്തെ ഏറ്റവും മത്സരാധിഷ്ഠിതവും വലുതുമായ കോംപാക്റ്റ് എസ്യുവി വിപണിയിലേക്ക് ബ്രാന്‍ഡ് ചുവടുവെക്കുന്നത് ഈ വാഹനത്തിലൂടെയാണ്. ടാറ്റ നെക്‌സോണ്‍, മാരുതി സുസുക്കി ബ്രെസ്സ, ഹ്യുണ്ടായി വെന്യു, കിയ സോനെറ്റ്, മഹീന്ദ്ര XUV 3XO തുടങ്ങിയ മുന്‍നിര മോഡലുകളുമായി ഈ വാഹനം നേരിട്ട് മത്സരിക്കും.

ഫോക്‌സ്വാഗണ്‍ ഗ്രൂപ്പിന്റെ 'ഇന്ത്യ 2.0' തന്ത്രത്തിന്റെ ഭാഗമായാണ് ഈ പുതിയ നീക്കം. ഗ്രൂപ്പിലെ സഹോദര സ്ഥാപനമായ സ്‌കോഡയുടെ കൈലാക്ക് മോഡല്‍ ഈ വിഭാഗത്തില്‍ വലിയ വിജയമായിരുന്നു. കൈലാക്ക് ഉപയോഗിക്കുന്ന അതേ പ്ലാറ്റ്ഫോം തന്നെയാണ് പുതിയ ഫോക്‌സ്വാഗണ്‍ എസ്യുവിയിലും ഉപയോഗിക്കുന്നത്. എങ്കിലും, കൈലാക്കിന്റെ തനിപ്പകര്‍പ്പാകാതെ തികച്ചും വ്യത്യസ്തമായ രൂപകല്‍പ്പനയും സവിശേഷതകളും പുതിയ എസ്യുവിക്ക് ഉണ്ടായിരിക്കുമെന്ന് കമ്പനി വ്യക്തമാക്കിയിട്ടുണ്ട്.

ഇന്ത്യയെ വെറുമൊരു വില്‍പ്പന വിപണിയായി മാത്രമല്ല, മികച്ചൊരു വികസന, നിര്‍മ്മാണ അടിത്തറയായും തങ്ങള്‍ കാണുന്നുണ്ടെന്ന് ഫോക്‌സ്വാഗണ്‍ ബ്രാന്‍ഡ് സിഇഒ തോമസ് ഷാഫര്‍ വ്യക്തമാക്കി. ഉല്‍പ്പന്നങ്ങളുടെ വ്യാപ്തി വര്‍ദ്ധിപ്പിച്ചും പ്രാദേശിക ശേഷികള്‍ പൂര്‍ണ്ണമായി പ്രയോജനപ്പെടുത്തിയും ഇന്ത്യന്‍ വിപണിയില്‍ തങ്ങളുടെ സാന്നിധ്യം കൂടുതല്‍ ശക്തമാക്കാനാണ് കമ്പനിയുടെ ഈ പ്രധാന ചുവടുവെപ്പ്.