Login 
പഠിക്കാം & സമ്പാദിക്കാം 
Home
12 Oct 2026 9:53 AM IST
ഉത്സവകാല ഓണ്‍ലൈന്‍ വില്‍പനയ്ക്ക് തിരിച്ചടി; ആദ്യ നാല് ദിവസങ്ങളില്‍ 10% വരെ ഇടിവ്
MyFin Desk
Summary
ഉത്സവകാല വില്‍പനയില്‍ സാധാരണയായി വലിയ പങ്കുവഹിക്കുന്ന സ്മാര്‍ട്ട്‌ഫോണുകളുടെ വിഹിതം ഇത്തവണ മൊത്തം വില്‍പന മൂല്യത്തിന്റെ 35 ശതമാനത്തില്‍ നിന്ന് 30 ശതമാനമായി കുറയുമെന്നാണ് കണക്കുകൂട്ടല്‍
ഇന്ത്യയിലെ ഉത്സവകാല ഇ-കൊമേഴ്സ് വില്‍പനയുടെ തുടക്കം ഇത്തവണ മന്ദഗതിയില്‍. സ്മാര്‍ട്ട്‌ഫോണുകള്‍, ലാപ്‌ടോപ്പുകള്‍ തുടങ്ങിയ ഇലക്ട്രോണിക്‌സ് ഉല്‍പ്പന്നങ്ങളുടെ വില വര്‍ധിച്ചതാണ് വലിയ തുക മുടക്കിയുള്ള വാങ്ങലുകളെ ബാധിച്ചത്. ഇ-കൊമേഴ്സ് കണ്‍സള്‍ട്ടന്‍സി സ്ഥാപനമായ ഡാറ്റം ഇന്റലിജന്‍സിന്റെ കണക്കുകള്‍ പ്രകാരം, ഒക്ടോബര്‍ 7 മുതല്‍ 10 വരെയുള്ള ആദ്യ നാല് ദിവസങ്ങളില്‍ ഓണ്‍ലൈന്‍ വില്‍പനയുടെ മൊത്തം ചരക്ക് മൂല്യം 29,800 കോടി മുതല്‍ 30,900 കോടി രൂപ വരെയായിരുന്നു. കഴിഞ്ഞ വര്‍ഷം ഇതേ കാലയളവിലെ 33,200 കോടി രൂപയുമായി താരതമ്യം ചെയ്യുമ്പോള്‍ 7-10 ശതമാനം ഇടിവാണിത്.
മെമ്മറി ചിപ്പുകളുടെയും മറ്റ് ഘടകങ്ങളുടെയും വില വര്‍ധിച്ചതോടെ ഇലക്ട്രോണിക്‌സ് ഉല്‍പ്പന്നങ്ങള്‍ കൂടുതല്‍ ചെലവേറിയത് ഉപഭോക്താക്കളെ പുതിയ ഉപകരണങ്ങള്‍ വാങ്ങുന്നതില്‍ നിന്ന് പിന്നോട്ടടിപ്പിക്കുന്നു. കഴിഞ്ഞ വര്‍ഷം ജിഎസ്ടി നിരക്കുകളിലെ കുറവ് ഉത്സവകാല വില്‍പനയ്ക്ക് ഉത്തേജനമായിരുന്നെങ്കിലും ഇത്തവണ സമാനമായൊരു ആനുകൂല്യം ലഭിച്ചില്ലെന്ന് ഡാറ്റം ഇന്റലിജന്‍സ് സ്ഥാപകന്‍ സതീഷ് മീണ ചൂണ്ടിക്കാട്ടി. ഉത്സവകാല വില്‍പനയില്‍ സാധാരണയായി വലിയ പങ്കുവഹിക്കുന്ന സ്മാര്‍ട്ട്‌ഫോണുകളുടെ വിഹിതം ഇത്തവണ മൊത്തം വില്‍പന മൂല്യത്തിന്റെ 35 ശതമാനത്തില്‍ നിന്ന് 30 ശതമാനമായി കുറയുമെന്നാണ് കണക്കുകൂട്ടല്‍. മൊബൈല്‍ വില്‍പനയുടെ വളര്‍ച്ചാനിരക്കും കഴിഞ്ഞ വര്‍ഷത്തെ 26 ശതമാനത്തില്‍ നിന്ന് ആറ് ശതമാനമായി താഴുമെന്നാണ് പ്രതീക്ഷ.
അതേസമയം, ഓര്‍ഡറുകളുടെ എണ്ണത്തില്‍ കാര്യമായ ഇടിവുണ്ടായിട്ടില്ല. റെഡ്‌സീര്‍ സ്ട്രാറ്റജി കണ്‍സള്‍ട്ടന്റ്‌സിന്റെ കണക്കുകള്‍ പ്രകാരം, ഒക്ടോബര്‍ 8, 9 തീയതികളില്‍ ഇ-കൊമേഴ്സ് പ്ലാറ്റ്ഫോമുകള്‍ ഏകദേശം 24,000 കോടി രൂപയുടെ ചരക്കുകള്‍ വിറ്റഴിച്ചു. ഈ രണ്ട് ദിവസങ്ങളിലായി എട്ട് മുതല്‍ ഒന്‍പത് കോടി വരെ ഓര്‍ഡറുകള്‍ രേഖപ്പെടുത്തിയതായും ആറ് മുതല്‍ 6.5 കോടി വരെ ഉപഭോക്താക്കള്‍ ഷോപ്പിങ്ങില്‍ പങ്കെടുത്തതായും റിപ്പോര്‍ട്ട് വ്യക്തമാക്കുന്നു. ഫാഷന്‍ വിഭാഗത്തിലെ വില്‍പന മൂല്യം മുന്‍വര്‍ഷത്തെ അപേക്ഷിച്ച് 22-25 ശതമാനം വര്‍ധിച്ചു. മിതമായ വിലയിലുള്ള ഉത്സവകാല വസ്ത്രങ്ങള്‍ വാങ്ങുന്ന ചെറുപട്ടണങ്ങളിലെ ഉപഭോക്താക്കളാണ് ഈ വളര്‍ച്ചയ്ക്ക് പ്രധാന പിന്തുണ നല്‍കുന്നത്. കണ്‍സ്യൂമര്‍ ഇലക്ട്രോണിക്‌സ്, ഗൃഹോപകരണങ്ങള്‍ എന്നിവയുടെ വില്‍പനയിലും യഥാക്രമം 26 ശതമാനവും 35 ശതമാനവും വളര്‍ച്ചയുണ്ടാകുമെന്ന് പ്രതീക്ഷിക്കുന്നു.
ആമസോണിന്റെ ഗ്രേറ്റ് ഇന്ത്യന്‍ ഫെസ്റ്റിവലും ഫ്‌ലിപ്കാര്‍ട്ടിന്റെ ബിഗ് ബില്യണ്‍ ഡേയ്സും ഉത്സവകാല ഓണ്‍ലൈന്‍ ഷോപ്പിങ്ങിന്റെ പ്രധാന ചാലകശക്തികളായി തുടരുകയാണ്. സ്മാര്‍ട്ട്‌ഫോണുകളെ മാത്രം ആശ്രയിക്കാതെ ഫാഷന്‍, ഇലക്ട്രോണിക്‌സ്, ഗൃഹോപകരണങ്ങള്‍ തുടങ്ങിയ വിവിധ വിഭാഗങ്ങളിലേക്ക് ഉപഭോക്താക്കളുടെ ചെലവിടല്‍ വ്യാപിക്കുന്നതും വിപണിയുടെ സ്വഭാവത്തില്‍ മാറ്റമുണ്ടാക്കുന്നു. ഉത്സവകാല വില്‍പനയുടെ തുടക്കത്തില്‍ പ്രതീക്ഷിച്ച കുതിച്ചുചാട്ടമില്ലെങ്കിലും, കൂടുതല്‍ ദിവസങ്ങളിലായി വിവിധ വിഭാഗങ്ങളില്‍ നടക്കുന്ന വാങ്ങലുകളുടെ പിന്തുണയോടെ ഈ വര്‍ഷം മൊത്തത്തിലുള്ള ഇ-കൊമേഴ്സ് വില്‍പനയില്‍ 25-30 ശതമാനം വളര്‍ച്ചയുണ്ടാകുമെന്ന് വിശകലന വിദഗ്ധര്‍ പ്രതീക്ഷിക്കുന്നു.