ജര്‍മ്മനിയില്‍ ഇന്ത്യന്‍ വിദ്യാര്‍ത്ഥികളുടെ എണ്ണം കുതിച്ചുയരുന്നു

ജര്‍മ്മനിയില്‍ പഠിക്കുന്ന ഇന്ത്യന്‍ വിദ്യാര്‍ത്ഥികളുടെ എണ്ണം കഴിഞ്ഞ നാല് വര്‍ഷമായി ഗണ്യമായി ഉയര്‍ന്നതായി റിപ്പോര്‍ട്ട്. ``Studying-in-Germany.ഓർഗ്'' ന്റെ റിപ്പോര്‍ട്ട് അനുസരിച്ച് ജര്‍മ്മനിയിലെ ഇന്ത്യന്‍ വിദ്യാര്‍ത്ഥികളുടെ എണ്ണം 4 വര്‍ഷത്തിനുള്ളില്‍ 107ശതമാനമാണ് വര്‍ധിച്ചത്.

മുന്‍പ് ജര്‍മ്മനിയിലെ അന്താരാഷ്ട്ര വിദ്യാര്‍ത്ഥികളുടെ ഏറ്റവും വലിയ ഉറവിടം ചൈനയായിരുന്നു. എന്നാല്‍ ഈ സ്ഥാനം ഇപ്പോള്‍ ഇന്ത്യ ഏറ്റെടുത്തു. നിലവില്‍, 39,137 ചൈനീസ് വിദ്യാര്‍ത്ഥികള്‍ ജര്‍മ്മന്‍ സര്‍വകലാശാലകളില്‍ പഠിക്കുന്നുണ്ട്.

ജര്‍മ്മനിയില്‍ പഠിക്കാന്‍ അതിര്‍ത്തി കടക്കുന്ന വിദ്യാര്‍ത്ഥികളുടെ കാര്യത്തില്‍ ചൈന സ്ഥിരത പുലര്‍ത്തുന്നു. ഏകദേശം 39,000 മുതല്‍ 40,000 വരെ വിദ്യാര്‍ത്ഥികളാണ് ജര്‍മ്മനിയില്‍ പഠിക്കുന്നത്. ഇതിന് വിപരീതമായി ഇന്ത്യന്‍ വിദ്യാര്‍ത്ഥികളുടെ ജര്‍മ്മനിയിലേക്കുള്ള ഒഴുക്ക് കഴിഞ്ഞ കുറെ വര്‍ഷങ്ങളായി കുത്തനെ വര്‍ധിച്ചു.

റിപ്പോര്‍ട്ട് അനുസരിച്ച്, 2019 ല്‍ 20,562 ഇന്ത്യന്‍ വിദ്യാര്‍ത്ഥികളാണ് ജര്‍മ്മനിയില്‍ പഠനത്തിന് എത്തിയത്.2023 ല്‍ ഇത് 42,578 ആയി ഉയര്‍ന്നു. ഇത് ജര്‍മ്മനിയിലെ അന്താരാഷ്ട്ര വിദ്യാര്‍ത്ഥി പ്രാതിനിധ്യത്തില്‍ ഇന്ത്യയെ മുന്‍പന്തിയിലെത്തിച്ചു.

ഇന്ത്യയ്ക്കും ചൈനയ്ക്കും പുറമെ, ജര്‍മ്മനിയിലെ അന്താരാഷ്ട്ര വിദ്യാര്‍ത്ഥി ജനസംഖ്യയില്‍ ഗണ്യമായ സംഭാവന നല്‍കുന്ന മറ്റ് രാജ്യങ്ങള്‍ സിറിയ, ഓസ്ട്രിയ,തുര്‍ക്കി, ഇറാന്‍ തുടങ്ങിയവയാണ്. സിറിയയില്‍നിന്ന് 15,563 വിദ്യാര്‍ത്ഥികളും ഓസ്ട്രിയയില്‍ നിന്ന് 14,762 വിദ്യാര്‍ത്ഥികളും ജര്‍മ്മനിയില്‍ പഠിക്കുന്നു. ഏകദേശം സമാനമായ സംഖ്യയാണ് തുര്‍ക്കി, ഇറാന്‍ എന്നീ രാജ്യങ്ങളില്‍നിന്നുമുള്ളത്.

അന്തര്‍ദേശീയ വിദ്യാര്‍ത്ഥികളുടെ വൈവിധ്യം ജര്‍മ്മനിയുടെ ഉയര്‍ന്ന നിലവാരമുള്ള വിദ്യാഭ്യാസത്തിന്റെയും ഗവേഷണത്തിന്റെയും കേന്ദ്രമെന്ന നിലയിലുള്ള അതിന്റെ പ്രശസ്തിക്ക് അടിവരയിടുകയാണ്.

ഉയര്‍ന്ന നിലവാരമുള്ള വിദ്യാഭ്യാസ സമ്പ്രദായം, ജര്‍മ്മനിയിലെ താങ്ങാനാവുന്ന ട്യൂഷന്‍ ഫീസ് എന്നിവ ഉള്‍പ്പെടുന്ന വിവിധ ഘടകങ്ങളാണ് ഈ രാജ്യത്തേക്ക് വിദ്യാര്‍ത്ഥികളുടെ കുത്തൊഴുക്കിന് കാരണമായതെന്ന് വിദഗ്ധര്‍ പറയുന്നു.

കൂടാതെ പഠനാനന്തര തൊഴില്‍ നയങ്ങള്‍ ജര്‍മ്മനിയെ ഇന്ത്യന്‍ വിദ്യാര്‍ത്ഥികള്‍ക്ക് ആകര്‍ഷകമായ സ്ഥലമാക്കി മാറ്റുന്നുവെന്ന് വിശ്വസിക്കപ്പെടുന്നു.

ഉന്നത വിദ്യാഭ്യാസത്തിനായി ഇംഗ്ലീഷ് ഇതര ഭാഷ സംസാരിക്കുന്ന രാജ്യങ്ങളിലേക്കുള്ള ഇന്ത്യന്‍ വിദ്യാര്‍ത്ഥികളുടെ ഒഴുക്കിന് ഉദാഹരണമാണ് ജര്‍മ്മനി. ഇത് പൊതുവായ പ്രവണതയുടെ മാറ്റത്തെയാണ് സൂചിപ്പിക്കുന്നത്.

ജര്‍മ്മനിയില്‍ ഇന്ത്യന്‍ വിദ്യാര്‍ത്ഥികളുടെ പ്രവേശനം വര്‍ധിക്കുന്നത് സാംസ്‌കാരിക വിനിമയവും പരസ്പര ധാരണയും വര്‍ധിപ്പിക്കുമെന്നും കൂടാതെ നൈപുണ്യമുള്ള തൊഴില്‍ ശക്തിയുടെ വികസനത്തിന് സംഭാവന നല്‍കുമെന്നും വിശ്വസിക്കപ്പെടുന്നു.