റീട്ടെയില്‍ വിപണി കുതിക്കുന്നു; വെല്ലുവിളി മാറിക്കൊണ്ടിരിക്കുന്ന ഉപഭോക്തൃ പ്രതീക്ഷകള്‍

ഇന്ത്യയുടെ റീട്ടെയില്‍ വിപണി അഭൂതപൂര്‍വമായ വളര്‍ച്ചയുടെ പാതയിലാണെന്ന് റിപ്പോര്‍ട്ട്. ബോസ്റ്റണ്‍ കണ്‍സള്‍ട്ടിംഗ് ഗ്രൂപ്പും (ബിസിജി) റീട്ടെയിലേഴ്സ് അസോസിയേഷന്‍ ഓഫ് ഇന്ത്യയും സംയുക്തമായി നടത്തിയ റിപ്പോര്‍ട്ടില്‍ റീട്ടെയില്‍ വിപണി 2025ലെ 90-95 ട്രില്യണ്‍ രൂപയില്‍ നിന്ന് 2035-ഓടെ 210-215 ട്രില്യണ്‍ രൂപയായി ഇരട്ടിയാകുമെന്ന് പ്രവചിക്കുന്നു.

ഇന്ത്യയിലെ റീട്ടെയില്‍ വിപണി വേഗത്തില്‍ വളരുമ്പോഴും, വ്യാപാരികള്‍ നേരിടുന്ന ഏറ്റവും വലിയ വെല്ലുവിളി മാറിക്കൊണ്ടിരിക്കുന്ന ഉപഭോക്തൃ പ്രതീക്ഷകളാണ്. ഇന്നത്തെ ഉപഭോക്താവ് കൂടുതല്‍ ബോധവാനാണ്. കൂടാതെ ഓരോ വാങ്ങലിലും അവന്‍ വ്യക്തിഗത അനുഭവം പ്രതീക്ഷിക്കുന്നു. വില, ഗുണമേന്മ, ഡെലിവറി, സേവനംഎല്ലാം ഒരേസമയം മികച്ചതായിരിക്കണമെന്ന ആവശ്യം റീട്ടെയില്‍ മേഖലയെ പുതിയൊരു പരീക്ഷണത്തിലേക്ക് നയിക്കുന്നു. 'എന്ത് വേണം' എന്നതിലുപരി 'എങ്ങനെ വേണം' എന്നതിലാണ് ശ്രദ്ധ.

മുമ്പ് ഉപഭോക്താക്കള്‍ ഉല്‍പ്പന്നം ലഭിക്കുന്നതില്‍ സന്തോഷിച്ചിരുന്നു. ഇന്ന്, അവര്‍ക്ക് അത് എത്ര വേഗത്തില്‍, എത്ര സുതാര്യമായി, എത്ര വ്യക്തിഗതമായി ലഭിക്കുന്നു എന്നതാണ് നിര്‍ണായകം. ഈ ഉയര്‍ന്ന പ്രതീക്ഷകള്‍ നിറവേറ്റാന്‍ റീട്ടെയിലര്‍മാര്‍ സാങ്കേതികവിദ്യയിലും ഡാറ്റയിലും വന്‍ നിക്ഷേപങ്ങള്‍ നടത്തുകയാണ്.

ഇന്നത്തെ ഉപഭോക്താവ് ഒരു മോശം അനുഭവം പോലും സഹിക്കില്ല. ഒരു വൈകിയ ഡെലിവറിയോ, ഒരു തെറ്റായ ഉല്‍പ്പന്നമോ, ഒരു മോശം കസ്റ്റമര്‍ സര്‍വീസോ ഇവയില്‍ ഏതെങ്കിലും സംഭവിച്ചാല്‍ ഉപഭോക്താവ് ഉടന്‍ തന്നെ മറ്റൊരു ബ്രാന്‍ഡിലേക്ക് മാറും. സോഷ്യല്‍ മീഡിയയുടെ കാലത്ത്, ഒരു നെഗറ്റീവ് റിവ്യൂ പോലും ബ്രാന്‍ഡിന്റെ പ്രതിച്ഛായയെടുക്കാന്‍ കഴിയും. അതുകൊണ്ട് തന്നെ, റീട്ടെയിലര്‍മാര്‍ ഇപ്പോള്‍ 'ഉപഭോക്തൃ സംതൃപ്തി'യെ ഒരു വിഭാഗമല്ല, ഒരു സംസ്‌കാരം ആയി കാണുന്നു.

ഭാവി ജയിക്കുന്നത് ഉപഭോക്താവിനെ കേള്‍ക്കുന്നവരാണ്. റീട്ടെയില്‍ മേഖലയിലെ മത്സരം ഇനി വിലയിലോ ഓഫറുകളിലോ മാത്രം ഒതുങ്ങുന്നില്ല. ഉപഭോക്താവിന്റെ മനസ്സ് മനസ്സിലാക്കുന്നവരും, അവരുടെ ജീവിതശൈലിയോട് പൊരുത്തപ്പെടുന്ന അനുഭവങ്ങള്‍ സൃഷ്ടിക്കുന്നവരുമാണ് മുന്നില്‍ നില്‍ക്കുന്നത്. 'Demanding consumer' എന്ന പുതിയ യാഥാര്‍ത്ഥ്യം റീട്ടെയിലര്‍മാരെ കൂടുതല്‍ സൃഷ്ടിപരരാക്കുകയും, കൂടുതല്‍ ഉത്തരവാദിത്തമുള്ളവരാക്കുകയും ചെയ്യുന്നു.

റീട്ടെയിലിന്റെ ഭാവി നിര്‍ണയിക്കുന്നത് ഉപഭോക്താവിന്റെ ആവശ്യങ്ങള്‍ അല്ല, ഉപഭോക്താവിന്റെ പ്രതീക്ഷകള്‍ നിറവേറ്റാനുള്ള ബ്രാന്‍ഡുകളുടെ കഴിവാണെന്ന് ഇന്ന് പ്രമുഖ ബ്രാന്‍ഡുകള്‍ തിരിച്ചറിയുന്നു.