വടക്കുകിഴക്കന്‍ മേഖലയ്ക്ക് 'കടല്‍പാത'ഒരുക്കാന്‍ ജപ്പാന്‍; ആക്ട് ഈസ്റ്റില്‍ വന്‍ കുതിപ്പ്

കരയാല്‍ ചുറ്റപ്പെട്ട വടക്കുകിഴക്കന്‍ മേഖലയെ ബംഗാള്‍ ഉള്‍ക്കടലുമായി ബന്ധിപ്പിച്ച്, പ്രദേശത്തിന്റെ സാമ്പത്തിക ഭൂപടം തന്നെ മാറ്റിമറിക്കാനൊരുങ്ങുകയാണ് ജപ്പാന്‍. ഷില്ലോങ്ങില്‍ നടന്ന ആറാം ഇന്ത്യ-ജപ്പാന്‍ ഇന്റലക്ച്വല്‍ കോണ്‍ക്ലേവില്‍ സംസാരിക്കവെ, വടക്കുകിഴക്കന്‍ മേഖലയെ ബംഗാള്‍ ഉള്‍ക്കടലുമായി ബന്ധിപ്പിക്കുന്ന കണക്റ്റിവിറ്റി പദ്ധതികള്‍ക്ക് ജപ്പാന്‍ പൂര്‍ണ്ണ പിന്തുണ നല്‍കുമെന്ന് ഡെപ്യൂട്ടി വിദേശകാര്യ മന്ത്രി ഹോറി ഇവാവോ പ്രഖ്യാപിച്ചു. ദേശീയ പാതകളുടെ നവീകരണത്തിനും ബ്രഹ്‌മപുത്ര നദിക്ക് കുറുകെ നിര്‍ണ്ണായക പാലങ്ങള്‍ നിര്‍മ്മിക്കുന്നതിനുമായി ജപ്പാന്‍ ഗണ്യമായ തുക വായ്പയായി നല്‍കും.

ഈ വികസന മുന്നേറ്റത്തിന്റെ പ്രധാന ആകര്‍ഷണം അസമിലെ ധുബ്രി-ഫുല്‍ബാരി പാലമാണ്. ഈ അത്ഭുത നിര്‍മ്മിതി പൂര്‍ത്തിയാകുന്നതോടെ യാത്രാ സമയം ഗണ്യമായി കുറയുകയും, മേഘാലയയും അസമും തമ്മിലുള്ള ബന്ധം കൂടുതല്‍ ശക്തമാവുകയും ചെയ്യും. ഈ പാതവഴി പ്രദേശത്തെ അയല്‍രാജ്യമായ ബംഗ്ലാദേശുമായി നേരിട്ട് ബന്ധിപ്പിക്കാനും സാധിക്കും. റോഡ് ശൃംഖലകള്‍ക്കപ്പുറം, ബംഗ്ലാദേശിലെ മതര്‍ബാരി ആഴക്കടല്‍ തുറമുഖത്തെ വടക്കുകിഴക്കന്‍ മേഖലയുമായി ബന്ധിപ്പിക്കുന്നതിലൂടെ ജപ്പാന്‍ ഒരു പുതിയ ലോജിസ്റ്റിക് വിപ്ലവത്തിനാണ് തിരികൊളുത്തുന്നത്.

ജപ്പാന്റെ വിശാലമായ 'സ്വതന്ത്രവും തുറന്നതുമായ ഇന്തോ-പസഫിക്' ദര്‍ശനവും ഇന്ത്യയുടെ 'ആക്ട് ഈസ്റ്റ്' നയവും ഒത്തുചേരുന്ന ഈ പദ്ധതികള്‍, വടക്കുകിഴക്കന്‍ മേഖലയെ തെക്കുകിഴക്കന്‍ ഏഷ്യയുടെയും സമുദ്രവ്യാപാരത്തിന്റെയും പ്രധാന കേന്ദ്രമാക്കി മാറ്റും. ഷില്ലോങ്ങിനെ ഇതിന്റെ സ്വാഭാവിക കവാടമായി വിശേഷിപ്പിച്ച ഹോറി, നേപ്പാള്‍, ഭൂട്ടാന്‍, ബംഗ്ലാദേശ് എന്നിവയുള്‍പ്പെടെയുള്ള വിശാലമായ സാമ്പത്തിക മേഖലയുടെ ഭാഗമായി നോര്‍ത്ത് ഈസ്റ്റിനെ കാണുന്നുവെന്നും കൂട്ടിച്ചേര്‍ത്തു.

അടിസ്ഥാന സൗകര്യ വികസനത്തിനപ്പുറം സാമ്പത്തിക സുരക്ഷ, സെമികണ്ടക്ടറുകള്‍, ക്ലീന്‍ എനര്‍ജി തുടങ്ങിയ നിര്‍ണ്ണായക മേഖലകളില്‍ സ്വകാര്യ മേഖലാ സഹകരണം പ്രോത്സാഹിപ്പിക്കുമെന്നും അദ്ദേഹം വ്യക്തമാക്കി. ഇന്ത്യന്‍ വിദേശകാര്യ മന്ത്രാലയം, ജപ്പാന്‍ എംബസി, മേഘാലയ സര്‍ക്കാര്‍, സസകാവ പീസ് ഫൗണ്ടേഷന്‍ എന്നിവയുടെ സഹകരണത്തോടെയാണ് ഈ ദ്വിദിന കോണ്‍ക്ലേവ് സംഘടിപ്പിച്ചത്.