22 Nov 2026 3:57 PM IST
ക്രൂഡ് വില ഇരട്ടിയായി; ഇറക്കുമതി ബില് 16 ബില്യണ് ഡോളര്, ഇന്ത്യക്ക് വന് തിരിച്ചടി
MyFin Desk
Summary
ഹോര്മുസ് കടലിടുക്ക് വഴിയുള്ള ഷിപ്പിംഗ് തടസ്സപ്പെട്ടതോടെ എല്പിജി ഇറക്കുമതി 50 ശതമാനത്തിലധികം കുറഞ്ഞുവെന്ന് ഇന്റര്നാഷണല് എനര്ജി ഏജന്സി വ്യക്തമാക്കി
എണ്ണ വിലയിലെ കുതിച്ചുചാട്ടം ഇന്ത്യയുടെ പോക്കറ്റ് കാലിയാക്കുന്നു. ബ്രെന്റ് ക്രൂഡ് ഓയില് ബാരലിന് ശരാശരി 124.77 ഡോളറായി ഇരട്ടിയായതോടെ ഒക്ടോബറില് ഇന്ത്യയുടെ മൊത്തം എണ്ണ-വാതക ഇറക്കുമതി ബില് 60 ശതമാനം ഉയര്ന്ന് 16 ബില്യണ് ഡോളറിലെത്തി. കഴിഞ്ഞ വര്ഷം ഇതേ മാസം ഇത് 10 ബില്യണ് ഡോളര് മാത്രമായിരുന്നു. ക്രൂഡ് ഇറക്കുമതിക്ക് മാത്രം 19.5 ബില്യണ് ഡോളര് ചെലവായി - കഴിഞ്ഞ വര്ഷം 10.4 ബില്യണ് ആയിരുന്നത്. അളവില് വെറും 11 ശതമാനം വര്ധന മാത്രമേ ഉണ്ടായുള്ളൂവെങ്കിലും വില ഇരട്ടിയായതാണ് തിരിച്ചടിയായത്. ഏപ്രില്-ഒക്ടോബര് കാലയളവില് തന്നെ ബില് 97.7 ബില്യണ് ഡോളറിലെത്തിയിരുന്നു.
എന്നാല് മറുവശത്ത് പാചകവാതക ഉപയോഗത്തില് വന് ഇടിവാണ്. ഒക്ടോബറില് എല്പിജി ഉപഭോഗം 12.3 ശതമാനവും ഏപ്രില്-ഒക്ടോബറില് 15.1 ശതമാനവും കുറഞ്ഞു. ഹോര്മുസ് കടലിടുക്ക് വഴിയുള്ള ഷിപ്പിംഗ് തടസ്സപ്പെട്ടതോടെ എല്പിജി ഇറക്കുമതി 50 ശതമാനത്തിലധികം കുറഞ്ഞുവെന്ന് ഇന്റര്നാഷണല് എനര്ജി ഏജന്സി വ്യക്തമാക്കി. സ്വകാര്യ എല്പിജി ഇറക്കുമതിയില് 83.8 ശതമാനം ഇടിവുണ്ടായി. സജീവ ഗാര്ഹിക എല്പിജി ഉപഭോക്താക്കളുടെ എണ്ണം 33.4 കോടിയില് നിന്ന് 32.6 കോടിയായി കുറഞ്ഞു. പൊതുമേഖലാ കമ്പനികളുടെ പായ്ക്ക് ചെയ്ത എല്പിജി വില്പ്പനയിലും 11.8 ശതമാനം ഇടിവുണ്ടായി.
പെട്രോള്-ഡീസല് ഉപയോഗത്തില് വര്ധനവാണ് രേഖപ്പെടുത്തിയത്. ഒക്ടോബറില് ഡീസല് ഉപഭോഗം 12 ശതമാനം ഉയര്ന്ന് 8.5 ദശലക്ഷം ടണ്ണും പെട്രോള് 3.5 ശതമാനവും ബിറ്റുമെന് 16.5 ശതമാനവും ഉയര്ന്നു. മൊത്തം പെട്രോളിയം ഉല്പ്പന്ന ഉപഭോഗം 2.7 ശതമാനം ഉയര്ന്ന് 20.5 ദശലക്ഷം ടണ്ണായി. ഒക്ടോബറില് ഇന്ത്യ 24.1 ദശലക്ഷം ടണ് അസംസ്കൃത എണ്ണ സംസ്കരിച്ചു - 7.1 ശതമാനം വര്ധന. അതില് 88.7 ശതമാനവും ഇറക്കുമതി ചെയ്ത എണ്ണയാണ്. പെട്രോളില് എഥനോള് കലര്ത്തുന്നത് 20 ശതമാനമായി തുടരുന്നു.
എന്നാല് എല്എന്ജി രംഗത്ത് ഇടിവ് തുടരുന്നു. ഒക്ടോബറില് പ്രകൃതിവാതക ഉപഭോഗം 7.27 ശതമാനം ഇടിഞ്ഞ് 5,707 ദശലക്ഷം ക്യുബിക് മീറ്ററിലെത്തി. എല്എന്ജി ഇറക്കുമതി 6.94 ശതമാനം കുറഞ്ഞു. പ്രകൃതിവാതകത്തിനായുള്ള ഇറക്കുമതി ആശ്രിതത്വം 52.8 ശതമാനമാണ്. മൊത്തത്തില്, എണ്ണ വിലയിലെ കുതിപ്പ് ഇന്ത്യന് സമ്പദ് വ്യവസ്ഥയ്ക്ക് വലിയ ഭാരമാകുകയാണെന്ന് പിപിഎസി കണക്കുകള് വ്യക്തമാക്കുന്നു.
പഠിക്കാം & സമ്പാദിക്കാം
Home
