Login 
പഠിക്കാം & സമ്പാദിക്കാം 
Home
24 March 2026 4:21 PM IST
റിലയന്സിന്റെ മാസ്റ്റര് സ്ട്രോക്ക്; 50 ലക്ഷം ബാരല് എണ്ണ ഇറാനില്നിന്ന് ഇന്ത്യയിലേക്ക്
MyFin Desk
Summary
അമേരിക്കന് ഉപരോധത്തില് താല്ക്കാലിക ഇളവ് ലഭിച്ചതിന് പിന്നാലെയാണ് റിലയന്സ് കരാറിലേര്പ്പെട്ടത്. ഐസിഇ ബ്രെന്റ് ഫ്യൂച്ചറുകളെ അപേക്ഷിച്ച് ബാരലിന് ഏകദേശം 7 ഡോളര് കുറഞ്ഞ നിരക്കിലാണ് ഈ ഇടപാട് നടന്നിരിക്കുന്നത്
നീണ്ട ഇടവേളയ്ക്ക് ശേഷം ഇറാനില് നിന്നുള്ള എണ്ണ ഇറക്കുമതി പുനരാരംഭിച്ച് ഇന്ത്യയിലെ പ്രമുഖ വ്യവസായ ഗ്രൂപ്പായ റിലയന്സ് ഇന്ഡസ്ട്രീസ്. അമേരിക്കന് ഉപരോധത്തില് താല്ക്കാലിക ഇളവ് ലഭിച്ചതിന് പിന്നാലെയാണ് 50 ലക്ഷം ബാരല് ക്രൂഡ് ഓയില് വാങ്ങാന് റിലയന്സ് കരാറിലേര്പ്പെട്ടത്. നാഷണല് ഇറാനിയന് ഓയില് കമ്പനിയില് നിന്നാണ് ഈ വമ്പന് ശേഖരം സ്വന്തമാക്കിയത്. ഐസിഇ ബ്രെന്റ് ഫ്യൂച്ചറുകളെ അപേക്ഷിച്ച് ബാരലിന് ഏകദേശം 7 ഡോളര് കുറഞ്ഞ നിരക്കിലാണ് ഈ ഇടപാട് നടന്നിരിക്കുന്നത് എന്നത് ഇന്ത്യന് വിപണിക്ക് വലിയ ആശ്വാസമാകും.
2019-ന് ശേഷമുള്ള ആദ്യ വമ്പന് നീക്കം
ട്രംപ് ഭരണകൂടം കഴിഞ്ഞ വെള്ളിയാഴ്ച പുറപ്പെടുവിച്ച 30 ദിവസത്തെ പ്രത്യേക ഇളവാണ് ഈ എണ്ണക്കരാറിലേക്ക് വഴിതുറന്നത്. 2019 മെയ് മാസത്തിന് ശേഷം ഇറാനില് നിന്ന് ഇന്ത്യ നടത്തുന്ന ആദ്യത്തെ പ്രധാന എണ്ണ ഇടപാടാണിത്. മാര്ച്ചില് കയറ്റി അയക്കുന്ന എണ്ണ ഏപ്രില് 19-നകം തുറമുഖങ്ങളില് എത്തിക്കണമെന്ന വ്യവസ്ഥയിലാണ് ഇളവ് അനുവദിച്ചിരിക്കുന്നത്. റഷ്യന് ക്രൂഡ് ഓയിലിന് പിന്നാലെ ഇറാനില് നിന്നും കുറഞ്ഞ നിരക്കില് എണ്ണ ലഭ്യമാകുന്നത് ആഗോള വിതരണക്ഷാമം നേരിടുന്ന ഘട്ടത്തില് ഇന്ത്യയ്ക്ക് തന്ത്രപരമായ നേട്ടമായി മാറും.
ഏഷ്യന് വിപണി ഉറ്റുനോക്കുന്നു
റിലയന്സിന്റെ ഈ ചുവടുവെപ്പിന് പിന്നാലെ മറ്റു ഇന്ത്യന് എണ്ണക്കമ്പനികളും ഇറാനില് നിന്ന് എണ്ണ വാങ്ങാനുള്ള സാധ്യതകള് പരിശോധിച്ചു വരികയാണ്. അതേസമയം, ഏഷ്യയിലെ ഏറ്റവും വലിയ റിഫൈനറായ ചൈനയുടെ 'സിനോപെക്' നിലവില് ഇറാനിയന് എണ്ണ വാങ്ങാന് ഉദ്ദേശിക്കുന്നില്ലെന്ന് വ്യക്തമാക്കിയത് വിപണിയില് ചര്ച്ചയായിട്ടുണ്ട്. റഷ്യയില് നിന്ന് ഇതിനോടകം 40 ദശലക്ഷം ബാരലിലധികം എണ്ണ വാങ്ങിയ ഇന്ത്യ, ഇറാനുമായുള്ള ഈ പുതിയ ബന്ധത്തിലൂടെ ഊര്ജ്ജ സുരക്ഷ കൂടുതല് ശക്തമാക്കുകയാണ്.