Login 
പഠിക്കാം & സമ്പാദിക്കാം 
Home
27 March 2026 7:12 PM IST
വ്യവസായങ്ങള്ക്ക് ഊര്ജ്ജം പകരാന് സര്ക്കാര്; വാണിജ്യ എല്പിജി വിഹിതം 70 ശതമാനമാക്കി ഉയര്ത്തി
MyFin Desk
Summary
സ്റ്റീല്, ഓട്ടോമൊബൈല്സ്, ടെക്സ്റ്റൈല്സ്, കെമിക്കല്സ്, പ്ലാസ്റ്റിക് തുടങ്ങിയ പ്രമുഖ തൊഴില് മേഖലകള്ക്ക് എല്പിജി വിതരണത്തില് പ്രത്യേക മുന്ഗണന നല്കും
രാജ്യത്തെ വ്യവസായ മേഖലയ്ക്ക് കരുത്തുപകരാന് നിര്ണായക നീക്കവുമായി കേന്ദ്ര സര്ക്കാര്. വാണിജ്യ എല്പിജി സിലിണ്ടറുകളുടെ വിഹിതം നിലവിലുള്ള 50 ശതമാനത്തില് നിന്നും 70 ശതമാനമായി ഉയര്ത്തി ഉത്തരവിറക്കി. സ്റ്റീല്, ഓട്ടോമൊബൈല്സ്, ടെക്സ്റ്റൈല്സ്, കെമിക്കല്സ്, പ്ലാസ്റ്റിക് തുടങ്ങിയ പ്രമുഖ തൊഴില് മേഖലകള്ക്ക് എല്പിജി വിതരണത്തില് പ്രത്യേക മുന്ഗണന നല്കും. മറ്റ് അനുബന്ധ വ്യവസായങ്ങളെ കൂടി താങ്ങിനിര്ത്തുന്ന ഈ മേഖലകളുടെ സുഗമമായ പ്രവര്ത്തനത്തിന് പുതിയ തീരുമാനം വലിയ കരുത്താകും.
ഘട്ടംഘട്ടമായ വര്ദ്ധനവ്; പ്രതിസന്ധിക്ക് പരിഹാരം
തുടക്കത്തില് പ്രതിമാസ ആവശ്യകതയുടെ 20 ശതമാനം മാത്രമായിരുന്ന വിഹിതം, പിന്നീട് മാര്ച്ച് 21-ന് 50 ശതമാനമായി ഉയര്ത്തിയിരുന്നു. ഇപ്പോള് വീണ്ടും 20 ശതമാനം കൂടി വര്ദ്ധിപ്പിച്ചതോടെ മൊത്തം വിഹിതം പ്രതിസന്ധിക്ക് മുമ്പുള്ള നിലവാരത്തിന്റെ 70 ശതമാനത്തിലേക്ക് എത്തിയിരിക്കുകയാണ്. പൈപ്പ്ഡ് നാച്ചുറല് ഗ്യാസിലേക്ക് മാറാന് തയ്യാറാകുന്ന സംസ്ഥാനങ്ങള്ക്ക് കൂടുതല് ഗ്യാസ് അനുവദിക്കുമെന്ന വ്യവസ്ഥയും നിലവിലുണ്ട്. എല്പിജി ഉപയോഗം അനിവാര്യമായ പ്രത്യേക വ്യവസായ പ്രക്രിയകളെ ചില കര്ശന നിയന്ത്രണങ്ങളില് നിന്ന് ഒഴിവാക്കിയിട്ടുമുണ്ട്.
ഹോട്ടലുകള്ക്കും കുടിയേറ്റ തൊഴിലാളികള്ക്കും കരുതല്
റസ്റ്റോറന്റുകള്, ഹോട്ടലുകള്, കമ്മ്യൂണിറ്റി കിച്ചണുകള്, ഫുഡ് പ്രോസസിംഗ് യൂണിറ്റുകള് എന്നിവയ്ക്കാണ് വിഹിതത്തില് പ്രധാന മുന്ഗണന നല്കുന്നത്. ഇതോടൊപ്പം കുടിയേറ്റ തൊഴിലാളികള്ക്കായി ലഭ്യമാക്കുന്ന 5 കിലോയുടെ എഫ്ടിഎല് സിലിണ്ടറുകള്ക്കും പ്രാധാന്യമുണ്ട്. മാര്ച്ച് 25 വരെയുള്ള കണക്കുകള് പ്രകാരം 37,000-ത്തോളം ഇത്തരം ചെറിയ സിലിണ്ടറുകള് കുടിയേറ്റ തൊഴിലാളികള്ക്കിടയില് വിറ്റഴിച്ചു കഴിഞ്ഞു. മുന്ഗണനാ ക്രമമനുസരിച്ച് ജില്ലാ അധികാരികള് വിതരണം കൃത്യമായി വിലയിരുത്തും.
പിഎന്ജിയിലേക്ക് മാറാന് നിര്ദ്ദേശം
പുതുതായി അനുവദിച്ച അധിക വിഹിതം പ്രയോജനപ്പെടുത്താന് വാണിജ്യ ഉപഭോക്താക്കള് എണ്ണക്കമ്പനികളില് രജിസ്റ്റര് ചെയ്യേണ്ടതുണ്ട്. അതോടൊപ്പം തങ്ങളുടെ നഗരങ്ങളിലെ ഗ്യാസ് വിതരണ ഏജന്സികളില് പിഎന്ജി കണക്ഷനായി അപേക്ഷിക്കണമെന്നും സര്ക്കാര് അറിയിച്ചിട്ടുണ്ട്. 27 സംസ്ഥാനങ്ങളും കേന്ദ്രഭരണ പ്രദേശങ്ങളും ഇതിനോടകം തന്നെ വാണിജ്യ എല്പിജി വിതരണത്തിനുള്ള ഉത്തരവുകള് പുറപ്പെടുവിച്ചു കഴിഞ്ഞു. ഊര്ജ്ജ ഉപഭോഗത്തില് കൂടുതല് സുതാര്യതയും ലാഭക്ഷമതയും കൊണ്ടുവരികയാണ് സര്ക്കാരിന്റെ ലക്ഷ്യം.