Login 
പഠിക്കാം & സമ്പാദിക്കാം 
Home
27 Oct 2026 4:44 PM IST
2027ല്‍ ഇന്ത്യന്‍ ഡീസല്‍ കയറ്റുമതി കുതിക്കും; ആഗോള വിപണിയില്‍ മുന്നേറ്റത്തിന് സാധ്യത
MyFin Desk
Summary
2030ഓടെ പ്രതിവര്‍ഷം 30 കോടി ടണ്‍ എണ്ണ ശുദ്ധീകരണ ശേഷി കൈവരിക്കാനാണ് ഇന്ത്യ ലക്ഷ്യമിടുന്നത്.
ഇന്ത്യയുടെ ഡീസല്‍ കയറ്റുമതി 2027 മുതല്‍ വന്‍തോതില്‍ വര്‍ധിക്കുമെന്ന് റിപ്പോര്‍ട്ട്. രാജ്യത്തെ എണ്ണ ശുദ്ധീകരണ ശേഷി വര്‍ധിപ്പിക്കുന്നതും ആഗോള വിപണിയില്‍ ഇന്ധന ലഭ്യത കുറയുന്നതുമാണ് ഇന്ത്യയ്ക്ക് പുതിയ അവസരങ്ങള്‍ തുറക്കുന്നത്. ആഗോള ഡീസല്‍ വിപണിയില്‍ കൂടുതല്‍ ശക്തമായ സാന്നിധ്യമാകാനാണ് ഇന്ത്യയുടെ നീക്കം.
രാജ്യത്തെ പൊതുമേഖലാ എണ്ണക്കമ്പനികള്‍ ഉല്‍പ്പാദന ശേഷി വര്‍ധിപ്പിക്കുന്നതോടെ അധിക ഡീസല്‍ കയറ്റുമതി ചെയ്യാന്‍ കഴിയുമെന്നാണ് വിലയിരുത്തല്‍. 2027ല്‍ പൊതുമേഖലാ റിഫൈനറികള്‍ സംയുക്തമായി ഡീസല്‍ ഉല്‍പ്പാദന ശേഷി പ്രതിവര്‍ഷം 1.65 കോടി ടണ്‍ വര്‍ധിപ്പിക്കുമെന്നാണ് റിപ്പോര്‍ട്ട്. ഇതോടെ അന്താരാഷ്ട്ര വിപണിയില്‍ ഇന്ത്യയുടെ പങ്ക് കൂടുതല്‍ ശക്തമാകാന്‍ സാധ്യതയുണ്ട്.
ഇന്ത്യന്‍ ഓയില്‍ കോര്‍പ്പറേഷന്‍ പ്രതിവര്‍ഷം ഏകദേശം 1.8 കോടി ടണ്‍ അധിക ശുദ്ധീകരണ ശേഷി കൂട്ടാനാണ് ലക്ഷ്യമിടുന്നത്. ഇതിലൂടെ എട്ട് ദശലക്ഷം ടണ്ണോളം അധിക ഡീസല്‍ ഉല്‍പ്പാദിപ്പിക്കാനാകുമെന്നാണ് കമ്പനി പ്രതീക്ഷിക്കുന്നത്. ഹിന്ദുസ്ഥാന്‍ പെട്രോളിയത്തിന്റെ രാജസ്ഥാനിലെ പുതിയ റിഫൈനറി സ്ഥിരതയാര്‍ജിക്കുന്നതോടെ അടുത്ത വര്‍ഷം ഏകദേശം 30 ലക്ഷം ടണ്‍ ഡീസല്‍ ഉല്‍പ്പാദിപ്പിക്കാനും കഴിയും. ഭാരത് പെട്രോളിയവും അടുത്ത വര്‍ഷം മുതല്‍ 15 ലക്ഷം ടണ്‍ അധിക ഡീസല്‍ ഉല്‍പ്പാദിപ്പിക്കാനാണ് പദ്ധതിയിടുന്നത്.
കൂടാതെ, അസമിലെ നുമാലിഗഡ് റിഫൈനറിയുടെ വികസനവും ഉല്‍പ്പാദനം വര്‍ധിപ്പിക്കാന്‍ സഹായിക്കും. റിഫൈനറിയുടെ ശേഷി 2027 മാര്‍ച്ചോടെ പ്രതിവര്‍ഷം 90 ലക്ഷം ടണ്ണായി ഉയര്‍ത്താനാണ് ലക്ഷ്യമിടുന്നത്. ഇതിലൂടെ ഏകദേശം 30 ലക്ഷം ടണ്‍ അധിക ഡീസല്‍ ഉല്‍പ്പാദിപ്പിക്കാനാകും.
അതേസമയം, റഷ്യ-യുക്രെയ്ന്‍ സംഘര്‍ഷവും പശ്ചിമേഷ്യയിലെ സംഘര്‍ഷാവസ്ഥയും ആഗോള ഇന്ധന വിതരണത്തെ ബാധിക്കുന്നുണ്ട്. ചില രാജ്യങ്ങളിലെ റിഫൈനറികളുടെ പ്രവര്‍ത്തന തടസ്സങ്ങളും കയറ്റുമതി നിയന്ത്രണങ്ങളും ഡീസല്‍ ലഭ്യതയില്‍ സമ്മര്‍ദം സൃഷ്ടിക്കുന്നു. ഈ സാഹചര്യത്തില്‍ വിശ്വസനീയമായ വിതരണക്കാരെന്ന നിലയില്‍ ഇന്ത്യയ്ക്ക് കൂടുതല്‍ വിപണികള്‍ കണ്ടെത്താന്‍ സാധിക്കുമെന്നാണ് പ്രതീക്ഷ.
നിലവില്‍ കടല്‍മാര്‍ഗമുള്ള ഡീസല്‍ കയറ്റുമതിയില്‍ ഈ വര്‍ഷം അമേരിക്കയ്ക്ക് പിന്നില്‍ രണ്ടാം സ്ഥാനത്താണ് ഇന്ത്യയെന്ന് കെപ്ലറിന്റെ കപ്പല്‍ ഗതാഗത വിവരങ്ങള്‍ വ്യക്തമാക്കുന്നു. റിഫൈനറികളുടെ വികസനം തുടരുന്നതിനൊപ്പം 2030ഓടെ പ്രതിവര്‍ഷം 30 കോടി ടണ്‍ എണ്ണ ശുദ്ധീകരണ ശേഷി കൈവരിക്കാനാണ് ഇന്ത്യ ലക്ഷ്യമിടുന്നത്. ദീര്‍ഘകാലാടിസ്ഥാനത്തില്‍ ഇത് 40 കോടി ടണ്ണായി ഉയര്‍ത്താനും പദ്ധതിയുണ്ട്.
ഇന്ധന കയറ്റുമതി വര്‍ധിക്കുന്നത് രാജ്യത്തിന് വിദേശനാണ്യ വരുമാനം കൂട്ടാന്‍ സഹായിച്ചേക്കാം. എന്നാല്‍ ആഭ്യന്തര ഇന്ധന ആവശ്യകത, ക്രൂഡ് ഓയില്‍ വില, ആഗോള വിപണിയിലെ സാഹചര്യം എന്നിവയെ ആശ്രയിച്ചായിരിക്കും കയറ്റുമതിയില്‍ നിന്നുള്ള നേട്ടം. കൂടുതല്‍ ഉല്‍പ്പാദന ശേഷിയും ആഗോള വിപണിയിലെ ആവശ്യവും ഒത്തുചേരുന്നതോടെ ഇന്ത്യയുടെ എണ്ണ ശുദ്ധീകരണ മേഖല പുതിയ വളര്‍ച്ചാ ഘട്ടത്തിലേക്ക് കടക്കുമെന്നാണ് പ്രതീക്ഷ.