ഇറാന്‍ എണ്ണടാങ്കര്‍ നടുക്കടലില്‍ റൂട്ടുമാറ്റി; നേരെ ചൈനയിലേക്ക്, ഇന്ത്യക്ക് തിരിച്ചടി

ഏഴ് വര്‍ഷത്തെ ഇടവേളയ്ക്ക് ശേഷം ഇറാനില്‍ നിന്നുള്ള എണ്ണ ഇറക്കുമതി പുനരാരംഭിക്കാനുള്ള ഇന്ത്യയുടെ നീക്കത്തിന് തിരിച്ചടി. ഇന്ത്യയിലെ വാഡിനാര്‍ തുറമുഖത്തേക്ക് ലക്ഷ്യം വെച്ചിരുന്ന ഇറാനിയന്‍ എണ്ണക്കപ്പല്‍ 'പിംഗ് ഷുന്‍' പാതിവഴിയില്‍ പാത മാറ്റി ചൈനയിലേക്ക് തിരിച്ചുവിട്ടു. പശ്ചിമേഷ്യയില്‍ യുദ്ധം കൊടുമ്പിരിക്കൊള്ളുന്നതിനിടെ, ഹോര്‍മുസ് കടലിടുക്കിലെ പ്രതിസന്ധികള്‍ക്കിടയിലാണ് തന്ത്രപരമായ ഈ നീക്കം നടന്നിരിക്കുന്നത്. ഷിപ്പിംഗ് ട്രാക്കിംഗ് ഏജന്‍സിയായ കെപ്ലര്‍ ആണ് കപ്പലിന്റെ ലക്ഷ്യസ്ഥാനം ചൈനയിലെ ഡോങ്യിംഗിലേക്ക് മാറ്റിയ വിവരം പുറത്തുവിട്ടത്.

യുഎസ് ഉപരോധങ്ങള്‍ക്കിടയിലും വിപണി സമ്മര്‍ദ്ദം കുറയ്ക്കാന്‍ ഇറാനിയന്‍ ക്രൂഡ് ഓയിലിന് കഴിഞ്ഞ മാസം അമേരിക്ക നേരിയ ഇളവുകള്‍ നല്‍കിയിരുന്നു. ഇത് പ്രയോജനപ്പെടുത്തി കുറഞ്ഞ നിരക്കില്‍ എണ്ണ എത്തിക്കാന്‍ ഇന്ത്യ ശ്രമിച്ചെങ്കിലും പണമടയ്ക്കല്‍, ഇന്‍ഷുറന്‍സ് തുടങ്ങിയ സാങ്കേതിക തടസ്സങ്ങള്‍ വില്ലനായി. 2019 മെയ് മാസത്തിന് ശേഷം ഇന്ത്യ ഇറാനില്‍ നിന്ന് എണ്ണ ഇറക്കുമതി ചെയ്തിട്ടില്ല. ഈ ചരിത്രപരമായ ഇറക്കുമതി നടന്നിരുന്നുവെങ്കില്‍ ആഭ്യന്തര വിപണിയിലെ ഇന്ധനവിലക്കയറ്റത്തിന് അതൊരു വലിയ ആശ്വാസമാകുമായിരുന്നു.

ഷിപ്പിംഗ് മേഖലയിലെ സങ്കീര്‍ണ്ണതകളാണ് ഇന്ത്യയ്ക്ക് തിരിച്ചടിയായത്. ഉപരോധം നേരിടുന്ന സ്ഥാപനങ്ങളുമായി ഡോളറില്‍ ഇടപാട് നടത്താന്‍ അന്താരാഷ്ട്ര ബാങ്കുകള്‍ വിസമ്മതിക്കുന്നത് വലിയ പ്രതിസന്ധിയാണ് സൃഷ്ടിക്കുന്നത്. കഴിഞ്ഞ മാസം മംഗലാപുരത്ത് എത്തിയ ഇറാനിയന്‍ എല്‍പിജി കപ്പല്‍ ഇപ്പോഴും പണമടയ്ക്കല്‍ പ്രശ്‌നങ്ങളെത്തുടര്‍ന്ന് തീര്‍പ്പാക്കാതെ കിടക്കുകയാണ്. ഇത്തരം റിസ്‌കുകള്‍ ഉള്ളതിനാലാണ് പല പൊതുമേഖലാ റിഫൈനറികളും ഇറാനില്‍ നിന്നുള്ള നേരിട്ടുള്ള വാങ്ങലുകളില്‍ നിന്ന് വിട്ടുനില്‍ക്കുന്നത്.

പശ്ചിമേഷ്യന്‍ സംഘര്‍ഷം കാരണം ആഗോള വിപണിയില്‍ എണ്ണവില കുതിച്ചുയരുന്ന സാഹചര്യത്തില്‍ ഇന്ത്യയ്ക്ക് ഈ പിന്‍മാറ്റം വലിയ തിരിച്ചടിയാണ്. ഇറാനില്‍ നിന്നുള്ള എണ്ണ ചൈനയിലേക്ക് വഴിമാറുന്നത് ആഗോള ഊര്‍ജ്ജ രാഷ്ട്രീയത്തിലെ പുതിയ മാറ്റങ്ങളെയാണ് സൂചിപ്പിക്കുന്നത്. ഹോര്‍മുസ് കടലിടുക്കിലെ നിയന്ത്രണങ്ങളും യുഎസ് ഉപരോധങ്ങളും നിലനില്‍ക്കുന്നിടത്തോളം കാലം ഇറാനിയന്‍ എണ്ണ ഇന്ത്യയിലെത്തിക്കുക എന്നത് വലിയൊരു വെല്ലുവിളിയായി തന്നെ തുടരുമെന്നാണ് സാമ്പത്തിക വിദഗ്ധര്‍ വിലയിരുത്തുന്നത്.