Login 
പഠിക്കാം & സമ്പാദിക്കാം 
Home
19 May 2026 9:43 PM IST
Summary
കടലിടുക്ക് അടച്ചതോടെ അന്താരാഷ്ട്ര വിപണിയില് അസംസ്കൃത എണ്ണവില ബാരലിന് 110 ഡോളറിലേക്ക് കുതിച്ചുയര്ന്നു. ഇത് യുദ്ധത്തിന് മുമ്പുള്ളതിനേക്കാള് 50 ശതമാനത്തോളം കൂടുതലാണ്
തന്ത്രപ്രധാനമായ ഹോര്മുസ് കടലിടുക്ക് ഇറാന് അടച്ചിട്ടിരിക്കുന്ന പശ്ചാത്തലത്തില്, സൈനിക ഇടപെടലിന് നാറ്റോ ഒരുങ്ങുന്നതായി റിപ്പോര്ട്ട്. ജൂലൈ ആദ്യവാരത്തോടെ ഇറാന് ജലപാത തുറന്നില്ലെങ്കില്, തടഞ്ഞുകിടക്കുന്ന കപ്പലുകളെ സുരക്ഷിതമായി കടത്തിവിടാന് നാറ്റോ സൈന്യത്തെ ഇറക്കുന്നതിനെക്കുറിച്ചുള്ള ചര്ച്ചകള് സജീവമാണെന്ന് പ്രമുഖ വാര്ത്താ ഏജന്സിയായ ബ്ലൂംബെര്ഗ് വെളിപ്പെടുത്തി. യുഎസ്-ഇസ്രയേല്-ഇറാന് സംഘര്ഷത്തില് നേരിട്ട് ഇടപെടുന്നതിനെതിരെ മാസങ്ങളായി വിട്ടുനിന്ന യൂറോപ്യന് രാജ്യങ്ങള് തങ്ങളുടെ നിലപാട് മാറ്റുന്നു എന്നതിന്റെ വ്യക്തമായ സൂചനയാണിത്.
ജൂലൈ 7-8 തീയതികളില് അങ്കാറയില് നടക്കാനിരിക്കുന്ന നാറ്റോ ഉച്ചകോടിയില് ഈ വിഷയം പ്രധാന ചര്ച്ചയാകും. ഫെബ്രുവരി 28-ന് അമേരിക്കയും ഇസ്രയേലും ഇറാനില് ബോംബാക്രമണം ആരംഭിച്ചതിന് തൊട്ടുപിന്നാലെയാണ് പ്രതികാരമായി ഇറാന് ഈ നിര്ണായക ജലപാത അടച്ചത്. ലോകത്തിലെ എണ്ണ, ദ്രവീകൃത പ്രകൃതിവാതകം എന്നിവയുടെ ആകെ വിതരണത്തിന്റെ അഞ്ചിലൊന്നും കടന്നുപോകുന്ന കപ്പല്പ്പാതയാണിത്.
കടലിടുക്ക് അടച്ചതോടെ അന്താരാഷ്ട്ര വിപണിയില് അസംസ്കൃത എണ്ണവില ബാരലിന് 110 ഡോളറിലേക്ക് കുതിച്ചുയര്ന്നു. ഇത് യുദ്ധത്തിന് മുമ്പുള്ളതിനേക്കാള് 50 ശതമാനത്തോളം കൂടുതലാണ്. ആഗോളതലത്തില് പണപ്പെരുപ്പ ഭീതി വര്ദ്ധിപ്പിക്കാനും സാമ്പത്തിക വളര്ച്ച മന്ദഗതിയിലാക്കാനും ഇത് കാരണമായി. സാമ്പത്തിക നാശനഷ്ടങ്ങള് താങ്ങാനാവാത്ത പരിധിയിലേക്ക് ഉയര്ന്നതോടെയാണ്, മുന്പ് സൈനിക നീക്കങ്ങളെ എതിര്ത്തിരുന്ന പല നാറ്റോ അംഗങ്ങളും ഇപ്പോള് ഉപരോധം തകര്ക്കാനുള്ള ഇടപെടലുകള്ക്ക് അനുകൂലമായി ചിന്തിക്കാന് തുടങ്ങിയത്.
എന്നാല്, സഖ്യത്തിനുള്ളില് ഈ നീക്കത്തിനെതിരെ ഇപ്പോഴും ശക്തമായ ഭിന്നത നിലനില്ക്കുന്നുണ്ട്. യുഎസ് പ്രസിഡന്റ് ഡൊണാള്ഡ് ട്രംപ് തന്റെ നീക്കങ്ങളെ പിന്തുണയ്ക്കാത്തതിന് നാറ്റോ പങ്കാളികളെ പരസ്യമായി വിമര്ശിച്ചിരുന്നു. ഇതിന്റെ തുടര്ച്ചയായി ജര്മ്മനിയില് നിന്ന് 5,000 അമേരിക്കന് സൈനികരെ പിന്വലിക്കാന് വാഷിംഗ്ടണ് തീരുമാനിച്ചതും സഖ്യത്തിലെ പിരിമുറുക്കം കൂട്ടി. കഴിഞ്ഞ ഏപ്രിലില് മേഖലയില് ഉപരോധം ഏര്പ്പെടുത്താനുള്ള ട്രംപിന്റെ അഭ്യര്ത്ഥന നാറ്റോ സഖ്യകക്ഷികള് പരസ്യമായി നിരസിക്കുകയാണ് ചെയ്തത്. 'ഞങ്ങളെ ഒരു യുദ്ധത്തിലേക്ക് വലിച്ചിഴയ്ക്കാനാകില്ല' എന്നായിരുന്നു ബ്രിട്ടീഷ് പ്രധാനമന്ത്രി കെയര് സ്റ്റാര്മറുടെ അന്നത്തെ പ്രതികരണം.
നിലവില് സ്പെയിന് പോലുള്ള രാജ്യങ്ങള് ഇറാനെതിരായ സൈനിക നീക്കങ്ങള്ക്കായി തങ്ങളുടെ വ്യോമാതിര്ത്തിയോ സൈനിക താവളങ്ങളോ ഉപയോഗിക്കാന് അമേരിക്കയെ അനുവദിക്കുന്നില്ല. എന്നാല് ഭൂരിഭാഗം രാജ്യങ്ങളും രഹസ്യമായി ലോജിസ്റ്റിക്കല് പിന്തുണ നല്കുന്നുണ്ട്. അതേസമയം, പരസ്യമായ യുദ്ധത്തിനില്ലെങ്കിലും മേഖലയിലെ പോരാട്ടങ്ങള്ക്ക് നേരിയ ശമനമുണ്ടായാല് ഹോര്മുസ് കടലിടുക്കിലെ കപ്പല് ഗതാഗത സുരക്ഷ ഉറപ്പാക്കാനുള്ള സ്വതന്ത്ര പദ്ധതികള്ക്ക് ഫ്രാന്സും യുകെയും വെവ്വേറെ നേതൃത്വം നല്കുന്നുമുണ്ട്. ജൂലൈയിലെ നാറ്റോ യോഗം ഈ ആഗോള പ്രതിസന്ധിയില് നിര്ണായക വഴിത്തിരിവാകും.