ഗ്യാസ് തീര്‍ന്നോ? പേടിക്കണ്ട, ഇനി എടിഎമ്മില്‍ പോയി സിലിണ്ടറെടുക്കാം!

രാജ്യത്ത് എല്‍പിജി വിതരണത്തിലെ അനിശ്ചിതത്വങ്ങള്‍ നിലനില്‍ക്കെ, ഉപഭോക്താക്കള്‍ക്ക് ആശ്വാസമായി ഗുരുഗ്രാമില്‍ വിപ്ലവകരമായ എല്‍പിജി എടിഎം പ്രവര്‍ത്തനം ആരംഭിച്ചു. സോഹ്ന സെക്ടര്‍ 33-ലെ റെസിഡന്‍ഷ്യല്‍ ടൗണ്‍ഷിപ്പിലാണ് ഭാരത് പെട്രോളിയം കോര്‍പ്പറേഷന്‍ ലിമിറ്റഡ് (ബിപിസിഎല്‍) തങ്ങളുടെ പൈലറ്റ് പ്രോജക്ടിന്റെ ഭാഗമായി ഈ അത്യാധുനിക വെന്‍ഡിംഗ് മെഷീന്‍ സ്ഥാപിച്ചിരിക്കുന്നത്. ഏജന്‍സികളില്‍ വിളിച്ചു ബുക്ക് ചെയ്യുന്നതിനും ഡെലിവറിക്കായി ദിവസങ്ങളോളം കാത്തിരിക്കുന്നതിനും പകരം മിനിറ്റുകള്‍ക്കുള്ളില്‍ പാചകവാതകം സ്വന്തമാക്കാം എന്നതാണ് ഇതിന്റെ സവിശേഷത.

പൂര്‍ണ്ണമായും ഡിജിറ്റലായി പ്രവര്‍ത്തിക്കുന്ന ഈ സംവിധാനം 24 മണിക്കൂറും സേവനം ഉറപ്പാക്കുന്നു. ഉപഭോക്താക്കള്‍ക്ക് തങ്ങളുടെ രജിസ്റ്റര്‍ ചെയ്ത മൊബൈല്‍ നമ്പര്‍ നല്‍കി ഒടിപി വഴി ലോഗിന്‍ ചെയ്ത ശേഷം, ഒഴിഞ്ഞ സിലിണ്ടറിലെ ക്യുആര്‍ കോഡ് സ്‌കാന്‍ ചെയ്ത് നടപടികള്‍ തുടങ്ങാം. യുപിഐ , ക്രെഡിറ്റ്/ഡെബിറ്റ് കാര്‍ഡുകള്‍ വഴി പണമടച്ചു കഴിഞ്ഞാല്‍ വെറും രണ്ട് മുതല്‍ മൂന്ന് മിനിറ്റിനുള്ളില്‍ മെഷീന്‍ വഴി പുതിയ സിലിണ്ടര്‍ ലഭ്യമാകും. സമ്പര്‍ക്കരഹിതവും സുതാര്യവുമായ സേവനമാണ് ഇതിലൂടെ കമ്പനി ലക്ഷ്യമിടുന്നത്.

പരമ്പരാഗത ലോഹ സിലിണ്ടറുകള്‍ക്ക് പകരമായി ഭാരം കുറഞ്ഞ കോമ്പോസിറ്റ് സിലിണ്ടറുകളാണ് ഈ എടിഎമ്മില്‍ ലഭ്യമാകുന്നത്. സാധാരണ സിലിണ്ടറുകള്‍ക്ക് ഗ്യാസ് ഉള്‍പ്പെടെ ഏകദേശം 31 കിലോഗ്രാം ഭാരമുള്ളപ്പോള്‍, ഫൈബര്‍ ഉപയോഗിച്ച് നിര്‍മ്മിച്ച ഈ പുതിയ സിലിണ്ടറുകള്‍ക്ക് വെറും 15 കിലോഗ്രാം മാത്രമേ ഭാരമുള്ളൂ. ഇത് സ്ത്രീകള്‍ക്കും മുതിര്‍ന്നവര്‍ക്കും കൈകാര്യം ചെയ്യാനും കൊണ്ടുപോകാനും ഏറെ എളുപ്പമാണ്. കൂടാതെ, ഇവ തുരുമ്പ് പിടിക്കാത്തതും സുരക്ഷിതവുമാണ്.

ഒരേസമയം 10 സിലിണ്ടറുകള്‍ വരെ സംഭരിക്കാന്‍ ശേഷിയുള്ള ഈ മിനി എടിഎമ്മില്‍ സ്റ്റോക്ക് കുറയുമ്പോള്‍ ഉടന്‍ തന്നെ അടുത്തുള്ള ഏജന്‍സികള്‍ക്ക് വിവരം നല്‍കുന്ന സാങ്കേതികവിദ്യയും സജ്ജീകരിച്ചിട്ടുണ്ട്. ഇതിലൂടെ കൃത്യസമയത്ത് സ്റ്റോക്ക് പുനസ്ഥാപിക്കാനും തടസ്സമില്ലാത്ത സേവനം ഉറപ്പാക്കാനും സാധിക്കുന്നു. നഗരങ്ങളിലെ തിരക്കേറിയ ജീവിതത്തിനിടയില്‍ ഗ്യാസ് തീര്‍ന്നുപോകുന്ന സാഹചര്യം നേരിടാന്‍ ഈ സ്മാര്‍ട്ട് സൊല്യൂഷന്‍ സഹായമാകും.

ഇന്ധന വിതരണത്തില്‍ നൂതന സാങ്കേതികവിദ്യകള്‍ പരീക്ഷിക്കുന്നതിന്റെ ഭാഗമായാണ് ബിപിസിഎല്‍ ഈ പദ്ധതി കൊണ്ടുവന്നിരിക്കുന്നത്. കാലതാമസം ഒഴിവാക്കി ഉപഭോക്താക്കള്‍ക്ക് കൂടുതല്‍ വേഗതയും സൗകര്യവും നല്‍കുകയാണ് ഇതിന്റെ ലക്ഷ്യം. ഈ പൈലറ്റ് പ്രോജക്ട് വിജയകരമായാല്‍ രാജ്യത്തെ മറ്റ് നഗരങ്ങളിലേക്കും ഇത്തരം എല്‍പിജി എടിഎമ്മുകള്‍ വ്യാപിപ്പിക്കാനുള്ള ഒരുക്കത്തിലാണ് അധികൃതര്‍.