കല്‍ക്കരി സ്‌റ്റോക്ക് വെറും മൂന്നു ദിവസത്തേക്ക്; രാജ്യം വൈദ്യുതി പ്രതിസന്ധിയിലേക്ക്?

എല്‍ നിനോ പ്രതിഭാസത്തെ തുടര്‍ന്നുള്ള കടുത്ത ചൂടില്‍ രാജ്യത്തെ വൈദ്യുതി ആവശ്യകത കുതിച്ചുയര്‍ന്നതോടെ കല്‍ക്കരി നിലയങ്ങള്‍ വന്‍ പ്രതിസന്ധിയിലേക്ക്. രാജ്യത്തെ 40% കല്‍ക്കരി അധിഷ്ഠിത പവര്‍ പ്ലാന്റുകളും വളരെ കുറഞ്ഞ ഇന്ധന സ്റ്റോക്കിലാണ് പ്രവര്‍ത്തിക്കുന്നതെന്ന് കേന്ദ്ര സര്‍ക്കാര്‍ ഡാറ്റ വ്യക്തമാക്കുന്നു. ആവശ്യമായതിന്റെ 25% ല്‍ താഴെ മാത്രം കല്‍ക്കരിയുള്ളതും മൂന്ന് ദിവസത്തേക്ക് മാത്രം വൈദ്യുതി ഉത്പാദിപ്പിക്കാന്‍ ശേഷിയുള്ളതുമായ പ്ലാന്റുകളുടെ എണ്ണം ഒരാഴ്ചയ്ക്കിടെ 60 ല്‍ നിന്ന് 74 ആയി ഉയര്‍ന്നതായി സെന്‍ട്രല്‍ ഇലക്ട്രിസിറ്റി അതോറിറ്റി അറിയിച്ചു.

കഴിഞ്ഞ ആഴ്ച ഇന്ത്യയുടെ പീക്ക് പവര്‍ ഡിമാന്‍ഡ് 230 മുതല്‍ 250 ജിഗാവാട്ട് വരെ രേഖപ്പെടുത്തിയിരുന്നു. മെയ് മാസത്തില്‍ ഇത് 270.70 ജിഗാവാട്ട് എന്ന എക്കാലത്തെയും ഉയര്‍ന്ന നിരക്കിലെത്തിയിരുന്നു. ഉഷ്ണതരംഗവും ജലവൈദ്യുത ഉത്പാദനത്തിലുണ്ടായ ഇടിവുമാണ് കല്‍ക്കരി നിലയങ്ങളെ കൂടുതല്‍ ആശ്രയിക്കാന്‍ പ്രേരിപ്പിച്ചത്. ഇതോടെ ഓഗസ്റ്റില്‍ വൈദ്യുതി കമ്പനികളുടെ കല്‍ക്കരി ഇറക്കുമതി 15 മാസത്തെ ഏറ്റവും ഉയര്‍ന്ന നിലയിലെത്തിയതായി റോയിട്ടേഴ്‌സ് റിപ്പോര്‍ട്ട് ചെയ്തു.

എന്നാല്‍ ഇത് ഘടനാപരമായ വിതരണ തടസ്സമല്ലെന്നും താല്‍ക്കാലിക ലോജിസ്റ്റിക്‌സ് പ്രശ്‌നം മാത്രമാണെന്നുമാണ് ക്രിസില്‍ വിലയിരുത്തുന്നത്. ക്രമരഹിതമായ മണ്‍സൂണ്‍ മഴ കയറ്റുമതിയെ ബാധിച്ചതാണ് സ്റ്റോക്ക് കുറയാന്‍ കാരണമെന്നും സെപ്റ്റംബര്‍ ആദ്യം തന്നെ കല്‍ക്കരി, റെയില്‍വേ മന്ത്രാലയങ്ങള്‍ വിതരണം വര്‍ധിപ്പിക്കാന്‍ നടപടി തുടങ്ങിയിട്ടുണ്ടെന്നും അധികൃതര്‍ പറയുന്നു.

ഏപ്രില്‍ മുതല്‍ ഓഗസ്റ്റ് വരെ പുനരുപയോഗ ഊര്‍ജ്ജ ഉത്പാദനം 21% വര്‍ധിച്ചെങ്കിലും 24 മണിക്കൂറും ആവശ്യകത നിറവേറ്റാന്‍ അത് പോരെന്നാണ് ക്രിസില്‍ ചൂണ്ടിക്കാട്ടുന്നത്. ശുദ്ധോര്‍ജ്ജത്തിന്റെ ഇടയ്ക്കിടെയുള്ള ലഭ്യതക്കുറവ് മൂലം ഇപ്പോഴും കല്‍ക്കരി നിലയങ്ങളാണ് രാജ്യത്തിന്റെ വൈദ്യുതി ആവശ്യത്തിന്റെ നട്ടെല്ല്.