സ്വപ്നങ്ങള്‍ക്ക് പ്രീമിയം തിളക്കം; വീട് വാങ്ങുന്നതില്‍ വിപ്ലവം സൃഷ്ടിച്ച് ഇന്ത്യന്‍ വനിതകള്‍

ഇന്ന് റിയല്‍ എസ്റ്റേറ്റ് വിപണിയില്‍ വെറുമൊരു ഉപദേശക വേഷത്തിലല്ല, മറിച്ച് മുന്‍കൈയെടുക്കുന്ന നിക്ഷേപകരായും തീരുമാനങ്ങള്‍ എടുക്കുന്ന 'ബോസ്' ആയും സ്ത്രീകള്‍ മാറിക്കഴിഞ്ഞു. സാമ്പത്തിക സ്വാതന്ത്ര്യവും മികച്ച ജീവിതസാഹചര്യങ്ങള്‍ക്കായുള്ള അടങ്ങാത്ത ആഗ്രഹവുമാണ് ഈ വിപ്ലവകരമായ മാറ്റത്തിന് പിന്നിലെ കരുത്ത്.

ഒരുകാലത്ത് ഇന്ത്യന്‍ കുടുംബങ്ങളില്‍ വീട് വാങ്ങുക അലേലെങ്കില്‍ നിര്‍മ്മിക്കുക എന്നത് പുരുഷന്മാര്‍ തീരുമാനിച്ചിരുന്ന കാര്യമായിരുന്നു. സാമ്പത്തിക കാര്യങ്ങളില്‍ സ്ത്രീകള്‍ പശ്ചാത്തലത്തില്‍ ഒതുങ്ങിനിന്നിരുന്ന ആ പഴയ ചിത്രം ഇന്ന് പൂര്‍ണ്ണമായും മാറിക്കഴിഞ്ഞു. ഇന്ന് റിയല്‍ എസ്റ്റേറ്റ് വിപണിയില്‍ വെറുമൊരു ഉപദേശക വേഷത്തിലല്ല, മറിച്ച് മുന്‍കൈയെടുക്കുന്ന നിക്ഷേപകരായും തീരുമാനങ്ങള്‍ എടുക്കുന്ന 'ബോസ്' ആയും സ്ത്രീകള്‍ മാറിക്കഴിഞ്ഞു. സാമ്പത്തിക സ്വാതന്ത്ര്യവും മികച്ച ജീവിതസാഹചര്യങ്ങള്‍ക്കായുള്ള അടങ്ങാത്ത ആഗ്രഹവുമാണ് ഈ വിപ്ലവകരമായ മാറ്റത്തിന് പിന്നിലെ കരുത്ത്.

പ്രീമിയം മോഹങ്ങള്‍ക്ക് ചിറകുമുളയ്ക്കുമ്പോള്‍

വെറുമൊരു തലചായ്ക്കാന്‍ ഒരിടം എന്നതിലുപരി, അത്യാധുനിക സൗകര്യങ്ങളുള്ള 'പ്രീമിയം' ജീവിതശൈലിയോടാണ് പുതുതലമുറയിലെ വനിതകള്‍ക്ക് പ്രിയം. അനറോക്കിന്റെ പുതിയ കണക്കുകള്‍ ഞെട്ടിക്കുന്നതാണ്. 2019-ല്‍ 90 ലക്ഷത്തിന് മുകളില്‍ വിലയുള്ള വീടുകള്‍ ലക്ഷ്യമിട്ടിരുന്ന സ്ത്രീകള്‍ വെറും 25% മാത്രമായിരുന്നെങ്കില്‍, ഇന്ന് അത് 61% ആയി കുത്തനെ ഉയര്‍ന്നു. നഗരങ്ങളിലെ പ്രീമിയം വീട് വില്‍പ്പനയുടെ പകുതിയിലധികവും ഇന്ന് സ്ത്രീകളുടെ താല്പര്യങ്ങള്‍ മുന്‍നിര്‍ത്തിയാണ് നടക്കുന്നത് എന്നത് ശ്രദ്ധേയമാണ്.

സ്വര്‍ണത്തേക്കാള്‍ പ്രിയം 'ഇഷ്ടികയും സിമന്റും'

പരമ്പരാഗതമായി ഇന്ത്യന്‍ സ്ത്രീകള്‍ക്ക് സ്വര്‍ണത്തോടും സ്ഥിരനിക്ഷേപങ്ങളോടുമായിരുന്നു പ്രിയം. എന്നാല്‍ കാലം മാറിയതോടെ നിക്ഷേപ ചിന്താഗതിയും മാറി. ഇന്ന് 71 ശതമാനത്തിലധികം സ്ത്രീകളും റിയല്‍ എസ്റ്റേറ്റിനെയാണ് ഏറ്റവും സുരക്ഷിതവും ലാഭകരവുമായ നിക്ഷേപമായി കാണുന്നത്. കൗതുകകരമായ മറ്റൊരു വസ്തുത, ഓഹരി വിപണിയിലുള്ള സ്ത്രീകളുടെ താല്പര്യം 20 ശതമാനത്തില്‍ നിന്ന് വെറും 3 ശതമാനത്തിലേക്ക് ഇടിഞ്ഞപ്പോള്‍, റിയല്‍ എസ്റ്റേറ്റിലുള്ള വിശ്വാസം ആകാശത്തോളം ഉയര്‍ന്നു എന്നതാണ്. 'ഇഷ്ടികയും സിമന്റും' നല്‍കുന്ന ആത്മവിശ്വാസം മറ്റൊന്നിനുമില്ലെന്ന് അവര്‍ തിരിച്ചറിയുന്നു.

വലിയ വീടുകള്‍, വിശാലമായ സ്വപ്നങ്ങള്‍

ചെറിയ ഫ്‌ലാറ്റുകളോട് സ്ത്രീകള്‍ 'നോ' പറഞ്ഞു തുടങ്ങിയിരിക്കുന്നു. ഹൈബ്രിഡ് ജോലി സാഹചര്യങ്ങളും കുടുംബത്തിന്റെ സ്വകാര്യതയും കണക്കിലെടുത്ത് 3 ബിഎച്ച്‌കെ, 4 ബിഎച്ച്‌കെ വീടുകള്‍ക്കാണ് ഇന്ന് ആവശ്യക്കാര്‍ കൂടുതല്‍. സര്‍വേയില്‍ പങ്കെടുത്ത 54% സ്ത്രീകളും മൂന്ന് ബെഡ്‌റൂം വീടുകളെയാണ് സ്‌നേഹിക്കുന്നത്. ഒരു ബെഡ്‌റൂം വീടുകളോടുള്ള താല്പര്യം വെറും 4 ശതമാനത്തിലേക്ക് ചുരുങ്ങിയത്, ജീവിതനിലവാരത്തില്‍ സ്ത്രീകള്‍ വരുത്തിയ വലിയ മാറ്റത്തെയും അവരുടെ ഉയരുന്ന സാമ്പത്തിക ശേഷിയെയുമാണ് സൂചിപ്പിക്കുന്നത്.

ഭാവിയുടെ സാമ്പത്തിക ശില്പികള്‍

ഇന്ത്യന്‍ റിയല്‍ എസ്റ്റേറ്റ് വിപണിയുടെ ഭാവി ഇനി ആത്മവിശ്വാസമുള്ള ഈ വനിതാ നിക്ഷേപകരുടെ കൈകളിലാണ്. വെറുമൊരു വീട് വാങ്ങുക എന്നതിലുപരി, ദീര്‍ഘകാലാടിസ്ഥാനത്തില്‍ വലിയൊരു ആസ്തി കെട്ടിപ്പടുക്കുകയാണ് അവര്‍ ചെയ്യുന്നത്. സര്‍ക്കാരിന്റെ ഭാഗത്തുനിന്നുള്ള സ്റ്റാമ്പ് ഡ്യൂട്ടി ഇളവുകളും ബാങ്കുകള്‍ നല്‍കുന്ന പ്രത്യേക പലിശ ഇളവുകളും ഈ കുതിപ്പിന് വേഗത കൂട്ടുന്നു. വീടിന്റെ അകത്തളം ഒരുക്കുന്നവര്‍ എന്നതിനപ്പുറം, ഒരു സാമ്രാജ്യം തന്നെ കെട്ടിപ്പടുക്കുന്ന സാമ്പത്തിക ശില്പികളായി ഇന്ത്യന്‍ സ്ത്രീകള്‍ മാറിക്കഴിഞ്ഞു.