അപ്പാര്‍ട്ടുമെന്റുകള്‍ വിട്ട് ഫാംഹൗസുകളിലേക്ക്; വിപണിയില്‍ വന്‍ മാറ്റം, വാങ്ങാന്‍ തിരക്കോട് തിരക്ക്

പുതിയ കാലത്ത് സമ്പന്നരായ നിക്ഷേപകരുടെ കണ്ണ് ഇപ്പോള്‍ പച്ചപ്പ് നിറഞ്ഞ ഫാം ഹൗസുകളിലേക്കാണ്. നഗരങ്ങളിലെ ആഡംബര ഫ്‌ലാറ്റുകളോടുള്ള താല്‍പര്യം കുറയുന്ന പ്രവണത മിക്കസ്ഥലങ്ങളിലും ഉയര്‍ന്നുവരുന്നു. ഇതിന്റെ തുടക്കം കൃത്യമായി പറഞ്ഞാല്‍ കോവിഡ് കാലത്തായിരുന്നു. ഇന്ന് ഈ മാറ്റം ആധുനിക റിയല്‍ എസ്റ്റേറ്റ് വിപണിയുടെ മുഖച്ഛായ തന്നെ മാറ്റുന്ന സ്ഥിരമായ നിക്ഷേപ ശൈലിയായി മാറിയിരിക്കുന്നു. കോണ്‍ക്രീറ്റ് കാടുകള്‍ക്ക് പകരം ആവശ്യത്തിന് സ്ഥലം, സ്വകാര്യത, പ്രകൃതിയോട് ചേര്‍ന്നുള്ള ജീവിതം എന്നിവ ആഗ്രഹിക്കുന്നവര്‍ പകൃതിരമണീയമായ വലിയ എസ്റ്റേറ്റുകള്‍ തേടിപ്പോകുന്നത് സ്ഥിരം കാഴ്ചയായി.

കേവലം വാരാന്ത്യ വിശ്രമകേന്ദ്രങ്ങള്‍ എന്നതിനപ്പുറം, ഈ ഫാംഹൗസുകളെ തങ്ങളുടെ സ്ഥിരതാമസത്തിനുള്ള പ്രൈമറി ഹോമുകളായും അടുത്ത തലമുറയ്ക്കുള്ള വലിയൊരു ആസ്തിയായുമാണ് വാങ്ങുന്നവര്‍ കാണുന്നത്. കാര്‍ഷിക പരിപാലനം, സുരക്ഷ, മറ്റ് ആധുനിക സൗകര്യങ്ങള്‍ എന്നിവയെല്ലാം പ്രൊഫഷണല്‍ ഏജന്‍സികള്‍ നോക്കിനടത്തുന്ന 'മാനേജ്ഡ് ഫാംഹൗസ്' ഗേറ്റഡ് കമ്മ്യൂണിറ്റികളുടെ വരവാണ് ഈ മാറ്റത്തിന് വേഗത കൂട്ടിയത്. ഗ്രാമീണ മേഖലകളില്‍ ഭൂമി വാങ്ങി നേരിട്ട് നേരിടേണ്ടി വരുന്ന പരമ്പരാഗത തലവേദനകളോ നിയമപ്രശ്‌നങ്ങളോ ഇല്ലാതെ തന്നെ, ഉടമകള്‍ക്ക് ഒരു ലക്ഷ്വറി ലൈഫ്സ്‌റ്റൈല്‍ ആസ്വദിക്കാന്‍ ഇത് അവസരമൊരുക്കുന്നു.

നഗര ഹൃദയങ്ങളിലെ വിപണികളേക്കാള്‍ വലിയ സാമ്പത്തിക ലാഭമാണ് നഗരപ്രാന്തങ്ങളിലെ ഇത്തരം ഭൂമി നിക്ഷേപങ്ങള്‍ ഇന്ന് നല്‍കുന്നത്. പണപ്പെരുപ്പത്തെ പ്രതിരോധിക്കാനുള്ള മികച്ചൊരു മാര്‍ഗ്ഗമെന്നതിനൊപ്പം, വലിയ മൂലധന വളര്‍ച്ചയും ഇത്തരം പ്രോപ്പര്‍ട്ടികള്‍ ഉറപ്പുനല്‍കുന്നുണ്ടെന്ന് വിപണി വിദഗ്ധര്‍ വിലയിരുത്തുന്നു. ഒപ്പം, നഗര സൗന്ദര്യശാസ്ത്രവും അത്യാധുനിക ഹൈടെക് സൗകര്യങ്ങളും ഒന്നിപ്പിക്കുന്നതാണ് പുതിയ കാലത്തെ ഫാംഹൗസുകള്‍. സോളാര്‍ ഗ്രിഡുകള്‍, റെയിന്‍ വാട്ടര്‍ ഹാര്‍വെസ്റ്റിംഗ്, ജൈവ അടുക്കളത്തോട്ടങ്ങള്‍ എന്നിവയോടൊപ്പം ഹൈ-സ്പീഡ് ഫൈബര്‍-ഒപ്റ്റിക് കണക്റ്റിവിറ്റിയും സ്മാര്‍ട്ട് ഹോം ഓട്ടോമേഷനും ഇവിടെ ലഭ്യമാണ്. ഡിജിറ്റല്‍ ലോകത്തോട് എപ്പോഴും കണക്റ്റഡ് ആയിരുന്നുകൊണ്ടുതന്നെ പ്രൊഫഷണലുകള്‍ക്ക് ഇവിടെയിരുന്ന് ജോലി ചെയ്യാം.

നഗരങ്ങളുടെ അതിരുകള്‍ അതിവേഗം പുറത്തേക്ക് വ്യാപിക്കുന്നതോടെ, നഗര സൗകര്യങ്ങളും ഗ്രാമീണ ശാന്തതയും തമ്മിലുള്ള അകലം കുറയുകയാണ്. ഇതുകൊണ്ടുതന്നെ, വരാനിരിക്കുന്ന പുതിയ എക്‌സ്പ്രസ് വേ ഇടനാഴികള്‍ക്ക് ഇരുവശത്തുമായി വലിയ ഭൂമി പാഴ്‌സലുകള്‍ സ്വന്തമാക്കാനുള്ള നെട്ടോട്ടത്തിലാണ് വന്‍കിട ഡെവലപ്പര്‍മാര്‍. ഇന്നത്തെ തലമുറയ്ക്ക് തങ്ങളുടെ സ്റ്റാറ്റസ് കാണിക്കാന്‍ വെറുമൊരു പ്രീമിയം പോസ്റ്റല്‍ കോഡ് മാത്രം പോരാ, മറിച്ച് സ്വന്തമായി ഭൂമി വേണമെന്ന ചിന്തയാണ് ഈ മാറ്റത്തിന് പിന്നില്‍.