ജിയോ കണക്ഷനുണ്ടോ? ഷോക്ക് ട്രീറ്റ്‌മെന്റുമായി ട്രായ്; പ്ലാനുകളിലെ വിവേചനം നിര്‍ത്തലാക്കാന്‍ നിര്‍ദ്ദേശം

രാജ്യത്തെ ഏറ്റവും വലിയ ടെലികോം സേവനദാതാക്കളായ റിലയന്‍സ് ജിയോയ്ക്ക് തിരിച്ചടിയുമായി ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്). ജിയോയുടെ ചില താരിഫ് പ്ലാനുകള്‍ സുതാര്യതയില്ലാത്തതും ഉപഭോക്താക്കള്‍ക്കിടയില്‍ വിവേചനം കാണിക്കുന്നതുമാണെന്ന് ട്രായ് കണ്ടെത്തി. നിയമലംഘനം നടത്തുന്ന ഇത്തരം പ്ലാനുകള്‍ ഉടന്‍ നിര്‍ത്തലാക്കാനാണ് നിര്‍ദ്ദേശം. ഏപ്രില്‍ 14-നകം പ്ലാറ്റ്ഫോമുകളിലുടനീളം ഏകീകൃത താരിഫ് പ്ലാനുകള്‍ പ്രസിദ്ധീകരിക്കണമെന്നും ഉപകരണങ്ങള്‍ക്കനുസരിച്ചുള്ള പ്ലാനുകളിലെ നിയന്ത്രണം നീക്കണമെന്നും ട്രായ് ജിയോയോട് ആവശ്യപ്പെട്ടു.

ചില വിലകുറഞ്ഞ പ്രീപെയ്ഡ് പ്ലാനുകള്‍ വെബ്‌സൈറ്റിലോ ആപ്പിലോ ലഭ്യമാക്കാതെ റീട്ടെയ്ല്‍ സ്റ്റോറുകള്‍ വഴി മാത്രം നല്‍കുന്നത് ഉപഭോക്താക്കളെ തെറ്റിദ്ധരിപ്പിക്കുന്നതാണെന്ന് റെഗുലേറ്റര്‍ നിരീക്ഷിച്ചു. ഉദാഹരണത്തിന്, 249, 199 രൂപ നിരക്കുകളിലുള്ള സ്‌പെഷ്യല്‍ വൗച്ചറുകള്‍ ജിയോ സ്റ്റോറുകളില്‍ മാത്രം ലഭ്യമാക്കുന്ന രീതി സുതാര്യതയുടെ തത്വത്തിന് വിരുദ്ധമാണ്. എല്ലാ പ്ലാറ്റ്ഫോമുകളിലും എല്ലാ പ്ലാനുകളും ഉപഭോക്താക്കള്‍ക്ക് ഒരുപോലെ ലഭ്യമാകണം എന്ന 2020-ലെ ഉത്തരവ് ജിയോ ലംഘിച്ചതായാണ് ട്രായുടെ വിലയിരുത്തല്‍.

ജിയോഫോണ്‍, ജിയോഭാരത് തുടങ്ങിയ ഫോണുകള്‍ ഉപയോഗിക്കുന്നവര്‍ക്ക് മാത്രം നല്‍കുന്ന പ്രത്യേക പ്ലാനുകളും ഇപ്പോള്‍ ട്രായുടെ നിരീക്ഷണത്തിലാണ്. ഇത്തരം 'ഉപകരണ-നിര്‍ദ്ദിഷ്ട' പ്ലാനുകള്‍ വിവേചനപരമാണെന്ന് റെഗുലേറ്റര്‍ കുറ്റപ്പെടുത്തി. കുറഞ്ഞ നിരക്കിലുള്ള ഈ ഓഫറുകള്‍ മറ്റു സ്മാര്‍ട്ട്ഫോണ്‍ ഉപയോക്താക്കള്‍ക്ക് ലഭ്യമാകാത്തത് ശരിയല്ലെന്നും, എല്ലാ ഉപഭോക്താക്കള്‍ക്കും ഒരുപോലെ റീചാര്‍ജ് സൗകര്യം നല്‍കണമെന്നും ട്രായ് നിര്‍ദ്ദേശിച്ചു. ഈ പ്ലാനുകള്‍ പുനഃക്രമീകരിക്കാന്‍ ജിയോയ്ക്ക് നിര്‍ദ്ദേശം നല്‍കിയിട്ടുണ്ട്.

തങ്ങളുടെ പ്ലാനുകള്‍ ശാസ്ത്രീയമായ മാനദണ്ഡങ്ങള്‍ അടിസ്ഥാനമാക്കിയുള്ളതാണെന്നും പ്രത്യേക ഉപഭോക്തൃ വിഭാഗങ്ങളെ ലക്ഷ്യം വെച്ചുള്ളതാണെന്നും ജിയോ വാദിച്ചെങ്കിലും ട്രായ് അത് തള്ളി. താരിഫുകളുടെ പ്രസിദ്ധീകരണവും ലഭ്യതയും വേര്‍പെടുത്താനാവില്ലെന്നും, പ്രത്യേക ഉപകരണങ്ങളുമായി പ്ലാനുകളെ ബന്ധിപ്പിക്കുന്നത് ഉപഭോക്താവിന്റെ തിരഞ്ഞെടുക്കാനുള്ള സ്വാതന്ത്ര്യത്തെ ബാധിക്കുമെന്നും ട്രായ് വ്യക്തമാക്കി. ഇത് മൊബൈല്‍ നമ്പര്‍ പോര്‍ട്ടബിലിറ്റി സംവിധാനത്തെ ദുര്‍ബലപ്പെടുത്തുമെന്നും റെഗുലേറ്റര്‍ ചൂണ്ടിക്കാട്ടി.

ട്രായുടെ നിര്‍ദ്ദേശങ്ങള്‍ പാലിക്കുന്നതില്‍ പരാജയപ്പെട്ടാല്‍ ജിയോ വന്‍ പിഴ നേരിടേണ്ടി വരും. ആദ്യ ലംഘനത്തിന് ഒരു ലക്ഷം രൂപ വരെയും, തുടര്‍ച്ചയായ ലംഘനങ്ങള്‍ക്ക് പ്രതിദിനം അധിക പിഴയും ഈടാക്കാന്‍ 1997-ലെ ട്രായ് ആക്ട് പ്രകാരം വ്യവസ്ഥയുണ്ട്. രാജ്യത്തെ 50 കോടിയിലധികം വരുന്ന വരിക്കാരെ ബാധിക്കുന്ന വിഷയമായതിനാല്‍, ജിയോയുടെ അടുത്ത നീക്കം ടെലികോം വിപണിയില്‍ നിര്‍ണായകമാകും.