Login 
പഠിക്കാം & സമ്പാദിക്കാം 
Home
16 Oct 2026 9:51 AM IST
Summary
ഒരു ഉപഭോക്താവ് പോലുമില്ലാതെ 2016-ല്‍ വിപണിയില്‍ വന്ന് ഇന്ന് 53 കോടി ഉപഭോക്താക്കളെ നേടിയ കഥയാണ് ജിയോയുടേതെന്ന് റിലയന്‍സ്
സ്റ്റാര്‍ലിങ്കിന് ഇന്ത്യയില്‍ അനുമതി വൈകുന്നതില്‍ ഇലോണ്‍ മസ്‌ക് ഉന്നയിച്ച വിമര്‍ശനത്തിന് ചുട്ട മറുപടിയുമായി റിലയന്‍സ്. ഇന്ത്യയുടെ നിയമം എല്ലാവര്‍ക്കും ഒരുപോലെയാണെന്നും മത്സരത്തെ ഒരിക്കലും പേടിച്ചിട്ടില്ലെന്നും റിലയന്‍സ് പ്രസ്താവനയില്‍ വ്യക്തമാക്കി. തങ്ങളുടെ ജിയോ സാറ്റ്‌കോം സേവനം പോലും ഇപ്പോഴും അനുമതിക്കായി കാത്തിരിക്കുകയാണെന്നും കമ്പനി ചൂണ്ടിക്കാട്ടി.
ഒരു ഉപഭോക്താവ് പോലുമില്ലാതെ 2016-ല്‍ വിപണിയില്‍ വന്ന് ഇന്ന് 53 കോടി ഉപഭോക്താക്കളെ നേടിയ കഥയാണ് ജിയോയുടേതെന്നും റിലയന്‍സ് ഓര്‍മിപ്പിച്ചു. മത്സരം ഉപഭോക്താക്കള്‍ക്ക് നല്ലതാണെന്നും നവീകരണത്തിനും നിക്ഷേപത്തിനും ഇന്ത്യ തുറന്നിടണമെങ്കില്‍ നിയമവാഴ്ച എല്ലാവര്‍ക്കും ഒരുപോലെ വേണമെന്നും കമ്പനി പറയുന്നു.
അതേസമയം മുകേഷ് അംബാനിക്കെതിരെ രൂക്ഷ വിമര്‍ശനവുമായി മസ്‌ക് നേരത്തെ രംഗത്തെത്തിയിരുന്നു. ഇന്ത്യന്‍ വിപണിയിലെ കുത്തക സംരക്ഷിക്കാനാണ് അംബാനി ശ്രമിക്കുന്നതെന്നായിരുന്നു ആരോപണം. സ്റ്റാര്‍ലിങ്ക് വന്നാല്‍ ഗ്രാമങ്ങളില്‍ പോലും അതിവേഗ ഇന്റര്‍നെറ്റും ദുരന്തസമയങ്ങളില്‍ തടസമില്ലാത്ത കണക്ടിവിറ്റിയും ഉറപ്പാക്കാനാകുമെന്നാണ് മസ്‌കിന്റെ വാദം.
എന്തായാലും സ്റ്റാര്‍ലിങ്ക്, ജിയോ സാറ്റ്‌കോം, യൂട്ടെല്‍സാറ്റ് വണ്‍വെബ് എന്നിവര്‍ക്ക് ലൈസന്‍സ് കിട്ടിയെങ്കിലും സുരക്ഷാ നിബന്ധനകള്‍ പാലിച്ചാലേ സേവനം തുടങ്ങാനാകൂ എന്ന് കേന്ദ്രം വ്യക്തമാക്കി. ഇന്ത്യയില്‍ ആര്‍ക്കും പ്രത്യേക പരിഗണനയില്ല, നടപടികള്‍ എല്ലാം ന്യായമാണെന്ന് മന്ത്രി സിന്ധ്യയും പറഞ്ഞു. ബഹിരാകാശത്ത് നിന്നുള്ള ഇന്റര്‍നെറ്റ് യുദ്ധം ഇനി ഇന്ത്യയിലും ചൂടുപിടിക്കുകയാണ്.