ട്രെയിന്‍ യാത്രക്കാരുടെ ശ്രദ്ധയ്ക്ക്; ടിക്കറ്റ് ക്യാന്‍സലേഷന്‍ നിയമങ്ങളില്‍ വന്‍ മാറ്റം

ഇന്ത്യന്‍ റെയില്‍വേ ടിക്കറ്റ് റദ്ദാക്കല്‍ നിയമങ്ങള്‍ പരിഷ്‌കരിക്കുകയും ബോര്‍ഡിംഗ് പോയിന്റ് മാറ്റുന്നതിനുള്ള മാനദണ്ഡങ്ങള്‍ ലഘൂകരിക്കുകയും ചെയ്തു. ഏപ്രില്‍ 1 മുതല്‍ 15 വരെയുള്ള കാലയളവില്‍ ഘട്ടംഘട്ടമായി നടപ്പിലാക്കുന്ന ഈ പുതിയ നിയമങ്ങള്‍ യാത്രക്കാരുടെ പണം ലാഭിക്കാനും യാത്രാ പ്ലാനുകള്‍ കൂടുതല്‍ വഴക്കമുള്ളതാക്കാനും സഹായിക്കും. ട്രെയിന്‍ പുറപ്പെടുന്നതിന് വെറും 30 മിനിറ്റ് മുമ്പ് വരെ ബോര്‍ഡിംഗ് സ്റ്റേഷന്‍ മാറ്റാന്‍ സാധിക്കുമെന്നതാണ് യാത്രക്കാര്‍ക്ക് ലഭിക്കുന്ന ഏറ്റവും വലിയ ആശ്വാസം. മുന്‍പ് ചാര്‍ട്ട് തയ്യാറാക്കുന്നതിന് മുന്‍പ് മാത്രമേ ഈ സൗകര്യം ലഭ്യമായിരുന്നുള്ളൂ.

ക്യാന്‍സലേഷന്‍ ഇനി സമയബന്ധിതം; റീഫണ്ട് നിയമങ്ങള്‍ ഇങ്ങനെ

പുതിയ നിയമപ്രകാരം, നിങ്ങള്‍ ടിക്കറ്റ് റദ്ദാക്കുന്ന സമയത്തിനനുസരിച്ചായിരിക്കും റീഫണ്ട് തുക നിശ്ചയിക്കുക. യാത്രയ്ക്ക് 72 മണിക്കൂര്‍ മുമ്പ് ടിക്കറ്റ് റദ്ദാക്കിയാല്‍ ചെറിയൊരു തുക മാത്രം കുറച്ച് ബാക്കി തുക തിരികെ ലഭിക്കും. എന്നാല്‍ 24 മുതല്‍ 72 മണിക്കൂര്‍ വരെയാണെങ്കില്‍ 25 ശതമാനവും, 8 മുതല്‍ 24 മണിക്കൂര്‍ വരെയാണെങ്കില്‍ ടിക്കറ്റ് തുകയുടെ 50 ശതമാനവും നഷ്ടപ്പെടും. ട്രെയിന്‍ പുറപ്പെടാന്‍ 8 മണിക്കൂറില്‍ താഴെ മാത്രമുള്ളപ്പോള്‍ ടിക്കറ്റ് റദ്ദാക്കിയാല്‍ റീഫണ്ട് ലഭിക്കില്ല. ടിക്കറ്റ് മുന്‍കൂട്ടി ബുക്ക് ചെയ്ത് അവസാന നിമിഷം റദ്ദാക്കുന്ന ഏജന്റുമാരുടെ തട്ടിപ്പുകള്‍ തടയാനാണ് റെയില്‍വേ മന്ത്രി അശ്വിനി വൈഷ്ണവ് ഈ കര്‍ശന നടപടികള്‍ പ്രഖ്യാപിച്ചത്.

യാത്രക്കാര്‍ക്ക് നേട്ടം; റീഫണ്ട് പ്രക്രിയ കൂടുതല്‍ സുതാര്യം

മുന്‍പ് നിലവിലുണ്ടായിരുന്ന സങ്കീര്‍ണമായ സ്ലാബ് സിസ്റ്റത്തിന് പകരമാണ് പുതിയ ലളിതമായ രീതി വരുന്നത്. ഒന്നിലധികം സ്റ്റേഷനുകളുള്ള നഗരങ്ങളില്‍ യാത്ര ചെയ്യുന്നവര്‍ക്ക് തങ്ങള്‍ക്ക് ഇഷ്ടമുള്ള സ്റ്റേഷനില്‍ നിന്ന് ട്രെയിന്‍ കയറാന്‍ പുതിയ ബോര്‍ഡിംഗ് പോയിന്റ് നിയമം വലിയ സഹായമാകും. അതേസമയം, വെയ്റ്റ്ലിസ്റ്റ് ടിക്കറ്റുകളുടെയും ട്രെയിന്‍ വൈകിയാലുള്ള റീഫണ്ടുകളുടെയും കാര്യത്തില്‍ നിലവിലുള്ള ആനുകൂല്യങ്ങള്‍ തുടരും. റെയില്‍വേയുടെ ഈ പരിഷ്‌കാരം യാത്രക്കാര്‍ക്ക് കൂടുതല്‍ ഉത്തരവാദിത്തത്തോടെ യാത്രകള്‍ ആസൂത്രണം ചെയ്യാന്‍ വഴിയൊരുക്കും.