പാവക്കുട്ടിയിലൂടെ വിരിഞ്ഞ വിപ്ലവം; കുട്ടിപ്പഞ്ച് മാറ്റിവരച്ചത് ഒരു നഗരത്തിന്റെ ടൂറിസം ഭൂപടം

തീക്ഷ്ണമായ സ്‌നേഹബന്ധത്തിന്റെ കഥയുമായാണ് 'പഞ്ച്' എന്ന കുട്ടി കുരങ്ങന്‍ ലോകത്തിന്റെ ഹൃദയം കീഴടക്കുന്നത്. ജപ്പാനിലെ ഇച്ചിക്കാവ മൃഗശാലയില്‍ ജനിച്ചയുടനെ അമ്മ ഉപേക്ഷിച്ച പഞ്ചിന് തുണയായത് ഒരു ഒറാങ്ങ് ഉട്ടാന്‍ പാവയായിരുന്നു. ആ പാവയെ സ്വന്തം അമ്മയായി കരുതി കെട്ടിപ്പിടിച്ചുറങ്ങുന്ന പഞ്ചിന്റെ ദൃശ്യങ്ങള്‍ വൈറലായതോടെ വെറുമൊരു മൃഗശാലാ വാര്‍ത്ത എന്നതിനപ്പുറം ഇതൊരു ആഗോള പ്രതിഭാസമായി മാറി. ഇന്ത്യ മുതല്‍ അമേരിക്ക വരെയുള്ള മൃഗസ്നേഹികള്‍ #HangInTherePunch എന്ന ഹാഷ്ടാഗുമായി എത്തിയതോടെ പഞ്ച് ഇന്റര്‍നെറ്റിലെ സൂപ്പര്‍താരമായി.

ഈ വൈകാരിക ബന്ധം കേവലം സോഷ്യല്‍ മീഡിയയില്‍ ഒതുങ്ങിനിന്നില്ല, മറിച്ച് ഇച്ചിക്കാവ എന്ന കൊച്ചു നഗരത്തിന്റെ സാമ്പത്തിക അടിത്തറ തന്നെ മാറ്റിമറിച്ചു. മുമ്പ് ശാന്തമായിരുന്ന ഈ മുനിസിപ്പല്‍ മൃഗശാലയിലെ സന്ദര്‍ശകരുടെ എണ്ണത്തില്‍ 400 ശതമാനത്തിന്റെ അവിശ്വസനീയമായ വര്‍ദ്ധനവാണ് ഉണ്ടായത്. ഡിസ്നിലാന്‍ഡ് കാണാന്‍ എത്തുന്ന അന്താരാഷ്ട്ര ടൂറിസ്റ്റുകള്‍ പോലും ഇപ്പോള്‍ പഞ്ചിനെ കാണാനായി ഇച്ചിക്കാവയിലേക്ക് വണ്ടി കയറുന്നു. ഒരു വൈറല്‍ വീഡിയോ എങ്ങനെ ഒരു പ്രദേശത്തിന്റെ ടൂറിസം സാധ്യതകളെ ഉത്തേജിപ്പിക്കാം എന്നതിന്റെ മികച്ച ഉദാഹരണമായി പഞ്ച് മാറി.

സാമ്പത്തികമായി നോക്കിയാല്‍, പഞ്ചിന്റെ പ്രശസ്തി പ്രാദേശിക വ്യാപാര മേഖലയ്ക്ക് വലിയ ഉണര്‍വാണ് നല്‍കിയത്. പഞ്ചിന്റെ അമ്മപ്പാവയായ 'ഒറാ-മാമ'യുടെ മാതൃകയിലുള്ള കളിപ്പാട്ടങ്ങള്‍ വാങ്ങാന്‍ ടൂറിസ്റ്റുകള്‍ തിരക്ക് കൂട്ടുകയാണ്. മൃഗശാല പുറത്തിറക്കിയ 'പഞ്ച് & ഒറാ-മാമ' ലിമിറ്റഡ് എഡിഷന്‍ പോസ്റ്റ്കാര്‍ഡുകള്‍ക്കും ബാഡ്ജുകള്‍ക്കും വന്‍ ഡിമാന്‍ഡാണ്. കേവലം കാഴ്ചവസ്തു എന്നതിലുപരി, മൃഗശാലയുടെ നിലനില്‍പ്പിന് തന്നെ പഞ്ച് ഒരു വലിയ സാമ്പത്തിക സ്രോതസ്സായി മാറി.

പഞ്ചിന്റെ ജീവിതത്തില്‍ ഇപ്പോള്‍ ശുഭകരമായ മാറ്റങ്ങള്‍ സംഭവിച്ചു തുടങ്ങിയിരിക്കുന്നു. അമ്മപ്പാവയെ വിട്ട് കൂട്ടത്തിലെ മറ്റ് കുരങ്ങന്മാരുമായി അവന്‍ ചങ്ങാത്തത്തിലായിക്കഴിഞ്ഞു. മറ്റ് കുരങ്ങുകള്‍ അവനെ സ്‌നേഹത്തോടെ പരിചരിക്കുന്നത് അവന്‍ ആ സമൂഹത്തിന്റെ ഭാഗമായി എന്നതിന്റെ അടയാളമാണ്. പാവക്കുട്ടി നല്‍കിയ സ്‌നേഹത്തില്‍ നിന്ന് യഥാര്‍ത്ഥ ബന്ധങ്ങളിലേക്ക് പഞ്ച് വളരുമ്പോള്‍, അത് നല്‍കുന്ന സന്ദേശം വളരെ വലുതാണ്. ഒരു കുഞ്ഞുമൃഗത്തിന് ഒരു നാടിന്റെയും അവിടുത്തെ ജനങ്ങളുടെയും ജീവിതത്തില്‍ ഇത്ര വലിയ മാറ്റം കൊണ്ടുവരാന്‍ കഴിയുമെന്ന് പഞ്ച് തെളിയിക്കുന്നു.

കൂടാതെ ഒരു സാധ്യതയില്ലാത്ത കളിപ്പാട്ടത്തെ ആഗോളതലത്തില്‍ ഹിറ്റാക്കി മാറ്റാനും കുഞ്ഞുപഞ്ചിന് സാധിച്ചു. ഐകിയ (IKEA) സ്വീഡിഷ് ഫര്‍ണിച്ചര്‍ ഭീമനായ ഐക്കിയയില്‍ നിന്നുള്ളതാണ് ഈ ഓറഞ്ച് ഒറാങ്ങ് ഉട്ടാന്‍ പ്ലഷ് കളിപ്പാട്ടം. ഇന്ന് കളിപ്പാട്ടം ലോകമെങ്ങും വിറ്റുതീര്‍ന്നുകൊണ്ടിരിക്കുന്നു.